رد: محتاجة مساعدة ارجوكم بس من حد عنده خبرة
كُتب : [ 06-24-2009
- 01:56 PM
]
أختي الحبيبة
معني إنك يبقي مش عاجبك اللي إنتي بتعملية وتكوني من جواكي رفضاه دي حاجة كويسة وبتدل علي إنك بنت طاهرة وضميرك صاحي ومتيقظ لأي حاجة وحشة وعمال ينبهك للغلط ويقولك كفاية كدة لا تدنسي روح الله القدوس الساكن فيكي وعلي فكرة إنتي أفضل من ناس كتير ضميرها خلاص مات بعد ما حاول كتيير ومالاقاش أي نتيجه
لكن المهم إنك لازم ترجعي في حضن أبوكي السماوي رب المجد يسوع المسيح اللي بيحبك وواقف منتظر رجوعك وفاتحلك حضنه ومستنيكي ومش عارف إنتي منتظرة إيه !!! ومش عايزة تيجي ليه !!! هو اللي هيحررك من أي عبودية للخطية فقط منتظرك ترجعي وتقولي له أخطأت سامحني ، وهو هيسامحك علي طول لأنه أبوكي وإنت بنته حبيبه قلبه
هو يعني الطفل لما بيوسخ نفسه ... باباه ومامته مش بيجوا ينظفوا ، ولو رجع تاني بينظفوه تاني وتالت ورابع وطول العمر
أنا رأي إنك دلوقتي تقومي تعتذري لربنا وتقولي له سامحني وتنزلي تعترفي في أقرب وقت وماترجعيش تاني للحاجات الوحشة دي
بس خلي بالك من حاجة مهمة جداً إذا إنتي تماديتي في اللي إنتي بتعمليه هيحصل الآتي :
1 . الضمير هيفضل يبكت فيكي ويصرخ علشان ينجيكي لكن لو ضميرك مات وده اللي هيحصل بعد فتره هتيأسي جداً ومش هتلاقي حاجه جواكي بتنبهك لعدم الخطأ وهتشعري إن ربنا سابك وإنك لوحدك
2 . الموضوع ده ممكن يسيطر عليكي ويتحول إلي عاده شريرة مش هتقدري تبطليها إلا بعد عذاب .
3 . ماتضحكيش علي نفسك وتقولي إن الأفكار اللي بتجيلك وإنتي نايمة بليل بتيجي لوحدها دا نتيجة تخزين العقل الباطن لكل اللي بتشوفيه في النهار .
4 . الشيطان ممكن يفقدك متعة العلاقة الجنسية المقدسة في الزواج في إنك تتفرجي علي حاجات شريرة لأن ما هي المتعة والسعاده والقداسة اللي هتجديها بعد لما تتفرجي علي العلاقة الجنسية في الأفلام ، هتيجي لما تتزوجي مش هتشعري بأي متعة لأنك جربتي متعتها في خيالك ، وكمان الشيطان هيجذبك نحو طريق العادة السرية المميته والتي تشبه في قوتها الإدمان وتصبحي زي البنات اللي بتتفرجي عليهم في النت تماماً دون أدني إختلاف .
5 . كل صورة أو منظر حضرتك بتشوفيه بيتخزن رصيد في خيالك والشيطان بيعملك أرشيف في خيالك وأول مايلاقي إنك وقفتي تصلي يبدأ يجيب من الأرشيف ويفكرك بالمناظر المثيرة اللي حضرتك إتفرجتي عليها وممكن وإنتي في الكنيسة تجيلك الأفكار وفي القداس ماإنتي عندك رصيد الشيطان متحكم فيه .
أرجوكي إشتري نفسك وروحي لأب إعترافك وإركعي أمامه وإحكي له علي كل الحاجات دي وهو هيعرفك الطريق الصحيح
إنتي بنت المسيح وروح اللي ساكن فيكي وإنتي طاهرة وجميله ونقية وليكي مكان في الفردوس ربنا مخصصة ليكي ، بلاش تفرطي فيه علشان شهوة رديه وشوية إستمتاع هيزولوا في خلال ثواني وبعد كده يستلمك شيطان اليأس في إنك ماليكش رجاء و... و... و... .
ربنا معاكي وأنا آسف إني طولت عليكي
ماجد
|