انت ليه قاعد دلوقتى وانت مزعله منك ؟؟
ليه لسه فى خطية متسلطة عليك ؟؟ ليه لسه فيه حواجز بينك وبينه ؟؟ انت فاكره مش شايفك كويس ؟! انت فاكره قاعد فوق بس وبيبص عليك من بعيد؟؟ الحقيقة ان المسافة اللى بينك وبينه دلوقتى هى أقرب من المسافة اللى بين جسدك وروحك!!
هتهرب تروح فين؟ الكتاب بيقول: أين أذهب من روحك ومن وجهك أين أهرب (مز139) .. مش هاتقدر تهرب منه وانت على الارض أو بعد موتك ..
ارفع ايدك دلوقتى واصرخ للسما بقلبك وقوله انا آسف ..
انا آسف .. قوله ألمس قلبي عشان هو اتحجر خلاص من كتر اللى بعمله
قوله ارحم ضعفى اللى اتغلب على ارادتى ..
قوله انا مش خاين ليك زى ما الملايكة كاتبه أمامك ..
قوله انا بحبك بجد مش كلام بس!!
قوله انا نفسي أجرى زى المرأة الخاطية وارتمى
تحت رجلك وأبكى بمرارة على كل خطية عملتها
ولسه بعملها!
اصرخ من جوه، مافيش غير دموعك هى اللى هايقبلها عشان
يغفرلك، خطية واحدة بس أجرتها موت، مابالك بخطايا
حياتك كلها ...
قوله انا عشت بعيد عنك كل اللى فات بس انا بقولك وعد
من قلبي انى هاعيشلك كل لحظة جاية من عمرى.. طول ما فيك
نفس يبقى لسه فيه أمل، بس مش كل لحظة هاتبقى زى التانية
مكانك فى السما ممكن يختلف
قوله يارب: أقوم الآن وارجع الى أبي
اجرى بقلبك عليه، اغسل كل نكران وتهاون وفتور ونجاسة وخطية بدموعك .. هو هايقدرها .. صدقنى هايجيلك مكانك و
هايتحنن عليك عشان هو أحن عليك من نفسك!
هيضمك فى حضنه ويشيل اتعابك وآلامك النفسية ويعطيك سلام
خاص مش ممكن اى مخلوق يعرف يديهولك
صدقنى مش هاتلاقى السعادة غير معاه، أسعد ناس هما اللى
لابدين فى الصحرا وسابوا العالم بكل صوره حتى اكلهم
وشربهم وجميع اهتماماتهم رموها وداسوا عليها، دول بياخدوا سعادة محدش يقدر يحس بيها، عشان هما اقرب ناس
من ربنا بجد .. هما اللى سامعين صوته عالطول
وانت ممكن تسمع صوته بس استغنى عن خطاياك الأول
وارمى اهتماماتك وخليها من رقم 2 وانت نازل، عشان
لازم تخلى رقم 1 لربنا لوحده
اسمع صوته دلوقتى قبل ما تسمع صوته فى وقت انت مش متوقعه ويقولك: ياغبي اليوم تؤخذ نفسك منك
فرصة ذهبية للتوبة عندك دلوقتى، متقولش بكره، متقولش لما اعترف ماتقولش كمان ساعة!! اصرخ دلوقتى قوله انا لست
مستحق أن أدعى لك ابناً .. قوله من دلوقتى مافيش خطية، من دلوقتى مافيش تهاون، قوله من دلوقتى انا ليك وانت ليا، ومافيش حاجة فى العالم هاتعرف تفرقنا ..
انت مش مخيل مدى حبه ليك، هو بيحبك اكتر ماانت بتحب نفسك، انت عارف انه هو اللى خلق الحب اصلا، انت تعرف انه أحن وارحم وألطف وأحب شخصية ممكن تشوفها فى حياتك!!
انت تعرف انك لو شوفته دلوقتى ولو من بعيد من غير مايكلمك ولا كلمة هاتنهار مكانك وهاتغطى وشك وهاتبكى بحرقة على كل لحظة انت مكنتش فيها ماشى فى طريقه!!
طب ليه مهو شايفك دلوقتى .. قبل ماتعمل اى شر افتكر كويس ان السما بتتفرج عليك كويس وبتراقب حلو اوى كل تصرف بل كل فكر فى عقلك، ارحم نفسك عشان هو يقدر يرحمك
كفاية كده ، كفاية حياتك القديمة .. كفاية جرح فى مشاعره كفاية اهانة بتتسبب فيها ليه بسبب خطاياك، انت اصلك مش عارف .. انت اصلك مش عارف ان الشياطين قاعده طول اليوم بتشتكى عليك قدام ربنا وبتطلب هلاكك .. هو صابر عليك بس لحد امتى .. مش هاينفع تستمر .. خليك شجاع وقوم وقول انا مش ضعيف عشان إيد الله معايا .. ارجوك كفاية، عاوز تعرف حياتك من غيره هاتبقى عامله ازاى، روح عالبوتاجاز، وحط إيدك عالنار وشوف هاتستحمل ولا لأ!! مابالك بحيرة النار والكبريت اللى هاتفضل فيها طوووول الأبد .. بدون نهاية .. بدون استراحة .. بدون رحمة .. كفاية كده اعمل وقفة لحياتك .. الحياة من حولك صعبة .. أديك شايف اللى بيحصل فى اليابان، ولا حتى من حولك هنا فى مصر .. ده لو زلزال واحد بس من بتوع اليابان جه هنا، مصر مش هايتبقى فيها طوبة على طوبة .. انتبه لنفسك كل امور الحياة مش هاتنفعك، مافيش حاجة هاتقدر تخش بيها الملكوت!! لا فلوسك ولا امتعتك ولاعربيتك ولاالبنت اللى بتحبها ولا هدومك ولا حتى أى حد من عيلتك هايبقى معاك .. ساعة الموت هاتروح لوحدك ... لوحدك قدام ربنا والسفر بتاع حياتك هايتفتح وكل اللى ماتبتش عنه هايتقال قصاد الكل ومافيش حاجة هاتستخبي
كل اللى عملته فى الضلمة هايطلع للنور، ليه تفضح نفسك، ليه تستكبر وتأجل ، هو انت ضامن الدقيقة اللى جاية هاتعيش ولا لأ !!!!