نسيت أكون إنسان
قالوا لي أنت راجل...عيب ما تبكيش
لازم تبقى غول عشان تعرف تعيش
ادفن وخبي ضعفك
خلى حزنك في قلبك
أوعى تبان جبان
عملت زى ما قالوا
ونسيت أكون إنسان
قالوا لي: خليك جامد، خليك جدع
أوعى تقول آه مهما زاد الوجع
اخشن إسترجل
لو تبان ضعيف هتتبهدل
دى دنيا ذئاب وحيتان
عملت زى ما قالوا
ونسيت أكون إنسان
قالوا لي: مهما تتعب إتحمل أوعى تنخ
ولا تحكى مرة لصديق ولا تشكى في يوم لأخ
إنسى الحزن وخليك سعيد
بان قدام الناس حديد
دى ناس غداره ومالهاش أمان
عملت زى ما قالوا
ونسيت أكون إنسان
قالوا لي: بلاش تحب ولا تحكى عن مشاعرك
تعمل به إيه الحب! مش هتلاقى حد فاهمك
أشطب ع الحب أشطب
دارى إحساسك وإكدب
دى قلوب ما فيهاش حنان
عملت زى ما قالوا
ونسيت أكون إنسان
جاني صوت يقوللى: إضحك إبكى إفرح قضيها
دى الدنيا تستاهل تتعاش والناس أحلى ما فيها
كون نفسك ما تكونش إللى عاجبهم
لو فيه ناس صعبه هتلاقى حلوين غيرهم
ده بالحب قلبك يكون دفيان
ونسيت اللى يوم قالوه
ومن اليوم هكون إنسان