[bolalover]

اهلا بيكم في نهاية اول اسبوع كامل في 2009
انهارده الجمعة و مع كل جمعة هيكون معاكم

WeeKend

برنامج متخصص لعرض احداث الاسبوع التي مر بها منتدانا ارثوذوكس
كل ما تم ناشره من مواضيع هامة و احداث هامة و تهنئات و تعزيات و عرض اهم المناسبات علي مدار الاسبوع
و تقديم فقرات قوية من فريق العمل علي شكل مجلة اسبوعية
من الاخر كده يا حلوين الي هيغيب عن المنتدي يوم ولا اتنين ولا اسبوع او اي فترة
لاي اسباب طارئة مجرد دخولك في البرنامج هتعرف كل الحصريات و كل الاحداث الي حصلت
كتير منا مش بيقدر يزور جميع الاقسام في المنتدي و في اقسام بيبقا فيها موضوعات مهمة جداا
هنا هنقدر نجبلك كل حاجه علي طبق جاهزة التقشير و الاكل

نبتدي بعرض حلقتنا انهارده و نقولكم في البداية
كل سنة و انتم طيبين
و عيد سعيد علي الجميع و يارب كل ايام حياتكم تكون عيد

هنبدي بالاحداث الادارية الي تمت علي مدار الاسبوع

حذف قسم طلبات الاشراف
في خلال الاسبوع الماضي تم حذف قسم طلبات الاشراف
و تقدم العضو فادي الماجيك بسؤال للادارة و قال
اين قسم طلبات الاشراف
بعد المناقشات و وجهات النظر اتضح انها خطوة كويسة و هتكون لصالح المنتدي
ان من الافضل ميكونش فيه قسم لطلبات الاشراف و اي مشرف يتم تعينه بعد كده يبقا علي اساس تقدري المشرفين و المدير و المشرف العام
و لكن لنا وقفة في مبداء التصرف نفسه
لما بنيجي نعمل قسم جديد بنزل موضوع براي و فكرة القسم و نتناقش فيه كمشرفين و استاذ هيما مبيردش علي الموضوع علطول علشان يستني ياخد راي المشرفين
طيب و ليه ميبقاش العكس كمان فيه اخذ باراء المشرفين و مشاركتهم علشان ميطلعش حد و يقول عملتم ليه كده

مين الي وافق عليه

العضو Mooooony5 قام بتنزيل 3 مواضيع
و كل موضوع علي شكل تهنئة بمناسبة العيد و راس السنة
و في كل موضوع روابط فيها معايدة او تهنئة زي ما بقول
بعد ما تم الموافقة علي المواضيع الاعضاء اكتشفوا ان ده فيرس
و في اجهزة اتفيرست
طيب الاستاذ المحترم المبجل الي وافق علي مواضيع زي دي ليه بصفته كمشرف ميشوفش الموضوع قبل ما يوافق عليه و يجرب الروابط و بالاخص ان ده عضو جديد منزل موضوع يعني المفروض نتاكد منه الاول
مش نوافق و خلاص و بعد ما نوافق الناس تضر
رجاء محبة المشرفين و المشرف العام لما يجوا يوفقوا علي موضوع لعضو جديد يبصوا فيه كويس و يعرفوا ايه الروابط الي فيه افرض حط روابط تانية لحاجات اضر من الفيروسات كمان عيب اوي الكلام ده

مشرف قسم صندوق مناقشة الاعضاء

ليس من الخطاء تصحيح خطاء حدث
الخطاء الي حصل هو تعين عضو صغير في السن و ان لم يكن السن هو المقايس بس برده عضو مكملش شهرين معانا و تم تعينه مشرف علي قسم مهم جداا و خطير زي قسم صندوق مناقشات الاعضاء
مين فينا بيدخل علي المنتدي في يوم من غير ما يدخل علي صندوق مناقشات الاعضاء
اي حاجه بتحصل بينا حلوة وحشة اراء خلفات بتحصل في القسم ده
و بالتاكيد هيكون القسم ده في احتياج لناس كبيرة و عندها خبرة في التعامل مع الناس من خلال المنتدي
و هيما غلط لما عين مشرف علي القسم ده و لم يتم اختبار المشرف ده بشكل جيد كما تقول قوانين الاشراف
و لكن ليس من الخطاء ان يصلح الخطاء
خطوة مهمة و كانت مطلوبة لتصحيح خطاء و مفيش حد يقدر يلومك يا ابراهيم
و بالنسبة للعضو الي تم نزع الاشراف منه من الممكن ان يري امكانياته و موهباته في قسم تاني و يكون قادر علي تحقيق الافادة للقسم ده و لجميع اعضاء المنتدي

تعاون غير مسبوق من مشرفي القسم

ارفع القبعة و انحني شرفا و تقديرا لمشرفي قسم الصور
لتعاونهم الغير مسبوق في تاريخ المنتدي و تحقيق النجاح الكبير في القسم
بجد اهنئ المشرفين دول علي قوة تعاونهم و نجحهم في الرقي بالقسم و العمل فيه كروح واحدة و مجتهدين بجد
جميعا نشكر الاخوة
peter_pop18
@M@R!N
ماروجيرافك
اللة يرعانى

مشرفي قسم الصور

بجد انتم قدرتوا تظهروا و تخرجوا مثال قوي و جميل للمشرفين المتعاونين في قسم واحد
قدمتوا اقوي الاعمال من خلال تعاونكم سوه
و قدرتم انك تنشطوا قسمقم و تقدموا فيه اقوي الفقرات و المواضيع و تفيدوا الاعضاء بجد
انا عن نفسي بحيكم من كل قلبي و اتمني ان مشرفين المنتدي كله يكونوا زيكم
و ياريت بعد قراءة هذا الموضوع حد منكم يقولنا انتم ازاي قدرتم تجمعوا نفسكم و تتعاونوا بالشكل الكبير ده
علشان كل المشرفين في جميع الاقسام تعمل زيكم
و بجد تستحقوا التقدير و الاشادة


القيل و القال عن بعض الاعضاء

ليه بنتكلم و نقول و نطلع اشاعات عن اعضاء و هي غير حقيقة في غيابهم
العضو نارمر غاب عن المنتدي في ناس قالت ده عامل مشكلة مع حد من المنتدي و زعلان لازم نعمله موضوع
و ناس قالت ده هو مش عاوز يدخل ارثوذوكس علشان يفضي لمنتداه مارجرجس
و الي قال و قال و قال
طيب العضو نفسه قال ايه
رغم انه قال قدام الجميع بس للاسف هي هواية

المشاركة الأصلية كتبت بواسطة Narmar ازيكم يا جماعة كل سنه وانتم طيبين مع انها جات متأخر شوية انا بعتذرلكم بجد غصب عني معلش يا هيما شوية كدة فترة من الزمن وهرجع تاني مش عشان الاشراف صدقني ممكن تشيلة لو تحب بس عشان محدش يزعل من غيابي الفنرة دي بجد انا اسف انا بجد مش عارف الفترة ممكن تعد قد اية ممكن يوم وممكن شهرين الله اعلم انا مش بعمل حاجة غير بفتح الميل ومبكلمش حد بسيبة وبشغل اي حاجة موسيقي واقوم وياريت تصلولي كتير ارجع زي الاول محتاج صلاتكم جدا ربنا معاكم باي باي

ده كلام نارمر بنفسه يعني هو مش هيغيب علشان هو زعلان من حد او حاجه
لا دي ظروف عنده بتجبره انه ميدخلش علي النت او ميفتحش مواقع
كل واحد و حسب ظروفه ممكن يكون عاوز ياخد راحة نفسيه من المنتديات و الناس
كل واحد و حر بس مش معني كده انه يبقا لازم يكون متخانق مع حد و زعلان منه

ترجعلنا بالسلامة يا اغلي نارمر في الدنيا دي و هتوشحنا يا اغلي غالي

نيجي علي العضو عماد حسني
الكتير قال انه مش بيدخل المنتدي و مش بنشوفه ولا اي حاجه
و هو لسا زعلان ولا ايه
يا جماعة عماد حسني موجود معانا و بيدخل و لاكن ظروف شكله و مشاغله مكنتش بتخليه يقعد علي النت كتير الفترة الي فاتت و هو مش زعلان من حاجه خلاص زي ما هو قال بنفسه
و بالفعل عماد كان معانا في راس السنة و عمل موضوع تهنئة و قبل العيد كان موجود
و بيدخل يرد علي مواضيع و لاكن مشغولياته مش مدياله فرصة انه يدخل علي المنتدي كتير زي الاول
ربنا يقويك يا اجمل عماد حسني يا شاعرنا الجميل


عودة جميلة بعد غياب كبير

عودة اجمل عضوين غابوا عننا لفترة كبيرة
و هما
مايكل عبد الشهيد
و رجعه فريق عمل برنامج سيرش مي
و عودة العضو الجميل
اسامة مسمسم

نقولكم كل سنة و انتم طيبين و الف مليون حمدالله علي السلامة يا اجمل اعضاء
و ياريت متغوبوش عننا تاني بجد بتوحشونا



مسابقة احسن تصميم لعيد الميلاد

لقد نجح مشرفي قسم الصور في اعداد و تنظيم اقوي المسابقات في المنتدي و الي نجحت بشكل كبير جداا
و هي تصميم لعيد الميلاد من الاعضاء و الترشيح علي التصميمات المقدمة من الاعضاء
و كسب فيها
مبروك ليك يا مينا
mina3338

بجد تصميمك اكتر من رائع
و كل التصميمات فعلا كانت جميلة
و انا نفسي كنت محتار ارشح مين من جمال التصميمات كلها



مسابقة نجوم ارثوذوكس 2008

افضل مشرف
ايمن

افضل عضو
كيرو رافت

افضل موضوع
الخروجات الشهرية

نجم 2008
ميكي

مبروك ليكم كلكم و بجد انتم تستحقوا اكتر من كده لانكم فعلا بتتعبوا بجد في المنتدي
و ميكي موضوعك يستحق يكون افضل موضوع في 2008 لانه فعلا احسن موضوع في السنة كلها



تم تغير معاد الخروجات مؤقتا

تنبيه و تنويه لجميع الاعضاء
اصبحت الخروجات الشهرية ابتدائا من الشهر القادم يوم الاحد الاول من كل شهر
و ذالك رغبت الكثير من الاعضاء و اجازتهم في اليوم ده
و لرفع مستوي الخروجة و ضمان تواجد اكبر عدد من الاعضاء

في انتظار جميع الاعضاء يوم الاحد
1 / 2 / 2009



الخروجة الشهرية العشرة 7/1/2009

اول خروجة تشهدها 2009 من اعضاء منتدي ارثوذوكس
انتظروا لقاء الجبابرة العاشر بالصور
اللقاء استمر من الساعة 11 صباحا حتي الساعة 12 ليلا
بجد كان يوم فوق الخيال و جامد جداااا و هتشوفوا بنفسكم و بالصور


تهنئة خاصة لكل اعضاء المنتدي

بمناسبة اعياد الميلاد و الكريسمس
يقدم فريق عمل البرنامج تهنئة لكل اعضاء المنتدي
و نقولكم سنة سعيدة عليكم كلكم و يارب ديما نكون عند حسن ظنكم

كل سنة و انتم طيبين


خالص التعازي

خالص التعازي للعضوة حنان صادق
و ذالك لسنوية اكتر من فرد في الاسرة في خلال شهر يناير
تعيشوا و تفتكروا يا حنان و يارب تكون اخر الاحزان


اخواتنا في غزة ربنا يرحمكم

مش هنقدر ننسي او نتجاهل مناظر الالم الي بنشوفها كل يوم علي شاشات التليفزون و القنوات الفضائية
تخيلوا مدي لحظات الحزن و الالم و العذاب الي عايشين فيه اخواتنا في غزة
ايه ذنب الاطفال و الشيوخ و الستات
حرام بجد الي بيحصل ده
احنا مش في ادينا حاجه نعملها غير اننا نصلي من قلبنا لاخواتنا
و نقولهم
ربنا يرحمكم و يرحم اطفالكم و نسائكم و شيوخكم و يكون في عونكم




بكده تكون فقرات اليوم خلصت
طبعا مش هو ده الشكل العام الي هيكون للبرنامج فيه لكل حلقة
ده شكل مصغر و بداية للبرنامج و لاكن بداية من الحلقة القادمة هيكون في فقرات غير كده
و اي عضو يحب انه يقدم فقرة اسبوعية من خلال ويك اند يبعتلي علي الخاص و يبعتلي فقرته
و هتنزل هنا باسمه في الموضوع علي شكل مجلة او جريدة
ده برنامجكم ليكم و هيكبر بيكم
اكيد كتير منكم عنده اقترحات للبرنامج بلاش تبخلوا علينا بيها علشان نفدكم و نفيد كل اخواتكم
انتظرونا كل يوم جمعة مع متابعة شاملة لاحداث الاسبوع في منتدي ارثوذوكس

المصدر: †† ارثوذكس †† - من قسم: البرامج والخروجات الخاصة بالاعضاء