[folla]

الشئ الوحيد اللي بيجمع الناس دي هي إنهم خارج مصر وأتحدى أي واحد فيهم إنه يقدر يقول الكلام ده لو كانوا ف مصر. الناس دي هم السبب اللي فضلوا يشجعوا السذج من شعبنا قبل مذبحة ماسبيرو بأيام على الخروج للمسيرة بدافع حرية التعبير عن الرأي وإستغلوا حالتهم النفسية وأثروا عليهم بدافع إن ده واجب ديني وأن المسيح بيبارك العمل ده وإستطاعوا أن يسوقوهم كالغنم في الشوارع للذبح مع العلم بأن أغلب الذين خرجوا للتظاهر لم يعرفوا حتى أن يميزوا صوت الروح القدس وللأسف إحنا اللي دفعنا الثمن حتى لو كان هناك شهداء للمسيح لكن المرار زاد والألم ساد والحزن إكتمل وللأسف إلى اليوم لم يفهم أحد ولايرد أحد أن يفهم أن الرب لا يحتاج لمظاهرة عشان مبنى . أرجوكم يا شعب المسيح إحتملوني في كلامي وفهموني لو كنت بتكلم غلط. الرب مش محتاج ثورة من أجل مبنى . الرب عاوز ثورة للقلوب تتغير فيها وترجع له بتوبه حقيقية وتعرفه إن هو الرب وحده . هو الأب . وقتها بس مش هنحس باليتم ولا العوز حتى وسط الألم لأننا هنكون فيه وهو فينا وهنعرف وقتها نميز صوته وهنصليله ببساطة وهيسمعنا وهيشفي أرضنا مهما كانت حالتها كما قال (إذا تواضع شعبي الذين دعي أسمي عليهم وصولوا وطلبوا وجهي ورجعوا عن طرقهم الردية فإني أسمع من السماء وأغفر خطيتهم وأبرئ أرضهم ) هو ده الحل الوحيد . مذكرش هنا مقاومة ولا مظاهرة ولا إنتفاضة . وعشان إيه ؟؟ عشان مبنى ؟؟ هي الكنيسة أصبحت مبنى ؟ ده في إيدينا كل واحد فينا يكون كنيسة لوحده (ملكوت الله داخلكم) و الكنيسة هي جماعة المؤمنين مش المبنى .
يا فرحة المسيح وإحنا بنصرخ عشان مبنى وكراسي ووظائف كنسية ومفيش مرة صرخنا كلنا بقيادة الكنيسة من أجل خروف ضال أو مطرود .