النهارده ياجماعه عايزه اتكلم معاكو فى حاجه مهمه و تاعبه ناس كتير فى نفس الوقت وهى "الثقه بالنفس"
تلاقى دى مش بيعجبها جسمها ودى بتكره شخصيتها ودا مش لاقى اى ايجابيه فى حياته وبكده بنلاقى كتير مننا مش راضى عن نفسه وكل واحد بيتمنى انه يكون فى صوره مختلفه عن اللى هو عليها دلوقتى
عجبتنى مقوله لاحد الحكماء بتقول " مامن تعيس اكثر من الذى يتوق لان يكون شخصا اخر مختلفا عن شخصه جسدا او عقلا "
فجسمك او شخصيتك ماهى الا ذلك الكيان اللى حباك بيه ربنا دون سواك فكر كم من معاقين جسديا او عقليا اتحرموا من صحة البدن او العقل او النفس وانت شوف النعم اللى ادهالك ربنا من نفس وعقل وصحه وطاقات . واسال نفسك هل انت بتستغل الطاقات دى كويس علشان تشكل بيها حياتك ذى ما تحب ولا كل همك انك تبص للى بيمتلكه غيرك اللى انت شايف ان حظهم احسن منك ؟؟
اذا كنت لسه متردد فى اتخاذ خطوه ايجابيه فى الموضوع ده . خلى بالك ان فكرة الانسان عن نفسه بتحكم تصرفاته بشكل كبير بمعنى ان لو كانت فكرتك عن نفسك ايجابيه هتكون تصرفاتك ايجابيه اما لو كانت فكرتك عن نفسك سلبيه هتكون تصرفاتك سلبيه . دا غير ان تكرار الفكر السلبى عن النفس بيخليك تعيش فى حالة احباط ويأس من اى صلاح علشان كده لازم تنظر دايما للجانب الايجابى وتستغل الطاقه اللى جواك وتتقدم بيها للامام
فكل المطلوب منك انك " تقبل نفسك كما هى وتنسجم معاها "من خلال اتباع الخطوات اللى جايه :-
1- انك تلغى اى افكار سلبيه تيجى فى دماغك على طول ومش تنجرف وراها واستبدلها بافكار ايجابيه
يعنى مثلا بدل ما تقولى " انا تخنيه " تقولى "انا ذكيه وخفيفة الظل "
2- اتعرف على عيوبك لكن مفيش داعى انك تضخمها واتغلب عليها بالتدريج
3- اشغل نفسك بتحقيق اهداف ليها قيمه علشان تحس بالحماس وخاصة خدمة المحتاجين هيخليك تحس بسعاده وبفايدتك ليهم
4- بلاش تخفى شعورك بالضغط او التوتر لكن اعترف بحقيقة مشاعرك وانك مش قادر على مواجهتها واذا حسيت انك عايز تعيط مفيش مانع لان الدموع بتخفف الضغط النفسى
5- اتعلم الرضا بالواقع سواء كنتى جميله او قبيحه , غنى او فقير , مليان او رفيع . اكيد هتلاقى حاجات تحسسك انك مميز
افتكر دايما انك لو مرضيتش بالواقع هتقضى وقت طويل فى حالة احباط وتعيش احلام يقظه وخيال وبعد كل الوقت الضايع ده هترجع تانى للواقع وتلاقيه زى ماهو بدل من كده حاول انك تغير الواقع بالواقع نفسه لان اذا انا مش رضيت عن نفسى مش هلاقى حد يقبلنى او يساعدنى على التغيير وافتكر دايما انك الوحيد القادر على تلوين حياتك بالالوان اللى انت عايزها " الورديه او السوداويه " .......... اختار انت
ياريت اسمع ارائكو فى الموضوع ده