[كراكيب]

ازايكم يااحلي اعضاء ده اسكتش لراس السنة هو يمكن مش مناسب قوي لراس السنة لاني كتبته من اجل معالجة بعض المشاكل الموجودة بخدمتنا لكن هو اكيد نافع للكل لان المشاكل تقريبا متشابهة ف جميع الخدمات وربنا قادر يحل


بسم الثالوث القدوس
تخرج عروسة وتقول للخدام والاولاد الوقفين
بندقة : صباح الخير ياولاد صباح الخير ياانكل
الخادم : صباح النور يابندقة
بندقة : كل سنة وانتوا طيبين
الخادم : وانتي طيبة يابندقة
بندقة : انتوا عارفين ياولاد احنا بنحتفل بايه انهاردة
الخادم : طبعا يعرفوا يابندقة قولوا ياولاد احنا بنحتفل بايه انهاردة
نسمع اجابات الاطفال
بندقة : برافو عليكو ياولاد انا عشان كدة بقي قلت اجي انهاردة اعيد عليكم واخد هدية بالمرة ولا انتوا مش عاملين حسابي معاكم ياانكل
الخادم : لا ازاي يابندقة طبعا عاملين حسابك معانا المهم انتي بس تحكيلنا حكاية حلوة انهاردة
بندقة : انا هحكيلم حكاية جميلة بس انا حبه ف الاول اعرفكم معني راس السنة الميلادية
( تخرج هنا عروسة اخري ( بندق ) وتقوم بضرب بندقة فتقول بندقة اه وتقع خلف المسرح بينما يقول بندق بفرح )
بندق : هييييييييييييييه
الخادم : ليه كدة بس يابندق ليه بس تضرب اختك الصغيرة
بندق : هي تستاهل ياانكل اسكت انت اصل انت غلبان انا اصلي عارفها كويس ان مكنتش تضرب متتعدلش
الخادم : بندقة بندقة كدة ازاي دي كويسة قوي دي حتي عيدت علينا وهتحكيلنا حكاية مش زيك الا ماقلتلنا حتي كل سنة وانتوا طيبين
بندق : معلش بقي ياانكل اصل الرجولة نقحت عليا ونسيت اعيد عليكم بس اعيد عليكم ليه اساسا هو انهاردة عيد
الخادم : كمان متعرفش في ايه انهاردة يابندق طب انت عارف بقي لو مكنتش ضربت اختك بندقة كنت عرفت في ايه انهاردة لانها كانت هتحكيلنا حكاية عن انهاردة
بندق : ماهي هي اللي عصبتني ياانكل اصل انت متعرفشي هي عملت ايه
الخادم : طب قولينا انت يابندق ايه الحاجة الكبيرة اللي هي عملتها وخليتك تضربها بسببها
بندق : ياانكل متضغطش عليا انا مش عاوز اقولك عشان متزعلشي منها ده انت لو عرفت هي عملت ايه احتمال كمان تكرهها
الخادم : لا يابندق ياحبيبي احنا المفروض منكرهشي حد خالص لان بابا يسوع قال لنا احبوا اعدائكم وطبعا بندقة دي اختنا يعني مينفعشي اكرهها
بندق : يعني اقول ياانكل
الخادم : قول يابندق ع الاقل عشان اعرفها الصح م الغلط
بندق : خلاص خليك فاكر بس ياانكل انك غصبت عليا وانا مكنتش عاوز اقول
الخادم : ماشي ياسيدي يالله قول بقي دي باينلها حاجة فظيعة
بندق : ال فظيعة ياانكل ده انت مش هتصدقني
الخادم : يالهوي عليك يابندق ده انت رغاي قوي قول بقي تعبتنا
بندق : خلاص خلاص يرضيك يرضيك ياانكل ابقي جعان وياعيني هموت م الجوع ونفسي ف واحد اندومي بالخضار وهي مترضاش تروح تجيبلي شوف اديك زعلت اهو انا قلت بلاش اقولك
( تخرج هنا بندقة )
بندقة : ياسلام وهو انا يعني كنت شغالة عندك ماكنت رحت انت جيبت
الخادم : عيب يابندقة تكلمي اخوكي الكبير كدة وانت يابندق برده عيب تضرب اختك الصغيرة انتوا الاتنين غلطانين وبعدين انت ليه يابندق فعلا مروحتش تجيب الحاجة لنفسك
بندق : الله مش لازم نساعد بعض ياانكل مش ده الكلام اللي بناخده ف مدارس الاحد
بندقة : ياسلام يعني انت يعني اللي بتساعدني ده انا بطلب منك تداكرلي حاجة بتقوللي لأ
بندق : لانك فاشلة ده انا بقعد ساعة افهمك الدرس وانتي برده مبتفهميش حاجة
الخادم : وبعدين معاك يابندق اشحال انك بقالك خمس سنين بتعيد سنة ساتة
بندق : ايه ياانكل الاحراج ده بس راعي منظري يعني قدام الاطفال
الخادم : شفت بقي يابندق اديك زعلت مع اني مقلتش حاجة غلط كان المفروض انت برده تفكر في زعل اختك بندقة قبل ماتقول عليها فاشلة قدام زمايلها ومتضربهاش عشان ميبقاش شكلها وحش قدامهم
بندق : خلاص ياانكل اوعدك بعد كدة هبقي اضربها بيني وبينها عشان ميعرفوش
الخادم : طب ما ماما هتقولي
بندق : لا ماانا ناوي اضربها من ورا ماما اصل ماما اليومين دول مركزة معايا ده مش بعيد الاقيها ف مرة مصوراني بالموبايل وانا بضرب اختي
الخادم : علشان بتخاف عليك وعاوزاك تبقي كويس ومتضربش اختك انت المفروض تبقي انت اللي بتحميها مش انت اللي تضربها واقعد بقي ساكت شوية عشان عاوزين نسمع القصة من بندقة يالله يابندقة قوليلنا القصة
بندقة : بس خليه يقعد ساكت
الخادم : لما تتكلمي عن اخوكي ياحبيبتي قولي خلي بندق يسكت ماشي
بندقة : طب خلاص ماشي
الخادم : يالله قوليلنا بقي لحسن الوقت قرب يخلص
بندقة : طيب ، طبعا ياولاد انتوا عارفين ان احنا عندنا حاجة اسمها راس السنة القبطية وراس السنة الميلادية مين بقي فيكم شاطر يقوللي ايه الفرق بين الاتنين
( تخرج هنا عروسة اخري هي امهم وتصبح عليهم )
الام : صباح الخير يااناكل صباح الخير ياولاد
الخادم : اهلا صباح النور ياطنط ايه انتي اتاخرتي انهاردة يعني
الام : كنت بجيب للاساتدة الفطار
بندق : جبتي طرشي ياماما
بندقة : اهم حاجة الجرجير جبتي جرجير ؟
الخادم : انتوا مش مكسوفين من نفسكم انتوا الاتنين ازاي ماما تروح هي تجيب الفطار وانتوا قاعدين ف البيت
بندق : الله مش كنا عاوزين نيجي مدارس الاحد ولا منجيش
الخادم : لا يابندق انت ممكن تصحي بدري شوية تجيب الفطار وبعد كدة تيجي مدارس الاحد
الام : ياانكل دول بيتحججوا هما كدة علي طول حتي بكرة اهو السبت أجازة ومفيش ولا مدارس احد ولا دراسة برده هيصحوا متاخر ومش هيردوا يجيبوا حاجة كالعادة لانهم بطلوا يسمعوا كلامي
الخادم : لا ياولاد انا زعلان منكم قوي انتوا المفروض تسمعوا كلام ماما وبابا وتجيبولها اللي هي عاوزاه وكفاية عليها هي مشوار السوق وكفاية علي بابا شغله اللي بيتعب فيه عشان يجيبلكم تاكلوا وتشربوا وتلبسوا
الام : وياريتهم ياانكل مثلا مبيروحوش وبيقعدوا يداكروا كنت سكت وقلت عادي بي>اكروا لكن بيقعدوا في البيت يقعدوا يتخانقوا مع بعض وبس
الخادم : الله علي كدة بقي انتوا بتتخانقول كتير بقي مش مرة وخلاص زي ماكنت فاكر
الام : ده انا بغلب معاهم ياانكل ومبقاش عارفة اعمل معاهم ايه
الخادم : لا بجد بجد انا زعلت قوي منكم يعني لابتداكروا ولا بتسمعوا الكلام وكمان بتتخانقوا مع بعض امال ازاي بقي هتحكيلنا حكاية يااستادة بندقة المفروض الاول تبقي كويسة مع اخواتك وماما وبابا عشان تحكيلنا حكاية
الام : هي كانت هتحكي حكاية ايه ياانكل
الخادم : كانت هتقولنا ايه معني راس السنة الميلادية
الام : يعني انتي عارفاهات يابندقة
بندقة : ايوة ياماما
الام : ولما انتي عارفاها وعارفة ان بابا يسوع اتولد ليه مبتعمليش زيه وهو صغير
الخادم : معاكي حق ياطنط بابا يسوع وهو صغير كان بيساعد يوسف النجار ف شغله وكمان كان بيجيب لماما العدرا كل اللي بتحتاجه مش بيقولها لا
بندق : خلاص ياانكل احنا نوعدك هنحاول نكون كويسين
الخادم : مفيش حاجة اسمها هنحاول في حاجة اسمها غلطنا ناويين نصلح غلطنا وبعدين الم>اكرة دي هتفيدكم انتوا ف حياتكم لو مداكرتوش مش هتنجحوا ولو منجحتوش مش هتعرفوا تشتغلوا شغلانة كويسة
بندق : يعني ايه ياانكل
الخادم : يعني انت يابندق لو فضلت تسقط كدة كتير اكيد ماما هتطلعك م المدرسة صح ياطنط
الام : لو عليا انا ياانكل انا مش هبقي عاوزة اطلعه بس المدرسة هي اللي هترفده وساعتها هنشغله ف اي ورشة
بندق : ليه ورشة انا ممكن اشتغل اي شغلانة تانية
بندقة : امال عاوز تشتغل ايه بالابتدائية دكتور
الخادم : بس انتي دلوقتي يابندقة دورك جاي انتي احتمال برده تشتغلي عند عجلاتي
بندقة : بجد ؟ طب كويس عشان العب طول النهار بالعجل
الخادم : لا يابندقة انتي مش هتلعبي بالعجل انتي هتقعدي تشتغلي وتنفخي العجل
بندقة : ايه لا انا هداكر احسن
الخادم : وانت يابندق
بندق : خلاص ياانكل اوعدك اني هداكر كويس جدا
الخادم : وتسمعوا الكلام
بندقة : وكمان نسمع الكلام
الخادم : طيب يالله بوسوا بقي راس ماما
( يقوموا بتقبيها فيضربونها دون قصد )
الام : اااااااااااااه
الخادم : انتوا ياولاد بالراحة علي ماما
بندقة : طيب اكمل باقي القصة بقي ياانكل ؟
الخادم : لا يابندقة انتي عقابا ليكي مش هتقولي القصة لانك مش بتسمعي كلام ماما وانا او اي حد م الخدام يالله خشوا ورا الستارة واسمعوني وانا بتكلم
بندق : طيب احنا هنقعد ناكل بقي لحسن الطرشي برد
الخادم : هو الطرشي بيبرد يابندق وبعدين مفيش حد ياكل ف الكنيسة ياله باي والمرة الجاية عاوزين نسمع اخبار كويسة يبالله باااااااي

المصدر: †† ارثوذكس †† - من قسم: قسم المسرح الكنسي

[dina_285]

هههههههههههههههههههههه
بجد بجد ياااااميلاد
اسكتش حلو اوووووووووووي
برافو عليك ودا طبعااا مش جديد عليك ياااافنااااااااان
يا مؤلفنا الكبير الذي له شأن عظيم
ربنا يباااااااركك ودايما يارب في نجاح وتقدم
وكل سنه وانت طيب

[كراكيب]

• شكرا لكلماتك الجميلة يادينا
• وحمد الله ع السلامة
• ويالله شدي حيلك كتاباتك وحشتنا
• شكرا مرة تانية

[ريم الخوري]

حلو يا اخ كراكيب ربنا يبارك تعبك

[كراكيب]

• شكرا ياريم وكل سنة وانتي طيبة