[كيرو رافت]

مره اسمعك واصلي لك
ومره انفر منك وماتكلمش معاك
وبرده لسه صابر عليا ماهو انت انت اليوم والامس وبكره
مره ارجعلك واتوب اليك
ومره ابعد عنك واسيب ايديك
وبرده لسه خايف عليا وبتناديني ماهو انت انت اليوم وامس وبكره

يااااااااااااه بجد يا ايمى على كلامك ده
موش عارف بجد ساعات بتقولى اللى بعجز انى اقوله او افكر فيه
قد ايه ربنا دايما بيحبنا وبيبقى عايز يضمنا انما احنا بغباوتنا بنجرى من قدامه وبنرفض حضنه
مع انه هو الامن والسلام الحب والحنان
ياما كتير ربنا بينده علينا لكن احنا ودانا موش معاه بنصمها اول ما ييجى يتكلم
ويااااااه على ودانا بتبقى فظيعه فى سماع الاغانى والافلام والنميمه
بنضيع عمرنا وبنهدر وقتنا مع موش عايز مننا غير جزء من وقتنا
معقوله دا كتير على ربنا اللى فدانا كلنا وعشانا مات وفدانا
معقوله ملك الملوك يترجى العبد المخلوق انه يحبه ويعبده
هو الدنيا ميزانها مقلوب ليه
هو مين المفروض يجرى على مين
مين اللى المفروض يتمنى رضا مين ربنا بيفرح لما خاطئ واحد بيتوب والسماء كمان كلها بتفرح
طيب ليه احنا موش فرحانين بوجود ربنا وعنه ملهيين
ليه موش بندى حق ربنا فينا من وقت ومال وجهد وفكر
ليه دايما ربنا فى اخر اهتماماتنا وساعات ما بنلاقيش ليه مكان فى اهتماماتنا
معقوله هى دى حياتنا معقوله يبقى ربنا ليه الجزء الاصغر من اهتماماتنا
بجد يا ايمى انا حزين على نفسى قبل الاخرين
نفسى بجد نفوق نفسى بجد نبص لفوق نفسى اكون لربى يسوع
نفسى يكون هو اول اهتماماتى ومعاه كل حياتى وبعد كدا هو بيدينى باقى الاهتمامات

موش قادر اتكلم او اقول لانى بجد مهموم وحزين على روحى وعلى حالى وعلى انى موش بدى لربى وقتى ولا مالى
ميرسى جدا جدا يا ايمى على موضوعك الحلو قوى ده وبشكرك بجد لانك دايما بتدينى فرصه انى اكون فى حوار وعتاب مع نفسى ومع الله