كل شاب سابته حبيبته واتجوزت واحده معاه فلوس.. مش دايما هي بتكون ظالماك ساعات كتير قوي بتكون هي الضحية ومطلوب منها إنها تكون سعيدة كمان ؟
كل الشباب واخد فكره غلط عن كل البنات .. عادي ما هو ده العداء التقليدي بين الجنسين اللي بيخلي أي حاجه تحصل غلط كل واحد فيهم يرمي المسئولية علي التاني .
يعني مثلا أتنين من سن واحده في نفس الكلية وحبوا بعض .. أزاي متخيلين في الظروف الوحشة اللي إحنا فيها دي أنهم ممكن يتجوزوا بعض .. أزاي ؟ مش لازم الشاب يكوم نفسه قصدي يكون نفسه الأول في عشر سنين علي الأقل فين بقي البنت اللي ممكن تنتظره عشر سنين .ولو حبت هي تنتظر فين الأهل اللي ممكن يستحملوا ده ومايفضلوش يزنوا عليها .. :
" أنتي مش راضيه تتجوزي ليه ؟ .. أنتي إيه اللي مانعك عن الجواز ؟ ..أنتي مستنيه مين ؟ .. ما هو لو أنتي مستنيه حد قولي له يتقدم وإحنا نشوفه ؟ .. أنتي مش عايزه تتجوزي فلان ليه مع انه كويس وعنده شقه وشغال ؟."
زن.. زن.. زن..
ولما الأهل مايلاقوش فايده في الزن يبدأوا في الضغط :
" لا ماتخرجيش – طبعا لأنهم عارفين أنها بتخرج تقابل اللي مانعها من الجواز – ماتتكلميش في التليفون كتير.. "
ونظام قرف بقي..يعني م الأخر يقرفوها في عيشتها عشان توافق. ولما النظام ده يفشل هو كمان – وده بيعتمد علي مدي تمسكها بحبيبها يعني ممكن ما تفشلش وتستسلم – يبدأوا نظام تاني خالص نظام الذل :
" أنتي مش عايزه تتجوزي ليه ؟ .. أنتي خايفه من حاجه ؟ "
و نظام شك بقي :
" أنتي فيكي حاجه ؟ .. أنتي عملتي حاجه وخايفه تقوليلنا ؟ ..أوعي تكوني عملتيها زى ما بنشوف في الأفلام واتجوزتي عرفي .؟اصل هي دي الحالة الوحيدة اللي تخليكي ما توافقيش علي فلان "– فلان تاني غير الاولاني ما هو بين كل نظام والتاني عده اشهر أو عده سنوات حسب نظام الأهل نفسهم –
وهنا دائما البنت بتستسلم لان المسالة كده دخلت في الغميق خالص.وحتى لو هي فعلا عملتها واتجوزت عرفي برضه بتستسلم وتوافق علي الفلان اللي جاي ده وخلاص لان غالبا حبيبها ده مش قادر يفتح بيت ولا حاجه وأهله لسه بيصرفوا عليه ومش لاقي شغل ولا نيله وطبعا هي قبل ماتوافق بتلجأ لحبيبها ده .. وتقوله الكلام اللي كل شاب بيحسبه اسطوانة بتحفظها كل بنت وتسمعها لكل ولد :
" أنا رفضت كتير قبل كده والمرة دي مش قادرة ارفض ..أنا مش عارفه اعمل إيه .. أنت مش عارف هما في البيت عاملين فيا إيه .. أنا مش عارفه أقول لهم إيه المرة دي أنا مستنياك بقالي سنين وأنت ظروفك مش راضيه تتحسن اعمل إيه أهلي ضاغطين عليا ."
وأنت طبعا ماتصدقش الكلام ده وتفتكر إنها بتشتغلك وبتضغط عليك أنت كمان عشان تتجوزها.. لكن حقيقي هو ده اللي بيحصل معاها ومع كل بنت مصريه ماتقدرش تقاوم كتير مع أهلها.. وبعدين بالعقل كده حتى لو قاومت عشانك.. أنت بقي أخرك إيه ؟ علي ما تلاقي شغل .. وتحوش تمن الشبكة – فيه ناس مابتجيبش شبكه خالص لما يكون الأب عاقل وعارف إنهم بيحبوا بعض – وتمن حتتين العفش ومقدم الشقة اللي مش مهم تكون أربع أود كفاية أتنين ومن غير حمام كمان وإيجار الشقة دي وتمن الفرح والأكل والساقع.. دانت عايز لك علي الأقل خمتاشر تمناشر ألف جنيه ..طيب منين .. في حين إن فيه غيرك اكبر منك بالعشر سنين دول وخلاص كوم نفسه قصدي كون نفسه وراجع عنده المقدرة انه ياخد الشقة دي ويجيب العفش ده ويعزم المعازيم دول ويجيب الساقع ده وطبعا يتجوز البنت دي .. يبقي من الأول يا جماعه أي واحد عايز يحب .. يحترم نفسه ويحب بنت اصغر منه بعشر سنين .. يعني وهو في الجامعة ينشن كده علي واحده عندها اتناشر سنه ويقول بعد ما أتخرج واشتغل أحبها وارجع اخطبها – ولقد استخدمنا كلمه ارجع وراجع لان م الأخر اللي عايز يكوم نفسه في عشر سنين بس يبقي لازم يسافر لأي حته فيها أجانب يعني سواء في مصر أو بره مصر –
فياكل شاب.. ماتزعلش لو حبيبتك جت قالت لك الاسطوانة دي واعذرها وقول لها مبروك وهارد لك .
ويا كل فتاه ماتاخديش المسالة بحساسية لأنك متأكدة انه مفلس ومش ممكن حايقدر يتجوزك يبقي قاومي علي أد ماتقدري يمكن تحصل له معجزه وعمته اللي في البرازيل تموت ويورثها ولو ده ماحصلش خلاص هارد لك صحيح وأتجوزي واحد غير احمد يا مني .