اختي الشابة نفسك تنسي انك شابة
اختي الشابة خلصتي الليسانس بتاعك او بكالوريوسك او طلعتي ناصحة وخدتي الدبلوم طنط اللي هي مامتك عملت جمعية وجابت لك طقمين كبايات بنقشة علي طقم جيلي علي طقم بيركس عشان تجمعيهم كلهم في النيش اللي العريس الغلبان هتدبس ويجيبهم ونويتي تنسي انك شابة وتتجوزي انصحك تبتعدي عن هذه النوعية من الشباب
1- الشاب اللي شايف نفسه
وده ياستي غالبا هتلاقيه ( انا بقول غالبا يعني مش كل الشباب ) عمال طول ماهو معاكي يشكرلك في نفسه ويذكر لك بطولاته وازاي انه في مرة اتخانق مع الجزار عشان اده لماما جنيه معدني فكة وهو كان منبه عليه ميعملش كدة او انه مثلا علق المكوجي بتاعه عشان كوي له البنطلون بكسرة وهو مبيلبسوش بكسرة واساسا هو مبيكوهوش ولا عمره راح لمكوجي بصي الانسان ده انتي هتتخنقي منه قووووووووووي فبلاش منه لحسن يقولك انه ضرب ابوكي قبل كدة ولا حاجة
2- الشاب اللي عايش دور تامر حسني
وده هتلاقيه بقي مطول شعره وحاططله نص كيلو كريم تلميع او جل حسب الشعر وغالبا هتلاقيه لابس التي شيرت بالمشقلب وبنطلون مالوش لون وهتلاقيه في عز البرد لابس بادي او قميص مفتوح زي احمد رمزي وطبعا هيكون شغال عاطل يعني عشان يصرف عليكي لازم حماكي يكون راجل ...... اكمل النقط السابقة
اقولك ممكن تفتحيله كوافير حريمي او رجالي ع الاقل عشان يوفر ويصرح شعره ببلاش
3- الشاب الغيور
طبعا انا اقصد الغيور زيادة عن اللزوم وده بقي هيبقي مشكلة كبيرة للي بيحبها وهيخنقها واحتمال غيرته الزيادة تتحول لشك وطبعا لو دخل الشك هيخرج الحب ويجري وهتتوقعي منه ائلة من عينة رحتي فين امبارح ابن خالتك زارك يوم السبت ليه وياتري منتي لابسة ايه ساعتها وقدمتيله ايه ورغيتوا في ايه
ولو موبايلك رن مين اللي بيرن وبيرن بتاع ايه وبيبعت رسايل ولا لا ولو بيبعت بيبعت ليه وانتي اللي مدياله الفرصة
طبعا الغيرة شيء كويس لكن الشك بيودي في داهية
اختي الشابة لو لسه عندك نفس للجواز اختاري حد غير التلاتة دول ده لو لقيتي
ياجماعة الموضوع ده موضوع خفييف ياريت لناس ميخدهوش جد قوي والاقي الشباب بيقطعوا في سيرتي عامة انا في حمي شابات المنتدي
وعامة اللي يزعل من الشباب يخشلي الموضوع ده
فقط لمن يريد ان ينسي لفظ شاب