[bassem8800370]

لو سألنا أي شاب أنت ليه مش متجوز .. طبعا سيقول " الإمكانيات والظروف وقلة الحيلة " لكن الغريب إن فيه شباب عندهم كل الإمكانيات وظروفهم المادية كويسة ومع ذلك مش عايزين يتجوزوا أو مش في دماغهم فكرة الارتباط خالص يا تري ليه؟!








فى رأى بيقول الجواز وجع دماغ ونهاية لسعادتي وحريتي ده كان مبرر أنا كده زي الفل ولا جواز ولا وجع دماغ وبعدين أنا دلوقتي حر نفسي ومبسوط ليه أتجوز وأتنازل عن كل ده خليني كده أحسن








فى رأى بيقول أنا عندي كل الإمكانيات اللي تسمح لي بالجواز وعندي شقة بس أنا عندي أولويات أهم ومنها تكون عندي عربية ودي بصراحة عندي أهم من العروسة وكمان أنا عايز أوصل لدرجة علمية بعد ما أحضر الدكتوراة ودي كمان حاجة عندي أهم لإني لو اتجوزت ولا هعرف أعمل أي حاجة من أحلامي وطموحاتي يبقي بلاها جواز بقي








فى رأى بيقول أنا خايف من التجربة أنا اتعودت إني لا أدخل تجارب فاشلة ولا أغامر في أي تجربة مش محسوب نتائجها ومعروف طبعا إن الجواز ممكن يبقي ناجح أو فاشل فأنا ليه أدخل نفسي تجربة مش معروف نتيجتها فربما تكون فاشلة وأفضل أعاني طول عمري من الفشل ده يبقي بلاش أحسن







فى رأى بيقول الجواز زي البطيخة ممكن تطلع حلوة وممكن تكون قرعة والجواز نفس الحكاية وبعدين الحكاية تدبيسة بصراحة ومسئوليات أنا في غني عنها ويبقي عندي حماتي واللي طبعا مش هعجبها في حاجة يبقي " فكني أنا بقي من الجواز ووجع القلب "







فى رأى بيقول أنا عندي كل إمكانياتي الحمد لله ولكن ربنا يكمل لي عقلي رافض فكرة الجواز دلوقتي فأنا لي نظرية في موضوع الجواز ده أولا في فترة الخطوبة اللي كل الناس بتقول إنها أجمل ما في الجواز فهي مش حلوة ولا حاجة لإن فيها خداع وكل واحد بيجمل نفسه وبعد الجواز بيبدأ كل واحد يبان للتاني على حقيقته ويبدأ الصدام وأنا مركز في شغلي والحمد لله ناجح فيه فالصدام اللي هايحصل ده أكيد هايعطلني عن تركيزي ونجاحي








فى رأى بيقول الجواز فعلا معناه إن حد يتحكم في من أول يوم لآخر يوم فلما أروح وأتقدم للهانم ألاقي أبوها بيتحكم في ويتشرط وعايز مهر قد كده وشبكة مش عارف بكام وبعد ده كله أالاقي حماتي كمان تقولي لو كلمت بنتي نص كلمة هعمل وأسوي وبعد الجواز ألاقي الهانم بتقولي رايح فين وجاي منين ويا سلام لو خلفت كمان ده الموضوع كبير، لا " أنا كافي خيري شري ولا عايز أتجوز ولا عايز أي حاجة "








ههههههههههههههههه
دى كانت بعض الاراء
انتوا بقى
رأيكم ايه؟

المصدر: †† ارثوذكس †† - من قسم: الموضوعات الشبابية

[dodielpop]

عندك حق في كل اللي انت قولته ياريت بقه كل الشباب يدخلوا ويقولوا رايهم

[magdy totti]

كل الشباب بتقول كده علشان سمعوا من الناس اللى قبلهم
ولا ااسف كل اللى اتجوز لية راى مختلف لكن الهدف واحد

انا شايف ان الجواز شر لابد منه
ههههههههههههه
ااكيد لماا يكون مبنى على اساس هاا يكون احسن وها تقلل المشاكل
ها تقلل
ومن معنى كلامة ها يكون فى مشاكل وده لان ظروف الحياة الاجتماعية وغيرة
هاا يكون ليهاا تاثير
وعلى فكرة لازم كل اتنيان متجوزين يعملوا فترة يبعدوا فيها عن بعض
كل واحد يراجع نفسه
على الاقل يشتاق
للطرف التانى
والحياة علشان تكون سعيدة وجواز نجاح لازم تكبير المخ من الطرفين
شكر ا باسم على الموضوع الرائع ده بجد ها يطلع كل اللى جوانا
وياريت كل الشاب يقولوا رايهم
بس تقريبا الشباب
........................

[dodielpop]

لما يتجوزا كل واحد يقول للتاني معليش لازم نبعد عن بعض شوية كلام مايدخلش الدماغ يمكن علشان انتوا دماغكوا واسعا شوية بتقولوا كده

[نادر شحاته]

وفيه ناس بيقولوا الزواج حلو وجميل بل ويحاولوا يجوزوا وهم لسه فى الجامعه
هى دى الحياه

[emmmy]

فى رأى بيقول الجواز زي البطيخة ممكن تطلع حلوة وممكن تكون قرعة والجواز نفس الحكاية وبعدين الحكاية تدبيسة بصراحة ومسئوليات أنا في غني عنها ويبقي عندي حماتي واللي طبعا مش هعجبها في حاجة يبقي " فكني أنا بقي من الجواز ووجع القلب "


هههههههههههههههه
اة يا باسم صح الجواز زى البطيخة يا تطلع حلوة يا تطلع وحشة
ما هو كلام اجادنا الفراعنة ههههههه

الجواز شركة وهدف يا باسم المفروض الهدف منة يكون مجد اسم اللة
بمعنى ان واحد بيجوز علشان يجيب اولاد ويربيهم فى محبة المسيح
معلمنا بولس بقول البتولية افضل ولكن الزواج افضل من التحرق يعنى لو مقدرشى الشاب انة يعيش من غير زواج وحس انة هينجرف وراء تيار الشر والخطية يبقى الزواج افضل طبعا
لكن لو قدر انة يعيش حياتة للمسيح يبقى احسن وكل واحد بيختار طريق مختلف والهدف واحد وهو المسيح
اما الاسباب اللى بنسمعها بتكون لسببين
يا اما الانسان بيعانى من عقد نفسية من التجارب الفاشلة اللى بيشوفها حوالية وبيسمعها يا اما انة قليل الحيلة وامكانياتة مش تسمح بزواج ناجح وسعيد فى دنيا بقت صعبة وحياة متعبة
يا اما انة مش قد المسئولية ومتعودتشى يتحمل مسئولية من صغرة

[بنت الراهب الصامت]

هنا فى سؤال مهم جدا
ايه اللى بيخلى الزواج ناجح او فاشل؟
الطرفين الزوج والزوجه
لو الاتنين متفاهمين ومتفقين على اساسيات من اول ما اتخطبوا يمشوا عليها مش هتكون فى مشكله بينهم والزواج هيكون سعيد
يمكن الزوجه الضغط عليها اكتر شويه لانها هتكون هى اساس البيت
يعنى مينفعش زوجها جاى تعبان من الشغل وهى تقابله وحش او تشضوفه كده وتقوله عايزة وعايزة
لا غلط لازم تقابله بفرحه وتشيل عنه تعب الشغل شويه وبعدين تقوله طلبها
وكمان الزوج عليه دور
لازم برضو يفصل بين شغله وبيته يعنى مينفعش يعامل زوجته زى اى واحد معاه فى الشغل يزعق ويشخط فيها والا الحياة هتبقى تعيسه
لازم يكون فى تفكير واتفاق بين الطرفين علشان متحصلش مشاكل
فى جوازات بتفشل كتير لان ربنا مش بيدخل فى الزواج دة وفى حياتهم فى البيت
لكن المفروض ان الطرفين يكونوا مع ربنا ويدخلو ربنا فى كل حاجه فى حياتهم وفى بيتهم
غير كده هتكون حياه وحشه وفاشله
ميرسى باسم على الموضوع
ربنا يفرح قلبك
وميرسى مجدى على دعوتك للموضوع

[emmmy]

صح يا نانا برافوا عليكى
وفى حاجة كمان الاتنين وهما مخطوبين بيكون تركيزهم كلة فى الفترة الجميلة والكلام المعسول والهدايا والبرفانات والفسح والمظهر الجميل ورسايل الموبايل والسهر للصبح مع التلفون وهكذا ----
كل دة ماشى انا مش ضدة ومطلوب لاننا بشر وكل جنس بيميل للاخر بشكل طبيعى وعادى دى طبيعة بشرية من قديم الازل

بس كل دة وبينسوا ان فترة الخطوبة فترة دراسة كل واحد المفروض يفحص التانى صح ويشوف اذا كان هيقدر يكمل معاة ولا لا فية اتفاق فى التفكير والعلم والدراسة والمستوى الاجتماعى والثقافى ولا لا
المشكلة ان هما الاتنين فى فترة الخطوبة بيبقا فى نظر بعض فى احسن صورة واحسن مظهر ولما بيتجوزا بيبدوا يتعاملوا مع بعض بطبيعتهم فبيستغربوا بعض
هو مثلا هيقولك : لا لالالا مش هى دى اللى انا حبيتها واتعلقت بيها دى طلعت وحشة وعنيفة ومادية ومتعبة وعنيدة و-----
وهى هتقولك : لالالالا مش دة اللى انا حبيتة دا كان رقيق وحنون وبيجبنى وبيقولى كلام حلو انا مكنتش اعرفة كدة هو سحرنى وخدعنى
وهلما جرى بيبقوا فى وهم جميل ويفوقوا على حقيقة مكنوش عاملين حسابها
ودى المشكلة
فترة الخطوبة جنب كل المشاعر الجميلة واللى انا مش رافضاها بالعكس بس لازم يكون فى واقيعية وحكمة وصدق مع نفسنا وتدخل ربنا زى ما قالت نانا فى كل حاجة علشان اختيار ربنا دايما بيكون احسن وافضل

[بنت الراهب الصامت]

صح يا ايمى فترة الخطوبه بالنسبالهم هى الفترة السعيدة اللى بيحسوا بعواطف وحنيه ومشاعرهم بتبقى رقيقه بينهم
ونسيين اهم حاجه ان بعد الخطوبه فى فرح وبعد كده يبدء الزهول والتغير اللى قولتى انتى عليه دة
ربنا يدخل فى حياتهم ويرشدهم للصالح
وميرسى ليكم

[جاسيكا]

متتجوزش ياعم انت زعلان لية
هههههههه
الزواج فى الاول والاخر نصيب
واللى بيقول مش هتجوز هيجوز برضاة او غصب عنو
كلها ارادة ربنا سواء اتجوزت او متجوزتش
بس انا من رايى ان الزواج دا بيكون ارتباط بين اتنين
فى كل حاجة لازم يكونو متفقين عليها
وتكون بينهم اهم حاجة الصراحة والصدق والحب
ويتفاهمو مع بعض باسلوب كويس ويحاولو يفهمو بعض منغير تعصب من اى طرف على الاخر بكدة هيكون الحياة بينهم سعيدة مش محتاجة للخلافات اللى تخليها حزينة وبس دا رايى
وربنا معاكم كلكم