سلام ونعمة ربنا يسوع في قلوبكم اخوتي
سامحوني علي العنوان ههههه
عاوزة اشد انتباهكم
عاوزين نتكلم سوا في موضوعنا دة عن حاجة مهمه قوي
موضوع انا شيفاه الحقيقة مهم وجوهري لنجاح كل شاب وشابة فينا في حياتة
يا رب متزهقوش مني لاني بحب اكتب مواضيعي من دماغي
صحيح مش هتكون جميلة زي الحجات المنقولة
ولكن اكيد هتكون قريبة منك ولامساك لاني شابة مثلك وهكلمك في اللي يهمنا
وفي اللي حاسينة وببساطة
النجاح في الحياة وارتباطه بعلاقتنا مع ربنا
ببساطة انا شايفة ان الانسان الناجح في علاقتة مع ربنا بيكون ناجح في حياتة بكل مجالتها والعكس صحيح
يعني بينجح في دراستة او حياتة المهنية او حياتة الاسرية او في حياتة العاطفية او في التعامل مع اي حد بمجتمعة
فية حد هيقولي يا نبتة دة ملوش دعوة
او ممكن يكون حد متفوق في دراستة لكن علاقتة بربنا مش كويسة
او انسان ناجح جدا في شغلتة لكن مع ربنا ملوش صلة بية
او محبوب في اسرتة وناجح معاهم ولكن لا يعرف ربنا
هقولك مش ممكن ابداااااااااااااااااااااا ااااا
عارف لية
خليك معايا متزهقش
الانسان اللي علاقتة بربنا بايظة وبعيد عن ربنا بيكون مفيش مخافة ربنا في قلبة
فبالتالي بيقوم باعمال لا ترضي الله ومش بيكون امين في اي عمل يعملة ولا يجتهد فية والناس بتستشعر دة فبالتالي مش هيكون ناجح
وطبعا العكس مع الانسان الناجح مع ربنا
فحتي تلاقي بالبلدي كدة يقولك الدكتور الفولاني دة ماشي بما يرضي الله , دة بيخاف ربنا
يعني الناس حتي بتمجد ربنا في نجاح الانسان بتاع ربنا وبتثق فية فينجح
حاجة تانية
هتلاقي الانسان اللي ماشي في طريق ربنا قلبة مليان بالمحبة دي وصية الهنا
هيتعامل مع كل اهلة واسرتة وزمايلة واصحابة البشر اللي بيتعامل معاهم في شغلة وكل من يعرفة بحب وهتلاقية بيفيض بالحب اللي هو اصلا نابع من محبة ربنا
عمرة ما هيسور علي حد والناس كلها هتحب التعامل معاة ومن هنا ينجح في عملة وحياتة
حاجة تالتة
تلاقي الانسان الناجح مع ربنا الناس تشوف فية التواضع
حتي يقولك يا سلام المركز اللي هو فية دة لكنة متواضع وعمرة ما اتعالي علي حد ولا يتكبر ولا يجرح مشاعر غيرة
حاجة رابعة
الانسان بتاع ربنا مش ممكن يدمن مخدرات ولا حتي يجربها
لان الحجات دي اصلا اثاثها اصدقاء السوء وهو من البداية علشان بيخاف ربنا مش هيعرف ولا هيجالس ناس وحشة ولا طبعا يتكلم في حاجة مش كويسة
لانه متبع تعاليم الهه اللي بتقول لا تجلس في مجلس المستهزئين
ولانة ايضا بينفذ الوصية اللي هي بتقول جسدك وزنة وامانة ربنا سلمهالك لازم تعتني بها وتحافظ عليها
وطبعا المخدرات ضياع للجسد اللي هو وزنة سلمهلنا الرب
ولان دي تذهب العقل واي شيء يضيع العقل هيخلي الانسان مش واعي هو بينفذ واصايا ربنا في اعمالة ولا بيرتكب جريمة وبيغضبة
الانسان الناجح مع ربنا بيخاف ربنا ومن هنا بينجح
مننساش
فكان الرب مع يوسف فكان رجلا ناجحا
فية كلام كتير جدا ممكن يتكتب في موضوع الانسان الناجح في علاقتة بربنا بيكون هو الناجح في حياتة
ولكن مش هطول احسن الناس اصبحت تزهق من القراءة
الهنا يعطينا النجاح ونحن عبيدة نقوم ونبني
ربنا يعطيني ويعطيكم النجاح
ازكروني في صلواتكم
اختكم
نبتة من غرس يمينة
2011\4\22