[Stray sheep]

سلام المسيــــــــح
موضوعك بجد من الموضوعات المهمة جداً جداً مش بس على مستوى المجتمع ككل ولكن على مستوى المسيحية نفسها
لأن البنت هى أساس المجتمع وعن طريقها بعد كدة بتتكون مجتمعات فرعية بتأثر سواء بشكل مباشر او غير مباشر فى المجتمع كلو

المشاركة الأصلية كتبت بواسطة keroo82 1- البنت والاسرة

من أهم النقط فى موضوعك هو البنت والأسرة لأن النقطة دى بتبقى أثر بعد كدة للنتايج اللى جاية دى كلها

يعنى لو البنت ليها علاقة كويسة بأسرتها ومرتبطة بيهم ارتباط اسرى سليم اساسو المحبة والتفاهم وان البنت بيكون ليها دور ايجابي فى اسرتها واسرتها بتديلها المكانة دى اكيد مش هتتأثر بأى تأثيرات خارجية لأنها أصلاً متشبعة بمبادئ معينة مش هتحيد عنها أبداً مهما ساءت الظروف من حواليها

المشاركة الأصلية كتبت بواسطة keroo82 2- البنت والكنيسه

الكنيسة بيكون ليها دور وعامل كبير جداً فى تكوين شخصية اى بنت عموماً بس ده بيعتمد على ان البنت نفسها لازم يكون ليها رغبة فى انها تقبل التوجيه اللى هيجيلها من خدام وكهنة الكنيسة بشكل او بآخر
كمان بيختلف على حسب الهدف اللى البنت بتروح الكنيسة علشانو
للأسف معظم بناتنا بيروحوا الكنيسة علشان يقابلوا اصحابهم او اهداف تانية
وتلاقيهم سايبين الاجتماعات وواقفين برة يتكلموا فى كلام تافه
ليه ؟ ايه السبب اللى يخليهم يقفلوا ودنهم عن كلام ربنا ويسمعوا كلام تانى ؟

الخدام هنا دورهم لازم يظهر فى توجيه البنات دى ويعرفوا ايه سبب بعدهم عن الخدمة او عن الكنيسة بشكل عام وايه طبيعة علاقتهم بأسرتهم ؟ ويبتدوا يقربوهم من الكنيسة بطريقة غير مباشرة علشان البنت متحسش ان اللى قدامها ده بيوجهها او بيجبرها على رأيو

لازم برضو الكنيسة يبقى ليها احترامها يعنى ببيتك يارب تليق القداسة يعنى لازم نختار لبسنا قبل مننزل الكنيسة ونبص كويس فى المرايا هل لبسي ده ينفع للمكان المقدس اللى هيبقى موجود فيه الملايكة والقديسين ولا لا ؟ ياريت بجد ناخد بالنا جداً من النقطة دى

المشاركة الأصلية كتبت بواسطة keroo82 3- البنت وحياة العفه

أحلى حاجة بجد عاجبانى فى موضوعك ان كل نقطو مترتبة على بعض
مهو لو البنت قريبة من الكنيسة وبتقرا فى الكتاب المقدس وعرفت امثلة لفتيات عفيفات اكيد هتتمثل بيهم زى مثلاً سوسنة العفيفة وعندنا كمان اشهر مثال يوسف الصديق
كل ده هيبقى رد فعل طبيعى ان البنت دايماً لازم تفكر انها مختلفة عن اى حد تانى لأنها مسيحية فلازم تسلك السلوك المسيحى الصحيح تجاه عفتها

المشاركة الأصلية كتبت بواسطة keroo82 4- لماذا تتمثل البنت بالاوربيات فى ملابسها

لسبب بسيط جداً ان بعض البنات بيبقى مخها فاضى فالعقل الفارغ معمل للشيطان
زائد كمان انها بعيدة عن الكنيسة فأكيد هتتشبه بأى نموذج سلبى هتقابلو وهتحاول تقلدو

المشاركة الأصلية كتبت بواسطة keroo82 5- هل الكنيسه تمنع البنت من الدخول بملابس غير لائقه

احنا كنيستنا فيها آباء كهنة بيعترضوا على موضوع اللبس الغير لائق بس للأسف اكتشفت حاجتين مهمين جداً
ان فى كنايس تانية بتسمح بكدة عادى جداً فبعض البنات بتعتبر الكنايس اللى مبتسمحش باللبس اللائق ده انها يعنى
old fashion
فبتروح للكنايس التانية دى بس للأسف مفيش اى موانع للبنات فى الكنايس علىى لبسهم ده

المشاركة الأصلية كتبت بواسطة keroo82 7- الحب من وجة نظر البنت

اى بنت اكيد تتمنى ان يكون فى حد فى حياتها بس المهم انها تختار الشخص المناسب وتحاول تفهم من الأول هل هو ده الشخص المناسب اللى ربنا مختارهولها ولا لأ
وياريت نمشى على مقولة بتعجبنى
لاتمنح قلبك لمن لايستحق محبتك
ومتحبيش حد غير خطيبك اللى مرتبطة بيه رسمى ودخل بيتك من بابو مش من شباكو ولا من النت ياريت بجد كلنا ناخد بالنا من النقطة دى علشان مفيش واحدة تنجرح بعد كدة ويبقى السبب انتى

المشاركة الأصلية كتبت بواسطة keroo82 8- اهداف البنت فى الحب

لازم يكون حب واعى
اللى بيحب اى بنت لازم يكون علشان شخصيتها وكيانها
لازم ينتهى بالإرتباط لأنو لو مكنش كدة يبقى ملوش لزمة من الأساس
لازم الاتنين يكونوا بيكملوا بعض
حبهم بيقربهم اكتر من المسيح مش بيبعدهم عن طريقو

المشاركة الأصلية كتبت بواسطة keroo82 9-كيف تنخدع البنت

تنخدع البنت اذا سمحت لقلبها أن يطغى على عقلها لأن احكام العاطفة بتبقى خاطئة دائــــماً

المشاركة الأصلية كتبت بواسطة keroo82 10- هروب البنت مع من تحب وتركها حتى دينها

ده مش عارفة سببو بصراحة بس انا عن نفسي مش شايفة ابداً اى سبب يخلى بنت تعمل كدا
ده المسيح نفسو عاوزنا نسيب كل حاجة علشانو ونتبعو يبقى احنا اللى نسيبو ؟
بس اكيد بسبب ان البنات البعيدة عن الكنيسة هيبقى سهل
إنها تتأثر بأى كلام من برة


موضوعك بجد رااااااااااائع وانا لو اتكلمت فيه هطول عليكم وهدوشكم
ميرسي على تعبك
ربنا يحافظ على كل بناتو يارب دايماً

أذكرونى فى صلواتكم