انا كنت بعيد عن الحب وبقول مش عاوز اشوف اراضيه
قليل اللي كملوا قصتهم وللأسف محدش شكر فيه
هحكيلكم حاجه حصلت ومش مجرد كلام
حبيت وانا في الجامعه حب صادق ولا في الاحلام
لقيت نفسي بحبها جامد جدا وهي حبتني كمان
ابويا قالي ياواد انت لسه بتاخد مني المصروف
متبقاش عامل زي العبيط وتقف قدام اهلها وقفت كسوف
وهما بيقلولك بتشتغل ايه وانت محصلتش حتي خروف
قالي قدامك كليه وجيش وشغل عشان تبقي انسان
وساعتها تتقدم لأهلها ويبقي ليك كيان
ساعتها يوافقوا عليك وانت داخلهم بقلب مليان
قولتوا بحبها يابا حب كبير كبير
دي هي ملكت قلبي وملكت كل التفكير
قالي لو ليك اخت ترضالها بالعزاب
تخرج مع شاب منعرفوش من غير مايدق باب
يعشمها بحب وجواز وفي الاخر يرميها زي الكلاب
تقعد تندب بختها وتشيل الهم والنيله والهباب
الجلالة خدتني وقولتله لا يابا الكلام ده طبعا ميرضنيش
وقمت من قدام ابويا والدنيا سوده كأنها مدهونه ورنيش
قابلتها تاني يوم وصارحتها بكل اللي جوايا
قعدنا نبكي شوية وبدأت تفكر ويايا
قالتلي السكك مقفوله كلها لكن انت دوايا
واتفقنا نأجل قصتنا لحد مالعمليه تتحسن معايا
ودعنا بعض لحد ماتتحسن الظروف
قعدنا نبكي ومن كتر البكي ماعرفناش نشوف
اي امل تاني قدامنا وقلوبنا اتملت بالخوف
خلصت جامعه وجيش وجريت اكلمها من تاني
جوايا فرحه فظيعه هزتلي كل كياني
مش عارف اوصفلكم ساعتها فرحتي ولا شوقي ووجداني
لكن الغريبة سمعت صوت غريب بوداني
طفل صغير بيقولي انت مين ياعمو رد عليا
قلتله انت مين ياللي صوتك مش غريب عليا
ولمس قلبي بمجرد مارديت عليا
قالي انا مينا ابن ماما فلانه انت بقي مين ؟؟؟
ارتعش جسمي ارتعاشة واحد هيموت
وانفجرت دموعي ولساني اصابه السكوت
قولتله انا اللي كنت ممكن اكون اغلي واحد في حياتك
لكن الظروف بعدتنا وفرقتنا بس برضه هحس بأهاتك
قالي تاخد ماما تكملها هي موجوده هنا معايا
قولتوا ماهي زمان كانت موجوده ويايا
وقفلت السكه بسرعه والدمعه بتحفر جوايا
مجري رهيب سار فيه جرحي وشقايا
الي كل من عرف مأساتي يصليلي كتير
وصلوا اني اشوف مينا دكتور كبير
وامه تتهني ومتحسش يوم بألمي المرير
سلام يا أم مينا .. ياذكري ايامي الجميلة