ربى يسوع انت فين يارب انا عايزاك انا محتاجالك نفسى اتكلم معاك واحكيلك عن همومى.
يارب انا عارفة ان انا اللى بعدت عنك وسبتك بارادتى لكن انا ضعيفة يارب ومش هقدر ارجعلك الا لو انت مسكت ايدى ومشيت معايا.
يارب انا عايزة اقولك انى فى وسط همى دورت كتير على قلب حنون اشكيله من مشاكلى لكن مالقيتش غير قلبك انت يا حبيبى دايما فاتحلى قلبك ومستنينى اتكلم واقول اللى مضايقنى لكن للاسف انا كنت بالجا لحلول تانية مالهاش اى نتيجة ايجابية .
كانت دايما يارب تيارات الخطية واخدانى بعيد عنك ونسيت حبك الكبير ليا . دة انت يارب علشانى قبلت الصلب والعذاب وبالرغم من كدة انا برضه ببعد عنك يوم بعد يوم وبدخل نفسى فى السجن اللى انت طلعتنى منه .
اااااه يارب قد ايه انا مكسوفة منك قوى سبتك بعد كل الحب دة ومشيت ورا شهوات العالم الفانى وكنت مبسوطة بيها لكن فى لحظة اكتشفت انى كنت بخدع نفسى وبضحك عليها.
حاولت كتير اقرب منك لكن فى كل مرة الشيطان باغراءاته بيسحبنى لورا بعيد عنك وانا كن بضعف قدام الاغراءات دى لكنى كنت بشوف دموعك بتسيل من اجلى واندم واحاول ارجع وفى كل مرة اضعف وابعد عنك تانى لحد ما قلبى تاه وهمومى زادت والسلام هرب من حياتى وعشت ايامى كلها فى وجع وانين وصراخ لغاية ما قلت انا خلاص تعبت ومش قادرة.
عايزاك تضمنى وبحنانك وعطفك تحسنى وبقلبك الكبير تسامحنى ارجوك يارب