كـــتـــيـــر بنــــســــــاه
كتير بنساه .. ومبينسانيش ...
وكتير ببيعه عشان "معيش"
ورغم ده مخلينى أعيش
وكل صبح بشوف ضياه !!
وانا رغم ده بفضل كده
قاسى ومتناسى الرضا
وبرغم كل حنانه ده
بعمل كأنه مهزنيش !
أنا جوه منى حيره منى .. ليه تكون دى قسوه منى ؟؟
ليه بقول ميهمنيش؟
لِيه حَنين طب ليه فى دمى ؟ .. ليه بحسه بيعاتبنى ..؟
ليه بقسوة مصدّنيش؟!
كتير بنساه
كتير يجينى وأردُّه فاضى
أيوه بجرح وأبقى راضى!
ورغم إنه بكُونه قاضى
اما حكم خلانى أعيش!!
نفسى حد فى يوم يفسّّر
هوّ معقول حدّ يغفر ؟؟
لو لمره .. طب لو أكتر ؟!
حب عنه ميتحكيش
كتير بنساه
كتير بسيب حبه الحقيقى
بييجى وينور طريقى
ورغم ماأخدتوش صديقى
فارض حنانه بشوق عجيب
إصراره غيّر حاجه فيا
محبته فعلاً قوية
ورغم أنا مليان خطية
أخدنى ليه أقرب حبيب
كتير بنساه
25 يناير 2010