[Dr.PeRO]

+ الحب بالنسبالى هو الحياة نفسها، الحد اللى بحبه بيبقى شاغل معظم تفكيري فى أغلب الأوقات، ومش بدور على حب تانى عشان من الآخر شبعت ... مش عارف انتوا فهمتوا قصدي ولا لأ .. انا أقصد انى بحب يســـــــــــــــــوع ومن الآخر كده محدش عارف يملا عينيا غيره !! وأقصد البنات عشان انا عارف كويس ان سن الشباب لما بينوى يحب بيركز على الجنس الآخر وبينسي ان الحب الحقيقي اللى بدون خيانة وبدون مصلحه وبدون فتور موجود عند الخالق بس .. طب ردوا انتوا عليا ازاى أحب المخلوقات وأكتب فيها شعر وأتأمل فيها وأتجاهل حب الخالق نفسه!! لا المنطق ولا الحكمة ولا الواقع ولا الدين بيقول كده .. حب الخالق أولا من كل قلبك وبعدين حب فى المخلوقات زى ما انت عايز
+ أكتر صفة بحبها فى شخصية يسوع هى الحنان، وبعتبر ان الحنان هى إحدى وسائل تطبيق المحبة، والله محبة، عشان كده مش هاينفع ألاقى أحن منه .. انا منكرش انى احيانا كتييييير بزعله وبجرحه بس لازم برجع أصالحه عشان لما بخسره بحس انى خسرت كل حاجة فجأة من إيدي
+ بحب جدااااااااا الرهبان وطريق الرهبنة نفسه، والقديسين اللى بتشفع بيهم هما كانوا افضل رهبان فى الجيل المعاصر، أقصد تماف إيريني، والبابا كيرلس، وتماف كانت عملت معايا معجزة شفاء وكتبتها من فترة قريبة فى قسم المعجزات هنا فى المنتدى.
+ أما عن أحلامى، فى حلم يخص الحياة المستقبلية وده معلش هاخليه حاجة خاصة مش هاذكرها عشان هى بعيداً تماما عن الطب، لأنى مش هاكمل في مجال الطب إلا بسيط، بس فيه حلم تانى نفسي أحققه وهو انى أخرج فيلم ديني عملاق بيتكلم عن فترة القداسة اللى فيها اتجمع البابا كيرلس وتماف إيريني والبابا شنودة وأبونا يسطس الأنطونى وأبرز مدى علاقتهم الوطيدة بالشهيدين مارمينا وأبوسيفين .. بس هو مش مجرد انه فيلم لأ، حلمى انه يبقى حاجة وهمية ويشوفوه كل الناس بدل الأفلام الدينية الضعيفة اللى بنشوفها (طبعا مش كلها فى منها كويس، بس مفيش منها ممتاز)
آسف على الإطالة، بكره ان شاء الله هاحط لينكات لبعض الحاجات اللى عملتها (اقصد الهوايات) وأحب ابقى اسمع رأيكوا فيها.