[bolalover]

رغيف من ذهب

سلام و نعمة يا اخوتي ...
كنت عايز اخد رايكم في موضوع كده و حاجه انا عملتها مش عارف صح ولا غلط
المهم هحكلم القصة ...
انا كل يوم بصحي الصبح من الساعة 7 و انزل جري من غير حتي ما اغسل وشي علي فرن العيش و اقف في الطبور من الساعة 7 لحد ما ربنا يفرجها يمكن 9 لو الفرج جالي بدري يبقا 8.55
يعني حسب الظروف لحد ما اعرف اجيب عشر ترغفة عيش .
المهم كل يوم اقف في الطبور الاقي العيش كتير اوووي بس مش لينا (( احنا يعني الي واقفين في الطبور )) و القي العيش خارج و معرفش بيروح فين و اقول في بالي يا عم و انا مالي مايروح مطرح مايروح .. و جه في يوم و قررت ابقا رخم و اسئل صاحب الفرن العيش ده بروح فين فقلي لمسئولين .. استغربت قولت الله هما المسئولين بياكلوا عيش زينا كده عادي ربنا يكون في عونهم هما صحيح فاضين يقفوا في طبور العيش (( كنت علي نياتي اوي انا ))
ما علينا ابتدت عنيا تفتح و مبقتش قطة مغمضة زي الاول و عرفت ان العيش ده بيتباع بره في السوق السوداء و مكنتش برده فاهم يعني ايه سواق سوداء المهم فهمة و اطقسة و عرفت ان الرغيف ابو شيلن بيتباع بربع جنيه استغربت بس طبعا مفيش طبور يا عم ولا زحمة ولا وجع دماغ قولت طيب ما انا اريح دماغي و اجيب من ابو ربع جنيه ....
المهم خلاصة الحوار علشان مطولش عليكم بعد مدة كبيرة و انا بجيب الخمس ترغفة بجنيه و ربع
لان الرغيف بربع جنيه قررت اني اعمل زي الي ببيعوا العيش ابو ربع جنيه قولت اكيد هكسب دهب الرغيف هجيبه بشلن وو بريزة و ابيعه بربع جنيه يا هوووووووو يا ناس دا اكيد هكسب دهب .
بس في البداية خوفت اروح اوقل لصاحب الفرن يشتمني و يبهدلني لاني كنت حاسس انها حاجه غلط و جه اليوم الي قررت اني اروح اكلمه و بكل صراحة دي الحوار الي دار بينا :-

انا : صباح الفل يا عم سعيد
عم سعيد : صباح الصداع .. نعم عايز ايه .. اقف في الطبور يا استاذ مفيش وسطة ولا محسوبية كلكم سوسية
انا : لالالا يا عم سعيد انت فهمتني غلط انا عايز حضرتك في موضوع مهم .. انا مش عايز عيش
عم سعيد : امال عايز خلصني يا عم
انا : عايز ذهب
عم سعيد : استغفر الله العظيم يا رب .. ذهب !! انت معتوه شكلك كده يالا يا حبيبي اجري العب بعيد يا شاطر ... مش ناقصة هي خوته و جنان علي الصبح
انا : تؤتؤ براحة بس ما انا هاخد منك ذهب و هديك الماظ .. صحصح معايا يا عم سعيد
عم سعيد : عليا الطلاق بالتلاته لو ممشتش من هنا لكون رنك علقة اعدل نفوخ اهلك الخربان ده
انا : طيب بشويش بس و اهدي كده و شدلك نفسين من المعسل بتاعك و انا افهمك
عم سعيد : اخلص يااض لاما هقوم اولع فيك
انا : بص يا عم سعيد يا رجل يا سكرة .. انا عايز اعقد معاك صفقة جميلة و هتكسب منها لقمة ذهب
عم سعيد : صفقة !!! ... صفقة ايه يا خويا
انا : بص من الاخر كده انا هاخد منك رغيف العيش علي بريزة بدل شيلن و ابيعه علي اول الشارع بريال و اهو منها انت تستفيد و تخفف الزحمة الي علي الفرن و انا استفيد
عم سعيد : اهاااا يا راجل مش تقول كده من الصبح .. طيب تعالي اقعد يا باشا ... يااااض يا حنكش واحد شاي هنا للاستاذ
انا : شكرا يا غالي
عم سعيد : بص بقا انت شاب و انا هسعدك علشان تسترزق و تاكل لقمت عيش و تعرف تجوز بسرعة
انا : اه و النبي يا عم سعيد ... عارف انا لو عملت الحكاية دي هتجوز بعد 6 اشهر علطول
عم سعيد : انا موافق بس بشرط هتبيع الرغيف بربع جنيه زيك زي زمايلك في المهنة علشان متبقاش بتقطع عليهم
انا : بربع جنيه !! يااااه يعني هكسب في الرغيف 15 قرش حلو او الكلام ده
عم سعيد : لا يا روح طنط هتكسب رده بريزة علشان انا هديك الرغيف بـ 15 قرش يبقا انت 10 و انا 10 و الخمسة للفرن
انا : اها فهمتك ... ماشي يا عم سعيد مفيش اي مانع هنبتدي من امته بقا
عم سعيد : من بكره هتاخد حصتك و تبيع و تكسب ربنا معاك يا ابني يا حبيبي و يقويك
انا : ربنا يخليك للشباب يا عم سعيد كده و تحليلهم مشاكلهم و تسعدهم يا رب
عم سعيد : اه ما هو انا بحب اساعد الشباب
انا : ماشي يا عم سعيد تؤرمرني باي خدمة يا غالي مع الف سلامة
عم سعيد : سلام

و تم بحمد الله و الامور تمام و كسبت ذهب من العيش ...
انتم بقا ايه رايكم في الي حصل ده
انا طبعا معملتش كده بجد بس حبيت ابين ليكم الي بيحصل فعلا
و مفيش رقابة علي العيش ولا رايح فين ولا جاي منين و الدنيا بزرميط و العملية اهي مشية و خلاص
كفاية انا قولت الي عندي ... مستني اشوف رايكم
انا الي كاتب الموضوع ده و علي كامل المسئولية بكلامي
اخـوكـم
بـــولا

المصدر: †† ارثوذكس †† - من قسم: صندوق مناقشات الاعضاء

[bolalover]

شكلكم كده خايفين و مش عايزين تقولوا رايكم

[بنت الراعي]

هو بصراحه يا بولا الموضوع حلو اوي
انا شخصيا عجبني بس مش عارفه ارد اقولك ايه
وكل دي حاجات بقيت طبيعيه في ظل الارتفاع في الاسعار اللي حاصل
بس لكن بجد الموضوع تحفه ربنا يعوضك ويباركك

[minabobos]

اية يابنى الخيال اللى انت عايش فيا كده
ربنا موجود يا حبيبى وهو يتصرف ويحل الموضوع
ومفيش بيدينا اية حاجه غير نطلب من ربنا يسهل الامور

وبعدين ربنا يوافيق ابقه اتفاقلى معاك علشان اشتغل صبى عندك
ههههههههههههه

[كاترينا]

كل حاجه دلوقتى فيها المحسوبيه و فيها بمعنى أصح كوووووسه

ربنا موجود

[بيتر109]

انا بقى بصراحه مش عارف ليه بدخل المواضيع الى انت كاتبها بس فى حاجه فى
اسلوبك شدتنى بصراحه دى حاجه طبيعيه جدا دلوقتى العيش بيتباع عندنا فى اسكندريه ب57قرش وبجنيه وللاسف مفيش حد يقولهم كدا غلط بس نعمل ايه ادى الله وادى حكمته
يسوع معاك يا عسل

[وردة حزينة]

ههههههههههههههههههههههههه هههههههههههههههههههه
لا تعليق
لينا رب اسمة الكريم وعشانا عليك يابولا
اعمل حسابى فى المشروع بتاعك

[M!SS N@NO]

عينى عليك يا بولا
الله يكون فى عونك يا بنى
حاسة بيك واللهى عشان انا مشوية من الموضوع ده أوى
بس اللى عندى بقى عم سيحه الله يسامحه
بس انت نسيت حاجة مهمة أوى
اسمها ايه دى الله يعمر بيتها بتدينا العيش بالغموس
اه واللهى انت مش مصدقنى ولا ايه؟
دا انا بفتح رغيف العيش كأنى فتحت بلاعة
صراصير ودود ودبان والمفاجأه (وحصلت واللهى) أعرف حد لقى برص
يا سلااااااااام ع الكرم
واللهى الواحد ماعارف يقول ايه لأسمها ايه دى
بص انا هقولها كلمة واحدة .................واحدة بس
يا جارحنى بلقمة ناشفة والعيش عندك طرى.........تقلان عليا ليه ماتحن يا مفترى
ربنــــــــــــــــــــــ ــــــــــا كبـــــــــــيـــــــــــ ـــــــــــــــــــــــــ ــر

[ظريف]

شكرا بولا على توضيح معاناتنا فى الحصول
على رغيف العيش المدعم
وسبب الأزمه الحقيقيه هى ( أصحاب المخابز ) الذين
باعوا ضمائرهم للشيطان وباعوا معها أكثر من نصف
حصة الدقيق المدعمه والمنصرفه لهم من قبل وزارة التموين
بثلاثه أضعاف ثمنها لمصانع الحلويات الخاصه
والمحزن فى الموضوع كل هذا يتم على علم ويقين
من مفتشين التموين الذى دورهم التفتيش والرقابه
على الأفران المدعمه 0 ولكن 000000000000
بماذا يفيد لو ربح الأنسان العالم كله وخسر نفسه

لو عايز تكسب دهب يابولا الطريقه سهله جدا
أذهب للفرن الساعه أربعه الفجر سوف تجد صاحب
المخبز وهو بيسرب الدقيق فى صناديق القمامه
وقله 0 أثبت محلك وأمسك الموبيل وبلغ النجده
صدقنى يابولا صاحب المخبز حيعطيك 500 جنيه فورى
أصل انا مجربها دى مضمونه
ههههههههههههههههههههههههه ههه
ههههههههههههههههههههه
هههههههههههههههههه

[sawsaw]

هو مش العيش بس الى غيلى
حتى البنزين
يعنى لو موظف عنده عربيه
بيملاها بنزين
بمرتبوا فى الشهر
يعنى بيصرف على العربيه اكتر ما بيصرف على نفسه وعياله وتعليمهم
بامانه حرام الى بيحصل ده
ربنا يستر علينا