حصلت معاك قبل كده الحكاية دي ؟؟؟
+انك كنت بتصلي و حد دخل عليك فجأة ..رحت قمت بسرعة علشان تغير من وضع صلاتك
أو
+ خفت تنور نور حجرتك و بقيت بتقرا بالعافية من الأجبية في الضلمة علشان محدش يكتشف انك بتصلي ....
أو
+ حد سألك انت ليه قافل بابك من فترة ..فتقول حاجة غلط (تكدب يعني ) علشان تهرب من انك تقول كنت بصلي
كل ده علشان بتفتكر انك بكده بتتبع وصية السيد المسيح في الخفاء في الصلاة!
اتكلمنا في مرة فاتت عن تعمل ايه لو حد ضايقك من اهل بيتك لو شافك بتصلي ..لكن النهاردة هنناقش موضوع مهم اوي هو موضوع الخفاء في الصلاة ...
v السيد المسيح حط لنا نظام في الموضوع ده قاله بفمه الالهي الطاهر
(وأما أنت فمتي صليت فادخل الي مخدعك و اغلق بابك و صل الي ابيك الذي في الخفاء ..فأيوك الذي يري في الخفاء هو يجازيك علانية)(مت 6: 6)
و كأن السيد المسيح كان عايز يعلمنا حاجات كتيرة من الآية دي
Œ اننا مانطلبش مجد الناس و مديحهم ... و انه كمان يستأصل الرياء
اننا نبعد عن المظهرية و نهتم بالعمل الداخلي جوه نفوسنا
Žاننا نقفل باب فكرنا قبل ما نقفل ابوابنا المصنوعة من الخشب
ان كل مشاعرنا و قلوبنا تكون متوجهه ناحية ربنا
فالسيد المسيح أوصي بوصية الخفاء في الصلاة علشان
+يعالج الأمراض المستعصية اللي كانت منتشرة بين الكتبة و الفريسيين المرائين لأنهم كانوا ( يحزمون أحمالا ثقيلة عسرة الحمل و يضعونها علي أكتاف الناس و هم لا يريدون أن يحركوها بأصبعهم ..و كل أعمالهم يعملوها لكي تنظرهم الناس ..و يحبون المتكأ الأول في الولائم و المجالس الأولي في المجتمع و التحيات في الأسواق ..و لعلة يطيلون صلواتهم ) (مت 23: 4 – 14 )
+و من جانب تاني علشان ندخل للعمق في علاقتنا مع حبيب نفوسنا فنستحق البركات
و الخلاصة
ان اتسرب غلط لبعض الناس ان وصية الخفاء معناها ان محدش يعرف أو يحس باننا بنصلي .....مع ان الوصية الانجيلية بتقول (فليضئ نوركم هكذا قدام الناس لكي يروا اعمالكم الحسنة و يمجدوا أباكم الذي في السموات ) (مت 5 : 16)
هاحكيلكم علي قصة جميلة
مرة أحد الشيوخ القديسين خبط علي بابه زائر.. فقال له التلميذ و استأذنة ليسأل معلمه في مقابلته فقال الأب للتلميذ: ان سألك أحد عني فان كنت أصلي قل له انه يصلي ..و ان كنت نائم قل له أنه نائم و كذلك في بقية الأمور ...
لقد أراد الشيخ أن يعلم تلميذه أن يقول الحقيقة كي يعلمه الصدق مع الآخرين و لكي اذا ما عرفوا انه يصلي تأخذهم الغيرة الروحية للصلاة فيصلوا هم أيضا ...
علشـــان كــده
ماتخجلش لو حد عرف عنك انك كنت بتصلي و يكون السبب في كل ده الفكرة المأخوذة عن مبدأ الخفاء في الصلاة
أخيرا
السيد المسيح قصد بالوصية دي انه يحذرهم من الرياء و طلب مجد الناس و مديحهم ..فماتخافش ان حد يشوفك و انت بتصلي ( بشرط ان مايكونش ده هو هدفك ) لأن ربنا عارف كل شئ ...و هو بيكافئ كل عمل قلوبنا لأنه (فاحص القلوب ...مختبر الكلي ) (أر 17 : 10
اوعوا تكونوا نسيتووووووا
لو لسه محطتش هدف للسنه دي (انك تتغلب علي عادة رديئة- انك تنمو في فضيلة معينة ... ) يللا ابدا و حط ..و لو كنت بدات و كسلت باشجعك انك ترجع تكمل و لو بتحاول بس فشلت ...اقولك ماتيأسش ..كمل.. لو فشلت 1000 مرة لسه فيه 1001... و جيب نوتة صغيرة و كل يوم حاسب نفسك فيها ..و اكتب ربنا عمل معاك ايه .و اتمجد معاك في ايه ...جربوا بجد هتتمتعوا جدا و كل يوم قول لنفسك صلي لربنا زي ما بنقول في صلاة باكر (فلنبدأ بدءا حسنا ) و اعتبره بداية جديدة تحاول فيها تاني تجاهد بس مش تتهاون... و كمان احنا هنصليلكم بس انتم كمان تصلولنا معاكم ...
و انتم بترفعوا صلواتكم كل يوم و اوووووووعوا تكسلوا انكم تذكروا كل اللي طلبوا من اجلنا ان نذكرهم في صلواتنا و تضرعاتنا اللي بنرفعها قدام ربنا يسوع المسيح كل يوم . علشان ينور كل عقل و يشفي كل مرض ..و يخلص من خطايا و يعزي الحزاني و يشفي كل منكسري القلوب ..ياريت تجيب ورقة صغيرة و تكتب فيها اسماء كل اللي طالبين صلاتك ...و تذكرهم في صلاتك
أو تصلي كل يوم في صلاتك و تقول........
( يارب أولادك في المنتدى اللي طالبين صلاة ..ان كانوا طالبين شفاء أو تعزية أو معونة أو نجاح أو صبر في الشدة أو أطفال..حقق لهم طلباتهم ان كانت حسب ارادتك ..,,و ان كانت بغير ارادتك ..أعطيهم الصبر و ارشدهم لطريق ارادتك .....و اكشف ليهم عن تدبيرك لخطة حياتهم)
و لا تنسوا الصـلاة لأجل نجــاح و استمراريـة الخدمــــة