بنقول في الأمثال : اللي أتكسر ما يتصلحش
وبصراحه من فينا مبيغلطش ؟
الإجابة : كلنا
* ديما لما بغلط و افوق و أخد بالي من اللي عملته أفكر في ازاي اصلح غلطي ؟!
يمكن لو الواحد كسر "كوبايه ميه" ممكن بسهوله يشتري غيرها ويمكن بنفس شكل الأصلي
لكن في أخطاء صعب تتصلح زي إنك تجرح مشاعر شخص أو تكسر حاجه غاليه أو تبوظ لوحة فنيه بملايين
ويمكن كلمة "أسف" متصلحش أو تفيد حاجه .... خالص !!
مش عارف بصراحه ازاي نصلح غلطنا
هل كلمة أسف واعترافنا بالخطأ كفايا ؟
و لا مفيش حل ؟
حتي يعني علي المستوي الروحي بعلاقتنا مع ربنا
الخطية مثلا ؟ بتزعل ربنا جد و عشان نعملها مش محتاجين وقت اي مجهود
لكن عشان نصلح اللي عملناه متهيألي صعب إن لم يكن مستحيل
في قصه جميله أوي
عن طفل باباه أعطاه مجموعه من المسامير و جاكوش و صورة خشبيه لوجه السيد المسيح المصلوب
وقاله كل ما تعمل حاجه وحشه دق مسمار في الصورة
و رجع الطفل بعد أول يوم و وجد أنه دق مسامير كتير اوي في الصورة و أستمر الحال حتي أغصب الطفل نفسه علي التقليل من الخطايا يوم بعد يوم لحد ما جري في يوم علي باباه وقاله كفايا عاوزين أشيل المسامير وبعد توبه الابن
باباه قاله تعالي نروح لأبونا عشان نعترف
وقاله كل ما تعترف بخطيه تشيل مسمار ...
المسامير إتشالت
لكن أثر المسامر في الصورة كان لسا باقي !
صدقوني أنا مش بكتبلكم وعظة أو درس او فلسفايه
لكن بكتبلكوا مشكلتي الشخصيه و يمكن تكون مشكلة ناس كتير مننا و يمكن تكون الإنسان عموما
ونفسي الاقي حل
مش بقصد بس الاخطاء الروحيه لكن كمان في أخطاء بين الإنسان وبين اخوه !
أنا بتكلم عن الإخطاء عموما
مش عارف ... حاجه محيراني جدا
إزاي نصلح غلطنا ؟؟؟
ولا مفيش أمل ؟