الحكم بلا رحمه
" لأن الحكم هو بلا رحمة لمن لم يعمل رحمة "
(يع 13:2)
أد أيه الأيه دى كلنا محتاجين نطبقها فى حياتنا ..
اد أيه بقف قدام الكلمه دى ( الرحمة ) وانا فى قمه الضعف والألم .
طبعاً كتابنا المقدس مليان بكتير من الأيات والمواقف والتنبيهات
اللى بتحسنا على عمل الرحمه وعلى تنفيذها..
تنفيذها بينا وبين بعض وتنفيذها فى كل مواقف حياتنا ..
بس الأيه دى بالأخص لأى أنسان يقراها بقلبه هاتفرق معاه
كتير اوى اوى" الحكم بلا رحمه لمن لم يعمل رحمه "
ربنا يسوع بيقولنا أرحموا أصنعوا رحمه خليكوا رحماء..
_ _ _ _
مين انا ومين أنت علشان نوصل للمرحله دى ان ربنا يسوع
والكتاب المقدس والاباء الرسل يطالبونا بصنع الرحمه..
هل نحن جميعاً وصلنا لمرحله الحق فى اننا نعطى رحمه
شوفوا معايا أله الرحمه بيطلب مننا أيه ( اننا نرحم )
أله الرحمه بيترجانا بعمل الرحمه بينا
أله الرحمه اللى كلنا ليل ونهار بنقوله بدموعنا
أرحمنا يا الله كعظيم رحمتك
كلنا أباء وأمهات شباب وشبات اطفال .. الشعب كله
بكل مستوياته واعماره كلنا بنصرخ
يارب أرحم يارب أرحم
أد ايه بنكون محتاجين الرحمه من ربنا
اد ايه بتكون هى دى مطلبنا الاول والخير من ربنا
كلنا وأخدين الفريسى مثل وبنردد كلامه من كل قلوبنا
( اللهم أرحمنى انا الخاطى)
وبنشعر أد أيه أحنا ضعفاء ومحتاجين الرحمه
وبكل حنان ربنا يسوع بيسمعنا وبيقدر كويس اتاعبنا
وبيقدم لينا رحمته مع كل طلبه وفى كل ساعه وكل ثانيه
طيب وأحنا ... ؟؟
هل أحنا بنصنع رحمه من قلوبنا فعلاً
هل بنشعر بمن يحتاجون الرحمه من حولنا
بنشعر بكم الضيق والحزن والألم لكل أنسان معانا
محتاج لرحمه مننا حتى لو مش قادر ينطق او يطلب بنفسه الكلمه دى
يااااااااااا لعظمه ربنا يسوع ....
يااااااا لمحبته الفائقه الحدود ....
شوفوا محبه يسوع أد ايه بيقول لكل أنسانه كل انسان
بيقوله انا هاحطك مكانى
فى احساسك بالرحمه لكل انسان محتاجلها
ارحم كل من حولك
بيحسسنى وبيحسسك بالسلطه
والسلطه فى ايه فى الرحمه
السلطه فى طيبه القلب وعمق المغفره
شوفوا محبه يسوع وهو بيقولك
هاتشعر بكل تعبان بكل حزين بكل متألم هاتصنع الرحمه
مع الكل ومن قلبك
شوفوا محبه يسوع أزاى ...
وشوفوا أحنا بنعمل أيه ....
ونرجع تانى لنفس الأيه .." الحكم بلا رحمه لمن لم يعمل رحمه"
الأيه صريحه ومعلمنا يعقوب جابلنا حقيقه ومن الاخر بمنتهى المنطقيه
"بلا رحمه"
شوفوا أد ايه الكلمه مرعبه ومخيفه "بلا رحمه"
مين يقدر على الكلمه دى .. مين يقدر يتخيل نفسه فى الموقف ده
انه يتحاكم بلا رحمه انه يتعامل بلا رحمه
يبقى ايه مطلوب مننا ..؟؟
مطلوب قلوب رحيمه للكل. قلوب خاليه من اى مشاعر تانيه
مطلوب نقدم رحمه للكل . نرحم بجد
ربنا يسوع طلب منك ومنىّ نقدم رحمه نصنع رحمه
وعلى أد ما هاتقدم رحمتك لمن حولك هتلاقيها وزياده ..
(وانا وانت بنزيد فى قساوه قلب)
بنبعد عن الرحمه بكل طاقتنا
يعنى ومن الاخر ملهاش أى حلول تانيه ولا اى معادلات
أرحم من على الارض = هاتنول رحمه من أعلى السموات
أرحم:
التعبان . المتألم . المسكين . الحزين . المجروح . المنطوى
البعيد . القريب . الخايف . المجروح . المكسور. الوحيد
أرحم .. بقلبك بعقلك بضميرك بمشاعرك بلسانك بنظاراتك
أرحم بكل ما فيك قدم رحمه لكل اللى حواليك...
أسال نفسك وشوف انت أد ايه محتاج للرحمه من ربنا يسوع
وعلى اد تعبك ومقدار خطاياك واحتياجك الرهيب الوحيد للرحمه
أرحم انت كمان وقدم رحمه لكل اللى قدامك قدم رحمه من اعماق اعماق قلبك
ربنا يدينا رحمه من عنده ويرحمنا كلنا
ربى يسوع المسيح ....
يا نبع ومصدر وفيض الرحمات الالهيه
املك فى قلوبنا برحمتك واعطنا قوه من عمق محبتك
أسيرى فينا بينابيع أنهارك الحانيه
وابدل قلوبنا الحجريه بقلوب لحميه
ارحمنا يا الله واعطنا المقدره ان نرحم انفسنا
لك منا كل المجد والاكرام والعزه والسجود
--------------------------
معلش يا جماعه انا مش متخصص ولا دارس ولا حتى واعرف
اقول اى حاجه بس الموضوع ده انا اتكلمت فيه بمنتهى التلقائيه وكأنى بتكلم مع نفسى
يارب يكون مفيد