سلام ونعمة على أحلى منتدى
النهارده بنحتفل جميعا بعيد الأم
تحياتي لكل أم في الدنيا كلها
اسمحولى اعترف أمامك بحاجة مهمة
أنا زى اى بنت بحب أمي طبعا
امي اللي كانت لما ارجع من الشغل تعبانه الاقى الأكل جاهز على السفرة
وملابسي نظيفة وفى دولابي منظمة
كل اللى بطلبه مجاب كانت بتستحمل دلعى وعصبيتى بحب كبير
لكن بجد أنا ماحستش بقيمة امى غير لما تزوجك وبقيت أم
حسيت بإحساس مختلف أنا بعترف إنى ماكنتش اعرف قيمة تعب امى وتحملها
وسهرها وتضحيتها لأجل سعادتى ودعاها لى
غير لما بعدت عنها وبقيت مسئوله عن بيت وزوج وابن صغير
عرفت قيمة النوم والراحة عرفت إن امي كانت بتتعب قد إيه وأنا مش حاسه
ولحد دلوقت وانا عندى بيت وزوج وابن بس لسه صغيره فى نظرها بتخاف
عليه اكتر وعلى بيتى
عرفت قيمة ان ارجع من شغلى ولاقى كل حاجة متحضره لى
من غير تذمر بحب وخوف
عرفت لما بكون سهانه على ابني لما بيكون تعبان واقعد اعيط وأنا مش عارفه
اعمل له إيه
ولاقى أمي تقولي هو عياطك هيحل المشكلة خليكى قوية واصبري واتصرفى
بحكمة وبهدوء وصلي عرفت معنى الخوف على اولادى
وقلبى بيكون ازاى وهو بينجرح او بيقع او بيتألم
وساعات كتير بقول ياه يا امي قد إيه تعبتى
دا أنا وعندى ابن واحد وعامله إزاى
أمال أنتي وإحنا 4 أولاد
وكل واحد بمطالبه غير احتياجات والدى
وماكنتيش متعلمة
وماكنش فى بامبرز ولا غسالة اتوماتيك
ولا تليفون اتصل بالدكتور واسأله في ساعتها على ابني لما يكون تعبان
ولا صيدالية مفتوحة 24 ساعة وبتوصل الطلبات للمنازل
ماكنش فى كل التكنولوجيا الموجوده حاليا
ومع ذلك انا تعبانه وبشتكى ولما حد يقولى يالا
هاتى بابى تانى بقول بدون تفكير لا طبعا ده كفاية عليه واحد
انا تعبانه جدا ومش بعرف أنام ولا أكل غير لما ينام
بجد التربية مش شئ سهل خالص والمسئوليه كمان
بجد كل أم شوية عليها نعملها تمثال
على تعبها وتحملها وتضحيتها
أنا بحنى رأسى وأبوس يد
لكل أم تعبت وسهرت وضحت وكبرت وربت
وبقول لكل أم إحنا بجد عيشين ببركتكم
وبصلواتك وبوجودك بجانبنا وبنصائحكم اللى الواحد
ساعات مش بيعرف قيمتها ربنا يخليكم لينا
وفى وسط كل ده ماقدرش أنسى امي العظيمة ماما العدرا
اللى واقفه جانبى وبتساندتى بصلواتها
وياريت كل واحد ماينساش يبعت ليها ورده ويقولها
كل سنة وأنتى طيبة ياامى