رد: قصة مسلسة ( حكاية شيطان صغير عنيد )
كُتب : [ 05-09-2009
- 08:43 PM
]
الجزء الرابع
======
تضع الام اخر لمسات المكياج قبل ان تلبس البالطو لان درجة الحراره 5 درجات مئويه و لازالت الساعه 7 من مساء عيد الميلاد المجيد ولابد انها حاتقل عن كده كمان في منتصف الليل بعد خروج الشعب من قداس عيد الميلاد و تنادي الام علي زكى عشان يجيب البلوفر الصوف و الجاكت بتوع اخته نعمه اللي عمرها دلوقتى 4 سنين و بما انه الكبير فلابد يساعد في عمل اي حاحه و لو صغيره عشان يخفف من ضغط الشغل علي امه في يوم مزدحم بالمشاغل زى ليلة العيد
و تنادى عليه الام " ياللا يا زكي لبس نعمه البلوفر الاول و بعدين الجاكت و اقفلها سوستة الجاكت علي بال ما اخلص لبس هدومي لاحسن بابا عمال بيدي كلاكس تحت ولازم نروح الكنيسه بدري عشان نلحق مكان والا حانفضل واقفين طول القداس "
==========
الكنيسه كانت زحمه علي غير العاده و الاب كان قاعد مع الرجاله والام وزكى و نعمه مع السيدات و بعد وقت موش كتير تشد نعمه ايد مامتها - و يفهم زكى ان اللحظه اللي مستنيها من سنين بمنتهي الصبر و الاصرار و الترقب .....حانت
"خد يازكى اختك وديها التواليت..بس تيجوا علي هنا علي طول ..انا قاعده حاجزه المكان علي بال ما تيجوا..ياللا بسرعه وتعالوا عل هنا"
==========
يرفع الاب راسه بعد ما كان موطيها و الكاهن بيرفع الحمل عشان يلاقي زكى قاعد جنبه
"الله...امال فين ماما و نعمه ..انت سبتهم و جيت هنا ليه "
"زهقت يابابا من القعده في وسط الستات..رغايين قوى..و بعدين هو انا موش راجل و اللا ايه"
و ياخد الاب زكى في حضنه و يبوسه " طبعا يا زكي ...ماهو عشان كده انا سايبك مع ماما و نعمه عشان يبقي معاهم راجل "
==========
يرفع الاب رقبته محاولا ان يلمح الام او نعمه في وسط زحمة خروج الشعب من القداس لكن تمر ساعه و الكنيسه تقريبا فضيت و ما فيش اثر لا للام و لا نعمه و يخبرالاب زكي ان ينتظره داخل الكنيسه عشان لو شاف اي حد منهم علي بال ماالاب يروح يدور عليهم بره
و جنب عربية الاب يلاقي الاب الام واقفه تبكى واول ما شافته صرخت "الحقني موش لاقيه زكى و لا نعمه""
ازاي ده...زكى جوه الكنيسه ..طيب خشي انتي و خدى زكى و روحوا البيت عشان الدنيا بردخالص و انا حاروح ادور علي نعمه"
===========
مرت 4 ساعات و الاب لسه ما رجعش و الام مابطلتشى بكاء لكن الشئ الغريب ان زكى اول ما دخل البيت اتعشى بشهيه غير معتاده و نام فورا علي غير العاده والام و الجد و الجده -اللي جم جري لما سمعوا الاخبار - قاعدين علي نار و الام ما فيش علي لسانها حاجه غير "يا ربي يسوع ...ياعدرا يا ام النور "
و يرن جرس الباب
و الام علي وشك يغمى عليها و يجري الجد يفتح الباب
"نعمه ..حبيبة جدو ...انتي كنتي فين ..و عرفتي تيجي لوحدك ازاى"
"واحده ست جابتني هنا يا جدو "
"و عرفت البيت ازاى ..مين قالها عليه ..وهي راحت فين ؟"
"مشيت يا جدو ..بس هي قالتلي انها صاحبة ماما و بابا يعرفها كويس و انها جت البيت تزورنا كتير "
و الام اللي موش قادره تنطق لانها كانت عماله تبكى و تبوس نعمه ..انتبهت لاول مره علي سؤال الجد "مين دي ؟؟-اسمها ايه يا نعمه "
"ما قالتليش يا جدو ..بس هي قالتلي اسلم علي ماما و اقولها.. لما تروحى الكنيسه تاني ماتولعيش شمع كتير ..كفايه شمعه واحده او مش لازم شمع خالص "..و لبستني بلوفر جديدحلو بدل البلوفر اللي زكى قطعه و حطه تحت السرير
=========
"بس يا بنتي ..المناديل اللي في المكتب عندى خلصت" هذا ما قاله الكاهن للام وهو يناولها المنديل الورقي ربما للمرة ال20 لكى تجفف سيل الدموع الذى انهمر من عينيها و هي تبكى بحرقه و تردد باستمرار "مش عارفه اعمل ايه يا ابونا ...الاثنين اولادى ..وانا باحبهم الاتنين زى عينيه و اكتر من روحى و من امى و ابويا..دول اغلي حاجه عندي في الدنيا "
"طيب بس اهدي شويه عشان نفكر بهدوء و نتصرف صح..و المسيح يا بنتى قادر يغير و يعمل الصالح لزكى و لنعمه "
==========
صدر قرار الاب و مافيش مناقشه..زكى حايروح الكنيسه يوم الاحد و الجمعه بانتظام هو ونعمه و ما فيش قداس يفوت من غير تناول ....مهما كانت ظروف الدراسه و الامتحانات و المذاكره و لازم زكي بالذات اللي بقي عمره دلوقتي 13 سنه يحضر درس الكتاب و درس الالحان لانه لازم يترسم شماس و طبعا حضوره في مدارس الاحد حاجه موش محتاجه كلام
كمان مافيش نزول للشارع للعب لكن كعمليه تعويضيه هانروح النادى كلنا مرتين في الاسبوع و يمكن تلاته حسب الظروف في اثناء الدراسه اما بالنسبه للاجازه الصيفيه فموضوع النادى مفتوح بدون حدود بشرط عدم الاخلال بمواعيد الكنيسه
و كمان فيه جايزه قيمه و هديه حلوه خالص لزكى اذا هو قدر يترسم شماس قبل انتهاء السنه الدراسيه..و ده لا يسقط حقه الشرعي في اي جوائز اخري بسبب تفوقه الدراسي او هدية عيد ميلاده و هدايا الاعياد.
"و انا يا بابا..انت نسيتني"..دي نعمه اللي بتتكلم بلهجه فيها شئ بسيط من العتاب المصطنع لكن مليانه حب لبابا و لزكى و ادراك لان زكى اخوها الكبير اللي هي بتحبه محتاج للتحفيز و التشجيع لانها في مره سمعت بابا وماما بيتكلموا - من غير ما يحسوا انها واقفه جنب الباب و بتسمع - و بيقولوا ان زكي اخوها اللي بتحبه مريض و ربنا يشفيه
و يضحك زكى ضحكه هيستيريه مليئه بالتشفي علي كلام اخته نعمه
===========
"هم بيفكروا انى لما اروح الكنيسه بانتظام و اترسم شماس ان دى هاتكون النهايه....اغبياء..كلهم اغبياء..و اولهم الراجل ده اللي بيفكر نفسه اذكى مني و بيفكر انه ممكن يفرض عليه رايه و يتحكم في حياتى اللي هي ملكى لوحدى..طيب ..انا حاوريكم ..و حاضحك عليكم كلكم و بالذات الراجل ابونا ده ابو شكل وحش..
حاضر..
كل اللي انتوا عاوزين تشوفوه من زكي حاتشوفوه..
لكن زكى في النهايه حايعمل اللي هو عايز يعمله
و حايعيش حياته زى ماهو عايز موش زي ما انتم عاوزين ...
و ياويلك يا ست نعمه من زكى.. لما يترسم شماس"
ونكمل المرة الجاية
|