[keroo82]

كلنا متفقين تقريبا أن البلد فيها أزمة جواز ..
وإن شبح العنوسة هو البعبع بتاع البنات الايام دي ..
فى ظروف زى دى ايه المتوقع من أى أب وبنته جالهم عريس كويس وأخلاق وجاهز وفى نفس الوقت البنت أعجبت بيه ؟!! ..
المفروض انهم يشيلوه من على الارض شيل ..
ده اقل ما يجب أن يعملوه ..
لأن خلينا نتكلم بصراحة ..
فرصة الرجل فى الزواج اكبر بكثير من المرأة ..
الرجل الجاهز ممكن يلاقى أكتر من واحدة مناسبة له ..
لكن البنت الفرصة الواحدة غالية جدا بالنسبة لها ..
لكن المشكلة الايام دي أن فيه أبهات وفيه بنات مش مقدرين الواقع كويس ..
أو مش فاهمينه ..
ولما يجلهم عريس كويس يسلخوه وكانهم بيعاقبوه على إنه فكر انه يتجوز ..

وممكن جوازات تقف فى اخرها علشان حاجات تافهه زى مثلا (الشبكة)
وبيحصل بسبب حاجات زى دى تقف جوازات ..
وأنا بس عاوز أديلكم أمثلة من الواقع وهى حصلت فعلا علشان تعرف بس انه رغم الظروف الصعبة اللى بنعشها دي مفيش اى تعاون ولا تفكير سليم لا من البنات
(( مش كلهم طبعا )) ولا من أبهاتهم ..

المثال الاول : بحبحها شوية ..!!

راح علشان يخطبها وهو شخصية فى مركز أجتماعي كويس وهى اقل منه فى المستوى التعليمي وأقل حتى فى مستوى الجمال ..قعد مع ابوها وجت سيرة الشبكة
قاله والله يا عمي أنا حجيب شبكة بــ3 ألاف جنيه ، قاله معلش يا بني اختها جالها شبكة بــ 5 الاف جنيه ومش عاوزها تحس انها اقل من أختها .. قاله مش حينفع يا عمي أنت عارف ان الخطوبة كلها على العريس وحدفع مبلغ جامد وانا لسه بدفع فى أقساط الشقة .. والراجل ابدا مصمم على رأية.. فالشاب قاله بدل انت مصمم خليها قاعدة جمب امها ..وسابه ومشى .. بعد يومين اتصل به وقاله خلاص يا بنى بــ3 الاف جنيه .. قاله خلاص يا عم الحج (( صبح صبح)) أنا صرفت نظر إذا كان من اولها بتعملوا معايا كده امال بعد كده ايه ..!!

تعليق ....!!

يعنى ده مثال واضح لشخص ولا مؤاخذة بيتاجر ببنته مش عايز يجوزها ... يعنى إحنا ديما بنقول ان الشبكة دى هدية العريس والمفروض يجيب حاجه على أد إمكانياته لكن للاسف تفكير معظم الأسر المصرية ان الشبكة دى وسيلة للتباهي بين بنات العيلة الواحدة ومين جالها شبكة أغلى وهكذا .. وبعدين يا جماعة واقعيا محدش بأه يجيب شبكة دلوقت اخرها (( دبلتين ومحبس )) والشبكة على الدخلة .. المفروض لو ناس فعلا شاريين راجل فعل مش كلام يسهلوا له أموره ويخافوا على فلوسه اللى هى اصلا حتبأه فلوس بنتهم .. لكن احنا دلوقت شاييفن الدنيا مولعة ازاى يعنى الشاب كتر خيره الايام دى انه عارف يتقدم علشان يتجوز وهو فى الاساس بيشيل الليلة كلها ولو حسبتها ولا مؤاخذه حتلاقى ابو البت مش بيدفع حاجه تقارن باللى بيدفعه العريس من اول الخطوبة لغاية الدخول ...ده حتى فى تفاهات الامور اللى بيسموها (المواسم ) لو العريس مجبش هدية يعملوهاله قضية ..!
القضية مش مسالة فلوس .. القضية ان ده زواج .. يعنى سر مقدس .. فالمفروض الاب فعلا اللى عاوز يستر بنته يسهل الحال مع المتقدم وفى نفس الوقت لا يرخص من بنته ويحفظ لها كرامتها ففيه فرق بين ان الانسان ييسر على غيره وبين ان يتنازل ..انا مش بقول يتنازل ولكن بقول ييسر وهناك فرق ...!

المثال الثاني : مرحش ايطاليا أنا

تقدم لها .. ودفع لهم كل ما طلبوه .. وتمت الخطوبة .. وقام بتجهيز شقته ..
وقبل الزفاف بأسبوع قالها إن شاء الله بعد الجواز بشهر حنسافر ايطاليا علشان جالى شغل هناك .. وطبعا يعنى عقد عمل فى ايطاليا ده حلم لاى حد ومش بالساهل كمان .. قالتله لا أنا مش حسافرايطاليا ومش حسيب مصر لو عاوز تسافر سافر انت وانا حستناك .. قالها امال انا حتجوز ليه .. وفى الاخر فشكل الخطوبة وقالها مع السلامة .

تعليق ..!!

ربنا لما يعطى إنسان نعمة وهو مش مقدر قيمتها حتغور من وشه ..
وده اللى حصل مع البنت دى ان النعمة اللى هى فيها غارت من وشها ..
يعنى فى ظل كل الظروف السيئة اللى احنا فيها .. جالها عريس معجبة بيه وجاب شقه وشبكة وجاهز من كله وفاضل خلاص أسبوع على الزفاف.. وفى الاخر تتنطط عليه علشان حياخدها ويسافر ايطاليا وكأنه حياخدها مثلا ويسافر صحراء الربع الخالي .. مع ان الاصول بتقول إن الست تروح مع جوزها اى مكان ، هى دى الاصول .. لكن هى كان فى ايدها نعمة اتنمردت عليها فغارت من وشها ..
كلمة اخيرة
النماذج دى مش كل البنات الموجودة فى المجتمع .. فيه لسه بنات واهالى فيهم الخير وفعلا بيشيلوا الراجل .. لكن انا حبيت اركز على نماذج مستفزة فى المجتمع ..

صلولى كتير يا اخواتى

المصدر: †† ارثوذكس †† - من قسم: الموضوعات الشبابية

[Team Work®]

اشكرك على التوضيح وربنا يفرح الكل يا رب

[keroo82]

شكرا يا هيما يا غالى على مرورك
ربنا يبارك خدمتك

[zaza2006]

موضوع لذيذ بجد يا كيرو وفعلا ده اللى بيحصل الناس بتبص للفلوس والامكانيات والشبكة والشقة ومش بيبصوا على سعادة بنتهم شكرا ليك يا كيرو ربنا يعوضك

[kottah_sh]

الحمد لله الحمد لله بجد بشكر ربنا
ان بابا ربنا هداه عليا ووافق بخطيبى رغم امكانياته
القليله جدااااااااااااااااااااااا اااااا
بس طبعا بعد ماجربت خطوبه وفشلت
رغم انهم قدموا لبابا كل متطلباته وشبكه بالشئ الفلانى
وشقه بس بصراحه مكنش فيه توافق بينا وكان بخيل وبتاع امه اوووووووووووووووووووى
والحمد لله اتفركشت
بجد بشكر ربنا على خطيبى الحالى لانه انسان كويس
وبابا فعلا حس انه كويس واتساهل معاه
فى حاجات كتير


بجد ياجماع وخصوصا البنات بلاش تبصى للفلوس
لانها هتزول لكن بصى لشخصيه الولد
ودى اهم حاجه وهيه اللى هتبقى ومش هتزول
ربنا يفرح قلب كل ولد وبنت
وكلمه اخيره ربنا يكون فى عون كل شاب

يالا افرحوا يا شباب قولت فى حقكوا كلمه حلوه
ههههههههههههههه