[Narmar]

ايمون رد عليكي بالرد الصحيح والمقنع من الكتب
لكن ليا تعليق بسيط على ردك التاني ...

تعالي شوف كل شويه خادمه تقولنا لا غلط ماتقريش الانجيل وانتي عندك ظروف او التانيه تقولي ماتدخليش الكنيسه وترد عليها التانيه تقولها تدخل بس مش تعد قدام الهيكل

احدي سلبيات الخدمة ان الخادم بيروح يخدم دون دراسة ولما بيجي حاجة هو مش عارف او مش قاري عنها بيقول اللي سمعة بس ويحرم ويقول انه حرام ومش حرام مع العلم انه مفيش في العهد الجديد كلمة حرام دي خالص مفيش غير يليق ولا يليق
وعاوز اثبتلك حاجة بالنسبة للتناول انها طقسيات كنسية مش اكتر ليها احترامها
المسيح وتلاميذة كانوا بيعملوا اية قبل اما يكسر الخبز ويشربوا من الكأس ؟
الاجابة انهم كانوا بياكلوا قبلها ودة يعرفنا ان كل دي طقسيات كنسية اتطورت كمان مع الزمن واصبحت عادات للاسف مش احساسيات
مثال مثلا الصيام بلاقي ناس كتيرة تقول دة صيامي ودة فطاري وانا منهم بصراحة وحتي اللحمة بقت صيامي بفول الصويا دلوقتي
اللي عاوز اوصلة من الكلام دة كله اية ان فعلا خرجنا عن النطاق الابائي والكنسي بقلة القراية
انصحك اقري كتير ولكن مش في اي حاجة وخلاص او لاي حد وخلاص

والمصيبه بقي اني سمعت من اب كاهن في اجتماع الشابات من كام يوم بيقول ان حتي الهدوم والتوك واي حاجه وكل حاجه بنستخدمها في الفتره دي مانلبسهاش في التناول تخيل حضرتك انا كبنت بسمع الكلام ده هااقول ايه ومن اب كاهن

طيب هل يعقل دة ؟ انه حاجات اساسا مش كانت موجودة زمان لسة موجودة من سنين قريبة زي التوك مثلا يتقال عليها كدة
صدقيني الطقسيات الكنسية لما اتحطت كنوع من التقديس للأسرار المقدسة وللاسف مع الزمن اتطورت تطور غريب وبقت عادات وتقاليد وليس طقسيات وهنا بيجي دور الوعي الشخص المثقف زي استاذ ايمن كدة والشخص اللي حافظ كلام سمعة وخلاص بدون اي توثيق !
حاجات غريبة بأمانة بجد لو ركزنا فيها هنلاقي اننا بنعمل حاجات كتيرة غلط من غير ما نحس فعلا بسبب البعد عن الاساسيات وامسكنا بالفرعيات تركنا بركات الاسرار المقدسة ومسكنا في ازاي نتهيأ ليها اكتر ما بنتكلم عن بركة الاسرار نفسها ,
اما بالنسبة لانة اب كاهن اللي قالك كدة فمش تستغربي مش كل الاباء الكهنة قاريين وواعين وعارفين في ناس كانوا خدام فقط وكانوا اكليريكين والزمن خلاهم اباء كهنة , بصراحة انا بحس ان العصر دة هو اللي بيتحقق فيه نبوة يوحنا الحبيب في سفر الرؤيا عن النجوم اللي سقطط المقصود بيهم المعلمين .

طبعا انا حسيت اني اما البنات حاجه وحشه اوي كده ليه ربنا خلقنا وليه خلانا مختلفين عن الاولاد وليه احنا لينا ايام نبقي كل البعد ده عن الكنيسه والاسرار المقدسه واخويا لا مش كده حسيت ان ربنا اداه امتيازات كتير عني بس لانه ولد

الله لا يفرق بين احد
ولا في الجنس ولا اللون والعرق ولا اي حاجة ابداً اللي عمل الفروق دي الانسان
الفرق البيولوجي مش بيمثل عقبة زية زي اي اختلاف هقولك مثال يعني اختلافي انا مثلا معاكي في الطبع او في الرأي هل دة بسبب الله ؟ انه خلقني انا مثلا غبي وانتي ذكية ؟ هل ربنا كدة ميز بينك وبيني ؟
لكن هي نفس الفكرة في موضوع النوعية وفي بنات بسمعها تقول انه حد مننا الحرية ومش حرين زي الاولاد وطبعا الكلام دة مش مظبوط لان الله ادي الحرية للانسان منذ بداية الخليقة وحواء كانت حرة وهي اللي بدأت في الخطية واكلت من الثمرة , لكن الفكرة في المجتمعات والعادات والتقاليد الشرقية هي اللي بتعمل الحد دة
ونفس الفكرة في اي شئ تحسي فية بتفرقة صدقيني التفرقة دي من صنع البشر والتبريرات اللي مش ليها لازمة في التفرقة
الله خلق الانسان نوعين وخلقة عروق كتيرة والوان كتيرة وطباع كتيرة وحاجات كتيرة ودة من روائع جمال الله الخالق القدوس
اسف لو طولت عليكي بس بجد الكلام فعلا اللي بتقولية في الرد دة خطير للاسف انه يخرج من خدام ...
ربنا معاكي ويبارك حياتك وصلي لربنا دايما وهو اللي هيرشدك وانصحك بالقراءة كتير