سلام ونعمة
انا اول مرة اشارك فى قسم ذى دة بخصوص الفضفضة وكنت كتير بتردد اكتب او احكى بس اللى شجعنى فعلا انى اكتب هى ارائكم وارشاداتكم وخاصة اراء استاذ ايمن
معلش سامحونى فى الاطالة عليكم فى الحكاية دى ومعلش محتاجة رايكم
اولا انا لما دخلت الخدمة جديد كنت متحمسة جدا جدا انى اشتغل وكان فية خادم معايا فى الخدمة ومنت حاسة انى مراقبة من نظراتة وكلامة فى كل شى اعملوا ولو كان فية طفل ضايقنى او هازعق فبة بيتولى هو المسئولية فحسيت ان فية حد متابعنى وقولت يمكن دة مع كل الخادمات وقولت عادى ولدرجة انى بقيت اتكسف اشرح قدامة ومعرفش لية
المهم عرفت فى مرة انة على علاقة بخادمة وانا فى الفترة دى مكنشى هاممنى بس لقبت نفسى بحب اتابع تحركاتة وعاوزة اعرف اية حكايتة معاها وبيعملوا اية وتصرفاتة ولدرجة انى كنت بحس بضيق وهو واقف معاها
وبعدين اتطورت الحاكية معايا واخد الايميل وكنا بنتكلم عادى جدا بس شوية شوية حست ان فية حاجة غريبة من ناحيتة ليا وانا بصراحة كنت بفرح بس مكنتش ببين دة او يمكن كان باين عليا فى تصرفاتى يمكن
المهم بحكى لابونا واقنعنى انى الغى الايميل ومليش دعوة بالشخص دة وهى دى اسطوانتة ومش اول مرة يقول كلام حلو لبنت وحكايات كدة عنة وانا فعلا نفذت الحاكية دى وحذفت الايميل
وفى الوقت اللى قررت فية انى اخلى تعاملى معاة خدام ةبس قبل ما اعمل اى حاجة لقيتة هو كمان بيعاملنى مرة واحدة وبدون مقدمات بنفس اللى الطريقة الل كنت هاكلمة بيها واستغربت جدا لان فجاة اتغيرت المعاملة
انا تعبت جدا جدا فى الفترة دى وبطلت اروح الخدمة مدة ولكن رجعت تانى لان الاطفال بحب اتعامل معاهم جدا
حاليا انا قلقانة لان كل شوية برجع وافكر فى الايام دى وبتمنى انى اشوف ابتسامة منوا من ايام زمان والفكر فية بين كل حين وحين بيجينى وكان فية واحد طلبنى للجواز وانا مكنتش بفكر فية غير اخ وبس لكن لما كنت افكر فى الانسان اللى عاوزاة كنت بفكر فى الخادم دة وعلشان كدة رفضت العريس لانى عاوزاة زى الخادم
واللى عجبنى فية شكلة ونشاطة فى الخدمة وكلامة وتعليقاتة على لبسى ومكياجى والاهتمام بيا
وخايفة من اختيار جوزى والحكاية دى تاثر على اختيارى
ثانيا انا عندى اخت اصغر منى واحلى منى فى الشكل لكن شخصية انا معجبة بشخصيتى كدة المهم ان ادام اختى احلى من واصغر منى يبق اكيد .....العرسان عليها هى مش انا ودى مسببالى صيق نفسى وحاسة انى عقبة قدامها وكمان تعليقات الاهل وخاصة من الناس اللى بتحبك بتزعلنى قوى لما تيجى ام وتقول هاتى زى لبس اختك الاصغر لانة احلى وانا لبسى بكون مقتنعة بية وشيك وحلو وعاجبنى بس مش عاجب البيت فلما اعترض بتكون خناقة ولما تتعود من صغرك ان اللبس الضيق والقصير غلط والمكياج الزايد غلط وفجاة كل دة يبقى متاح ليك لان مفيش حد بييجى غير لاختك الصغيرة تبقى مش عارف تعمل اية
تعمل اللى انت اتربيت واتعودت واخت التعليم دة من الصغر ولا تعمل اللى بقى الاهل عاوزينة
وفى مرة جالى عريسين كل مرة لازم انزل متشيكة والميكب مية مية ولازم لازم البس كعب علشان بس اعجب العريس مش هو اللى يعجبنى وخاصة لو العريس اول مرة يشوفنى وكانى عرض ازياء وفى الاخر ميرجعشى تانى لانة جاى على السيرة مشفنيش ولما شافنى معجبتوش فعلشان كدة بقى القصير والضيق والمكياج متاح اعمل اية فى احساسى انى غير مقبولة
ثالثا ومعلش للاطالة
من وانا فى اعدادى نفسى يكونلى اخ كبير يخاف عليا واحكى معاة على كل حاجة ويعاقبنى على اى شى غلط ودى اهم نقطة عاوزة اوصلهالكم انوا يعاقبنى على اى شى غلط
انا من طبعتى مش شقية ومش بعمل غلط كبير بس نفسى يكونلى اخ احكى معاة ويعاقبنى
وبتفرج على الافلام المسلسلات علشان اشوف اللقطة اللى فيها ولد بيزعق فى بنت او بيضربها وبنفذ الحوار اللى حصل فى اللقطة دى فى خيالى مع ناس من اللى حواليا بس فى خيالى وبصراحة لما اسرح واتخيل بحس بلذة وبحس انى مرتاحة
الاحساس دة فاضل معايا لغاية الان وانا فى الكلية ومش عارفة اخرتة اية معايا
ويمكن الرغبة اللى جوايا دى هى سبب فى انى بحب اتعامل مع الاولاد اكتر من البنات وعاوزة اعرف لية بحب الاحساس دة ولية انا مرتاحة وانا بفكر واتخيل كدة وسالت نفسى كتير ولاقية اجابة
فساعدونى ارجوكم فى المشاكل دى
مستنية ردودكم