تسمحلي أضحك عليك و أخليك تعمل اللى بقولك عليه و متنفذش كلام اللى بيحبك رغم إن كلامي هيضرك
تسمحلي أخليك تضيع فلوسك و صحتك على حاجه ملهاش لزوم
تسمحلي أخليك تتعب أعصابك و تتمنى اللى مش في ايديك و ممكن تغلط غلط
كبير قوي بسبب نظرة تنظرها لحد تاني
تسمحلي أخليك تبطل تعمل الحاجه اللى بتصفي روحك و تقربك من اللى بيحبك
تسمحلي أخليك رخيـص قوي و كل من هب
ودب ينهش فيك و انت بيتهيألك إنك جميل قوى
تسمحلي اخليك بدل ما تسكن فيلا جميله تسكن تحت اي كوبري
ها .. ها .. قلت ايه ؟
يا ترى هتسمحلي بكل ده ؟
ايه ده !!! بتقول مش موافق .. و بتقول عليا مجنون كمان
طيب استنى استنى أنا مش مجنون اصل انت سمحت لحد تاني بكل ده و أنا قلت يمكن
تسمحلي انا كمان مع ان الحد التاني ده عدو ليك و ليا و انا اقربلك منه بكتير
عارف مين هو ؟....... ايه مش عارفه
لأ انت عارف بس مش واخد بالك
اقولك اسمه
كل الناس عارفه اسمه
حتى الاطفال الصغيرين
إسمه
الشيطاااااااااان
طيب مش أنا اولى بيك من الشيطان طيب لو انت مش هتسمحلي بكل ده يبقى ليه تسمح للشيطان انه يعمل معاك كده
ايه ؟ .... بتقول ايه ؟ ...
بتقول انك مسمحتش للشيطان بكل ده
لالالالالا انت سمحتله بس انت ناسي وانا
هفكرك
لما تبعد عن ربنا و تسمع كلام الشيطان يبقى سمحتله يضحك عليك و يخليك تعمل اللى بيقولك عليه و متنفذش كلام ربنا اللى بيحبك لما تشتري بفلوسك سجاير تضر بيها صحتك يبقى سمحتله يخليك تضيع فلوسك و صحتك على حاجه ملهاش لزوم لما تنظر نظرات غير طاهره يبقى سمحتله يخليك تتعب أعصابك
و تتمنى اللى مش في ايديك و ممكن تغلط غلط كبير قوي بسبب النظرة دي
لما ماتصليش يبقى سمحتله يخليك تبطل تعمل الحاجه اللى بتصفي روحك و تقربك من ربنا اللى بيحبك
لما تلبسي لبس مغري يبقى سمحتيله يخلي كل من هب و دب ينظر ليكى نظرة بطالة
و انتي بيتهيألك إنك جميله أوى
لما تكتر خطاياك و استسلامك لوسوسة الشيطان وتبعد عن ربنا و تقرب من الجحيم يبقى سمحتله يخليك بدل ما تسكن فيلا جميله تسكن تحت اي كوبري
راجع نفسك .. راجعي نفسِك
عرفت بقى انى مش مجنون لما طلبت منك كده
عرفت ان انت اللى مجنون لو كنت بتسمح للشيطان بكده لو كنت وافقت ع اللى طلبته منك يبقى مش هلومك لما تسمع كلام الشيطان
لكن لا الفطره ولا العقل ولا المنطق ولا الاخلاق ولا كلام ربنا يوافق على الكلام ده
يبقى لاااااااااازم ............
لازم تراجع نفسك و تبعد الشيطان عنك وتدخل الى حظيره الخراف عند ابوك السماى اللى بيخاف عليك.
أذكرونى فى صلواتكم