[elphilasouf]

امبارح كان يوم غريب جدا جدا
توفى المخرج الكبير يوسف شاهين
وقضيه العباره وممدوح اسماعيل والناس الى معاه طلعوا فيها برأه
وحصلت لاستاذ ظريف حادثه مريبه جدا جدا

اعد امبارح فى امان الله لقيت واحد بيكلمنى ع الميل
طلع استاذ ظريف
قالى مش انا كنت هموت النهارده
قولتله غير انا بحسبه بيهزر وبيشتغلنى كالعاده

راح حكالى ع الى حصله
بيقول

رحت أوصل أبانوب القطاروكان معاه شيل ثقيله إضطريت أدخل القطار معه لحد الكرسى بتاعه وأنتا نازل إنتدفاع الناس ضدى أقوى منى فدخلونى القطار تانى والقطار مشا بيا بعد ربع ساعه أبانوب ضربلى تليفون وقالى بابا القطار مشا وأنا كويس قلتله ما انا عارف ياحبيبى بص وراك حتلاقينى فى آخر الطرقه بص .....لاقانى بشاورله أنا كنت واقف فى الطرقه اللى فيها الشنط ودى شنط ناس مهمه أنتا عارف القطار الأسبانى مش بيركبه أى حد ودى درجه أولى عامل القطار كان قلقان من وقفتى جانب الشنط بينى وبينك انا كنت محرج جدا واقف جنب شنط الناس فالعامل عشان يزحلقنى قالى روح الدرجه التانيه وأنزل لما القطار يهدى وقعت من القطار وهو ماشى حشرحلك نظام القطار الفاخر القطار الفاخر نوعين نوع بيقف فى محطات ونوع آخر خطير جدا مثل الطائره وعند غلق الباب بتاعه بيشيلوا الأكره بتاعة الباب لضمان عدم نزول او ركوب أى شخص لأت سرعته كبيره جدا جدا ولذلك بيمشى على قضيب مستقل بزاته حتى هوائه لايضر الناس اللى واقفين على المحطات هو بيمشى فى النصف بعديد عن الرصيف وبعد نصف ساعه من الأطلاق شوف إنتا ياجورج سرعته حتكون إزاى ؟ وبعد ماكلمت أبانوب نطيت من القطار وهو ماشى أنا عاوز أشرحلك لحظه لما رجلى لمست الأرض والقطار ماشى حصلى إيه أنا لقيت القطار عالى وبيجرى بس فى الأول انا عملت محاولات كثيره عشان يفتحولى القطار وجابولى رجل شرطه عشان يحضر لحظه وقوعى وبعدين اول مارجلى لمست الأرض شعرت بأننى ريشه تتحرك فى الهواء ومش عارف أتحكم فى نفسى وشايف عجلات القطار قريبه منى جدا جدا وسريعه أسرع منى وأنا ماشى بتشقلب بجانبها وهى أسرع منى وأعلى منى عامله زى الوحش الكبير المخيف وأنا شاعر بنفسي أقل من الريشه وعمال أتشقلب فى جميع الأتجاهات ومنتظر المجهول هل العجلات حتقطع إيدى أم رجلى أم حتخبطنى فى ركبتى وأستسلمت تمام للقدر المجهول وفجأه ياجورج حاجه قويه جدا جدا زى الهواء إجتذبتنى بقوه بعيدا عن العجلات وكمات شقلبه بعيد عن القطار دى إيد ربنا الخفيه التى تظهر وقت الضيق اللى أنا مستغرب له لحد دلوقتى ياجورج ومش مصدق نفسى مافيش إصابات خالص غير خدش بسيط جدا جدا فى قصبة رجلى اليمين أنا بفكر ياجورج أروح بكره محطة القطار وأقابل العمال ورجل الشرطه عشان أستفهم منهم أنا حصلى إيه بالضبط أنا كنت سامعهم بيقولوا ياحول الله وماكانوش مصدقين اننى هعيش بعد ما وقفت على رجلى ضربتلهم تعظيم سلام ولقيت نفسى بأبوس إيدى وبحمد ربنا عارف ياجورج أبانوب أتصل بيا كتير ليه ؟ هو بيحسبنى فى القاهره عشان هو شافنى فى القطار وهو فى آخر سرعته بعد ما وقعت كلمته بس على فكره أنا ماقلتش لحد خالص إن أنا وقعت من القطار عشان مايقلقوش عليا وألاقى القاهره كلها عندى عرف لما أنا نزلت من القطار بعدها بربع ساعه كلمته وأنا هادى بس هو خد باله وحس بيا عشان بقوله أنا حروح قالى مش حتشتغل قلتله أنا تعبان قالى تعبان من إيه قلتله لأ مافيش حاجه أنا مش حرتاح ياجورج ألا لما أقابل الناس دى بكره وأعرفك انا كنت بتشقلب إزاى ؟ بس أحساس صعب ياجورج لما الأنسان يفقد السطره على نفسه ويطير مثل الريشه وينتظر مصيره المجهول

انا طبعا كنت سعات بموت من الضحك
وسعات ابلم من الكلام ده
بس الطريف بقى يا جماعه ان استاذ ظريف لما وقع من القطر
الحته اللى وقعت فيها سأل على إسمها
قالوله دى البيضا البلد
يعنى تتبع محافظة البحيره

يارين نقوله بقى
الف حمدلا على السلامه
وعمر الشقى بقى

وتعيش وتاخد غيرها

المصدر: †† ارثوذكس †† - من قسم: منتدى مناسبات الاعضاء

[Team Work®]

سلمتك الف الف الف سلامة يا استاذ ظريف وبجد حصلت معاك معجزة نشكر ربنا على سلامتك الف سلامة ليك

[عماد حسنى]

الف مليون حمدالله على سلامتك يا استاذ ظريف
ربنا حنين اوى على كل اولاده
حمدالله على سلامتك ويارب دايما تكون بخير
ربنا يحافظ عليك ويخليك لأبانوب ولينا

[بنت الراعي]

حمدلله علي السلامه يا استاذ ظريف
والف شكر لربنا انك بخير
والحمدلله انك بخير بس ياريت بعد كده
تاخد بالك من نفسك
وربنا يخليك ويخلي ابانوب
ربنا معاك
ميرسي يا جورج انك قولت لنا وطمنتنا كمان

[keroo82]

الف سلامة ليك يا استاذ ظريف والحمد لله انى جت على كدة نشكر يسوع ربنا مبينساش اولادة
اطلبنى فى وقت الضيق انقذك فتمجدنى
الف حمدلة على سلامتك
متشكر جدا يا جورج انك طمنتنا على استاذ ظريف

[القطة كيتي]

الف سلامة عليك ياستاذ ظريف

[bolalover]

الف الف الف سلامة يا اغلي ظريف في الدنيا
معلش و ابقا خلي بالك بعد كده
بس نشكر ربنا انك بخير الحمد الله

[@M@R!N]

سلامااات يا استاذ ظريف
الحمدلله جات سليمه
ابقى خد بالك المره الجايه
وربنا معااك

[ماروجيرافك]

حمدله علي سلامتك يا استاذ ظريف
والحمد لله انك وصلتو للقطار وموصلتوش بطياره

[M@@@NOOOO]

حمدلله على سلامتك
وربنا يخليك لآولادك ويحافظ عليك
ربنا معاك ويفرح قلبك