[emmmy]

عزيزى صاحب المشكلة انا مقدرة مشاعرك الجميلة والحب اجمل شئ فى الوجود واحنا كلنا مرينا بالمرحلة دى
بس ممكن اسالك سؤال تعالى الاول ناخدها براحة كدة واحدة واحدة ومن غير انفعال عاطفى نتكلم الاول بالعقل اية رايك اعتبرنى اختك وبفكر معاك وبساعدك على انك تشوف الامور صح انت داخل دايرة المشكلة علشان كدة مش شايف كل حاجة انا براها وشايفةكل حاجة
دلوقتى انت بتقول انك لسة طالب طيب يعنى قدامك تكمل دراستك وتاخد شهادتك علشان تعرف تشتغل وخصوصا فى الايام الصعبة دى محدش بيلاقى شغل كويس الا اذا كان معاة شهادة عالية
وبعد ما تخلص تفتكر خلاص كدة ابدا لسة شوية كمان
هيقوللك لازم الجيش ياخدلة هو كمان بتاع سنة ولا حاجة
ياترى فى حاجة تانى ولا خلاص -- صدقنى لسة فاضل تلاقى شغل وتثبت فية وتقف على ارض صلبة وتبقى ضامن انك صاحب مهية شهرية او حتى مشروع او او او الخ
كل دة لو جمعتوا مع بعض فى الاخر هيطلعوا اد اية يا عزيزى مش اقل من 5 سنين لو فرضنا انك فى سنة تانية مثلا دا على الاقل خالص
قولى بقى هتفضل خمس سنين على الاقل مرتبط بيها الانسانة دى --- صعب جدا هتلاقى مليون مانع ومانع يقابلك كلام الناس زى ما انت قلت والعقل والمنطق والاهل
عارف على كل دة صدقنى مشاعرك دى مش حب حقيقى
الحب مسئولية واحساس بالاخر وخوف علية الحب مش كلام جميل ومشاعر حلوة بنقضيها مع بعض وخلاص الحب اكبر من كدة انا مش معترضة على مشاعر جميلة تتولد بين الحبيب والحبيبة بس يبقى على اساس صح وبالعقل مش بس بالقلب
طيب اقولك على حاجة تانية اقعقد فترة كدة شوية ايام متكلمهاش خالص ولا تشوفها خالص ولا تسلم عليها لو شفتها صدفة وشوف نفسك هتلاقى انك لسة بتفكر فيها ولانستها بس على شرط فى الفترة دى هتتعامل مع الحياة عادى وتذاكر وتاكل وتشرب هتلاقى نفسك بتلقائية وبسهولة نسيتها لوحدك دا فى حالة لو ساعدت نفسك بصدق

حاول تفكر فى الموضوع بمنطقية هتلاقى انك شاب كويس محتاج بس صبر يحقق هدف ونجاح وبعدين يكملها بالحب والاستقرار
ربنا معاك ويدبر حياتك وينور طريقك اطلب من المسيح يكون دايما رفيقك فى كل خطوات حياتك
الرب معك