بتُستفز من المواصلات العامه؟
طب بتمر بمواقف إستغلال بتخليك تُستفز؟
حد إستفزك قبل كده؟
طب إنت بتستفز الناس لدرجة إنهم يغلطوا فيك؟!
ممكن تستخدم الأسلوب ده في حياتك ومعاملاتك؟
وإيه رأيك هل الكلام ده صح ولا غلط؟
إيه الحاجه اللي ممكن تخليك تُستفز؟
كلنا في حياتنا بتمر علينا مواقف بنُستفز فيها لدرجة تخلينا نغلط في اللي قدامنا أو نخرج كلام ممكن نرجع نندم عليه بعد كده.
غير بقي إن إحنا ممكن نكون سبب في إستفزاز بإسلوبنا، نستفز اللي قدامنا بكلامنا لدرجة تخلي اللي قدامنا ممكن يغلط فينا، ممكن نكون بنعمل كده مع والدينا أو أصحابنا أو حتي في الشارع مع الناس اللي مانعرفهومش، لكن سؤالي ليك إيه الهدف من إنك تعمل كده؟
الغريبه بقي إن الإستفزاز ده بقي نوع من حب الظهور غير إن جذوره أصلاً هي صغر نفس داخل الشخص بيحاول يداريه ويبين عكسه بإنه يستفز الناس، ويغلطهم حتي لو هما صح، لكن دايماً نحب نستفز الناس.
عايز أقولك لو إنت من الناس المُستفزه للناس حاول تكون بتغير من نفسك، وتعرف إن إنت لما تعمل كده الناس هاتنفر منك وهاتبعد عنك، لكن بقي لو أنت ياعيني الضحية اللي الناس بتستفزك في المواقف حاول تكون بتدرب نفسك إنك ماتغلطش فيهم وتتحكم في إنفعالات وتواجه الشخص ده بإنه بيضايقك، وتطلب منه أنه مايكونش بيستفزك عشان ماتتنرفز، وتكون بتخرج كلام مش صح.