كُتب : [ 09-08-2008 - 05:29 PM ]
لو الفلة فى المنفلة .. يبأه كل عام وانتم بخير ! الرجالة الأيام دى أصبحوا صيد ثمين يعنى علشان واحدة توقع راجل فى شباكها بتعمل البدع وبنات الجامعة مساكين فاكرين لما هما يشربوا اتنين كانز من عندالسوبر ماركت فى المنتزه أو يضربوا مع بعض اتنين فول من عند جاد فى محطة الرمل أو يمسك ايديها ويدخل بيها سينما ماتينه وسواريه انها خلاص حطت الوله فى دماغها يمكن دى صوره كلنا عشناها فى الكليات والمدارس وهيسنا .. نسيبنا من الصورة دى خمسة لانها موال تاني لوحدة .. وعاوز اركز على صورة تانية خالص هى صورة الافراح والخطوبات .. أى بنت دلوقت ما بتصدق انها تتعزم فى فرح ولا فى خطوبة تحس ان دى فرصتها التمام فى اصطياد عريس .. وتبدأ أنها تعد العدة والاسحلة الفتاكة اللى حتهجم بيها على الفرح علشان توقف الفرح على رجل واحدة .. أتذكر السنة اللى فاتت حضرت فرح بن عمي وكنت يومها متشيك وحاطط برفان يعنى بالعربى كالونيا ولانى طويل وعريض المنكعين مشرأب العضلات مفتوش المفتشين كنت مميز جدا فى الفرح والناس اللى مشفتهمش من سنين فجأة وبقدرة قادر يظهروا ويتلموا فى مكان واحد .. وفجأة الاقى اللى بيقول (( مش تيجى يا اكرم تسلم على طنط )) - طنط مين - يا وله انت مش فاكرني ده انا اللى شلتك وانت صغير -يا ااااااااااااااااااااااااا ااه يا طنط .. عاملة ايه عاش من شافك ، ده انا بقالى 10 سنين مشفتكيش - الدنيا تلاهي يا بنى ، مش تيجى تسلم على بنتى دى بأة عروسة زى القمر (( قولت فى نفسى اشطة هيا بدات كده)) - ماشاء الله يا طنط ربنا يخيلهالك المهم سحبتني وراها زى معتقلين جونتانامو وانا بفلفص منها وهى ابدا مش عاوزه تعتقنى ، لغاية ما تقعدنى معاهم على طرابيزة واحدة .. وتقعد تكلمنى عن بنتها ، وانها دارسة فلسفة وعلم نفس وفى سنة رابعة و...و...الخ (كنت بسمع بودان وودني التانية مع المغنى اللى بيغنى فى الفرح)) وفجأة طنط تقوم مش عارف تروح فين ، والاقى فجاة نفسى وش لوش كده مع الاخت بتاعة فلسفة وعلم نفس دي.. هيا البنت للامانة حلوة مش وحشة .. بس مش طالبة معايا فى الوقت ده أصل هيا مش ناقصة وجع قلب فعلشان كده التزمت الصمت.. وهى كمان التزمت الصمت .. بس العجيب انها كانت بتبصلى وتبحلق فيا بطريقة غريبة قولت فى نفسى (( يا نهار اسود ياكيروو دى بتاعت علم نفس وتلاقيها عمالة تحللك نفسيا دلوقت )) - كيروو أنت بتحب ايه من الألوان ؟ (( بصراحة كنت عاوز افطس من الضحك ايه الاسئلة اللى تجيب شلل خماسى دى وكمان فى فرح )) لاقت نفسى عامل زى اللى داخل قافية ، حسيت ان العملية متربسة خالص معايا - إشمعنى ؟ - لا ابدا عادي - عادي ازاي ؟ (شايف حتى ردودي كانت عاملة زى ردود واحد مبرشم ..مش بقالك كانت متربسة خالص ) - أصل يا كيروو فيه علاقة بين الالوان وعلم النفس ؟ - يا سلاااااام - مش مصدقنى .. طب انت بتحب انهى لون ؟ - أنا يا ستى بحب اللون الابيض ..! - يبأه انت بتحب الفرح والانطلاق . - فعلا ده حقيقى فى شخصيتى -أصل لكل لون من الألوان المتوفرة حولنا ارتباط نفسي و تأثير لا إرادي يدخل باللاشعور الداخلي - هاااااااااااااااااااااااا اااا . . وماله ... هيا طنط راحت فين ؟ - مش عارفه -طب انا رايح ادور عليها .. - اجى معاك - لا بلاش علشان الفلة ضربت فى المنفلة .. - هااااااااااااااااااااااا - كل عام وأنتم بخير . (( وسكت الديك عن الصياح .. وهرب الفتى الذكى اللماح .. وعرف أنها بنت معقدة رغم جمالها الوضاح .. و..و... كوكو كوكو كوكو ......)) كيرووووو المصدر: †† ارثوذكس †† - من قسم: الموضوعات الشبابية