[لؤلؤة الصعيد]

بسم الاب والابن والروح القدس اله واحد امين

اعطتةالعذراء لأمة وقالت لها خذى نيقولاوس نسل صالح

تقول السيدة / راعوث انامتزوجة منذ 20 سنة ولم ارزق الا بخمس بنات وبطنى شالت تسع اولاد لكنى لم ارى واحدمنهم فكان كل ولد احمل بيه قبل ولادتة يموت فى بطنى ولم يعش لى سوى البنات وكنت دائماً اذا حملت وتمت شهورى التسعة بسلام اعلم انها بنت

وانا اصلاً من الصعيد وكانت مشكلتى مع زوجى واهلة هذا الموضوع ياما عيرونى وذلونى بسب عدم انجاب الولد
اناكنت عايشة فى نار وكانو يقولولى انتى مبتخلفيش غير البنات كانت ام زوجى تحرض زوجى عليا وكنت اسمع المعايرة حتى من اقرب الناس ليا وفى مرة ذهبت الى مزار الانبا ونس الاقصرى لان المزار قريب جداً من بلدتنا وكنت وقتها زعلانة مع زوجى روحت ابكى واتشفع روحت اصرخ وابكى ونمت جنب المزار حوالى خمس دقايق وشعرت ساعتها وكأن مشرط يقطع فى اسفل بطنى وبعدها غادرت المزار وذهبت الى كنيسة السيدة العذراء بالاقصر ومسكت ستر الهيكل وحطيتة على بطنى وقلتلها بيعيرونى ياعدرا بيذلونى شبعت ومش قادرة استحمل تانى دة يرضيكى يعنى وفى الليل حصل مالم يخطر ببالى رأيت وانا بين نايمة وصاحية السيدة البتول تقف على باب الهيكل هى وكاهن كنيستنا والكاهن مازال فى الجسد وهو رجل تشهد لة الناس بالبر والقداسة رأيتهما يقفون على باب الهيكل والعدرا تحمل طفل على يدها واعطته لى وقالت خدية دا ليكى نظرت الى الطفل فعرفت انة ولد قلت ليها انا ممعيش اولاد قالت لادا ليكى خدية دة نيقولاوس دا حيكون نسل صالح خدية اخدتة منها بس كان عمال يبكى قلتلها مش راضى يسكت قالتلى شايفة صورت المسيح الى هناك دى وكانت بتشاور عليها قلتلها ايوة شيفاها قالت روحى واوقفى بية هناك وهو حيسكت روحت وقفت والطفل بطل بكية وانا طالعة من باب الكنيسة نادت عليا وقالت زى ما اخدية من هنا تيجى تعمدية هنا وشاورت على المعمودية الموجودة فى الكنيسة قلت ليها حاضر وقالت لى كمان محدش يعرف انك حامل خالص غير زوجك قلت حاضر وانا خلا ص طالعة سمعت صوت ابونا بيقولى اوعى تنسى اسم نيقولاوس واستيقظت من الحلم وحكيت الحلم لزوجى ولم يصدقنى وخاصة انى كنت لسة محملتش بية مرت الايام ومرت الشهور وقرب ميعاد الولادة ولم يعرف احد حتى بناتى ولم تظهر لى بطن الحمل ولكن قبل الولادة حصلت مشكلة مع زوجى بسبب الحمل لانة قال مادام الحمل كمل تبقى بنت بلا العدرا قلتلك دة ولد
و حصلت مشاكل علم بيها الاب الكاهن بتاع كنيستنا اللى كان فى الحلم مع العدرا وعرف انى حامل وقال لزوجى متخافش انا حاسمى المولود وقال انا حاسمية رويس قمت قيلالو انت نسيت اسم الحلم ولااية يابونا راح قال نيقولاوس وسابنا ومشى
وقبل ولاتى بشهر ضربنى زوجى على بطنى علشان الطفل ينزل كان يضربنى ضرب الموت لكن الطفل لم يحدث له شىء وجاء ميعاد الولادة التى لم ارى زيها ولادة
تعثرت فيها جداً و المية اللى بتحمى الطفل فى بطنى اتصفت قبل الولادة بيوم واخدت يومين وانا بموت فى ولادتة والدكتور قال خلا ص مية الطفل اتصفت وحيموت بس انا حفتحلك قيصرية علشان نطلعة من بطنك وكانت المفاجأة ان الطفل مازال حى ومكان المشرط اللى حسيت بيه فى مزار الانبا ونس كان مكان المشرط بتاع الدكتور اللى فتحلى بيه هو المكان نفسة
وولدت وجبت نيقولاوس الذى اعطتة لى العذراء قبل ان يكون فى بطنى ولما كان الاسم صعب جدا قلنا نغير الاسم ونسمى عادل قبل تكملة الكلمة جات للطفل الصفرة بنسبة عالية جدا وتم عرضة على طبيب ونظراً لخطورة الحالة قال لينا مترحوش بية المستشفى العام والحقوة وروحو بيه الدولى بتاعت الاقصر روحنا بيه وشخصت الدكتورة وقالت الصفرة جيالة بنسبة مرتفعة وحتطلع على المخ وتعملة تخلف عقلى حجزوة سبع ايام فى الدولى وهو بين الحياء والموت وانا ابكى على ابنى اللى مختوش فى حضنى غير يومين اتنين بس كنت ابكى علية وكل يوم اروح ازورة فى الدولى وانا جرحى بينزف العملية بتعتى لسة مفتوحة وكنت اخرج من المستشفى اروح مزار الانبا ونس واقعد عند المزار ابكى واتشفع وكان الخدام يشوفونى ويصعب عليهم حالى مش قادرة اقف بيسندونى وانا ماسكة بطنى ومحدش عارف ان كنت ببكى على ولدى ولا من ألالام العملية اللى الدكتور قال لى ترتاحى شهر علشان الجرح يلم وانا مختش يومين وطلعت اجرى اشوف ولدى الوحيد اللى جالى بعد شوقة
وكان دايماً الخادم يقولى متخفيش العدرا مبتخدتش اللى بتدية والانبا ونس حيشفية ولما يخف بشافعة الانبا ونس تجبية نصورة على المزارهنا واعطانى الخادم كيس زيت وقلى ادهنى منة الحضانة بس اوعى حد يشوفك
سبع ايام وانا على الحل دة وفى يوم وانا قاعدة فى البييت وببكى قدام صورة الشهيد ابانوب والانبا مكاريوس اسقف قنا حلمت باليل ان الانبا ونس والشهيد ابانوب والانبا مكاريوس داخلين الدولى ومشين فى اتجاة الحضانة لكن مكلمونيش خالص وفى الصبح وانا راحة المستشفى اتصل بينا الاب الكاهن وردت علية بنتى بيسألها على حالتى قالتلة تعبانة ومش راضية تبطل باكية قال قوليلها متخافش حتروح تلاقية خف ورحنا المستشفى لاقينا الدكتورة بتقلى ولدك امبارح كانت حالتة زى ماهية وفى الليل كنا بنطمن علية لقينا الصفرا راحت منة خالص فجأة كدة وطلعناه من الحضانة ويومين نقاها كدة وتخدية وانا رحت بعد كدة المزار وانا قلبى بيرقص من الفرحة وبعد يومين رحت بية المزار وصورناه على المزاروعمدتة فى يوم عيد العدرا اللى فات سنة 2008 ودلوقت نيقولاوس عندة سنة وعمال ابن العدرا يكبر قدامى شكراً للام الحنونة شكراً على هديتها اللى كل ما ابص فى وجهة اشوف حنان العدرا وفضلها عليا انا لو قدمت عمرى للعدرا مش حوفى ليها حقها

ملحوظة القصة بجميع احداثه حقيقية ومسجلة فى سجل المعجزات فى المزار وتوجد صورة الطفل فى مزار الانبا ونس بالاقصر على الحائط لكى يروها الزوار ومكتوب على الصورة
اعطتة العدرا لأمة هدية وقالت لها خذى نيقولاوس نسل صالح
الصورة موجودة حتى الأن
عظيمة هى محبة الله وحنية العدرا بصراحة مش لاقية كلام اقولة بعد كلام ام الطفل

المصدر: †† ارثوذكس †† - من قسم: معجزات القديسين والقديسات