[tota _2010]

ليه يارب؟

" ليه يا رب ؟ " .. " ليه يا رب ؟ " .. " ليه بيحصللِّى كده ؟ " .. " اشمعنى أنا " .. عبارات قلتها كتير .. وانتظرت أكثر ولكن للأسف : لا إجابة …

لقيت ربنا بيقوللّى : أجاوبك بتاع إيه ؟ وأجاوبك ليه ؟ .. هوه فيه علاقة شخصية بينى و بينك علشان أجاوبك ؟!؟ ... اللى بيني و بينك عامل زى الشارع الـ one way .. شارع اتجاه واحد .. من تحت لفوق بس .. شارع مابتمشيش فيه غير عربيّات ماركة : " طلبات " و ماركة " تظلمات" ، و كل فين و فين لمَّا تمر فيه عربية ماركة : " تشكرات " … !!! لأنك لمّا بتقعد قدَّامى ( ده لو قعدت أصلاً ) بتقول الكلمتين اللى عندك وبتجرى .. مابتستنّاش علشان تسمعنى عايز أقولّك إيه أو عايز منك إيه …

سَكتّ .. هاقول له إيه ؟ .. ما هى دى الحقيقة .. أنا على طول مشغول و ورايا 100 حاجة .. وما بفتكرش ربنا إلاَ لما تحصللّى مصيبة ! .. وقتها باصرخ وأقول له : " إلحقنى " و " ليه يارب ؟ " إلى آخر قائمة الشكوى و الاعتراض ... مع إن على العكس ، لما بيدِّينى عطية ، ماباقولش " ليه يارب ؟ " .. و يا افتكرت أشكره ، يا مفتكرتش … !!!

فى وقت ما ، زادت علىَّ الضغوط جداً … وحصللّى زى ما بيقول الكتاب :

" هكذا قال الرب : أُضيِّق عليهم لكي يشعروا " . أرميا 10: 18

وشعرت فعلاً إني لازم أعيد حساباتى مع نفسى … دلوقت أمامى طريقين وقائدين مالهمش ثالث :

(1) طريق إبليس . (2) طريق الله

* بالنسبة لطريق إبليس :
كلنا عارفين إن مافيش أسهل من إن الواحد يعمل الخطية !!… ده حتّى عم بولس قال : " حينما أريد أن أفعل الحسنى ، أجد الشر حاضر عندى . " رومية 7: 21 تخيَّل لما بولس نفسه يقول كده !!! يعنى أنا مش لوحدى فى الخيبة دى …

**طب و القائد فى الطريق ده … اسمه إيه ؟ اسمه : (1) الشيطان : يعنى المقاوم … مقاوم لكل عمل روحى بيعمله الله فى وسط شعبه … (2) إبليس : يعنى المشتكى .. ينصب لك الفخ .. ولما تقع فيه .. يروح يشتكى عليك عند الله ! (3) الكذَّاب و أبو الكذَّاب : يعنى ما يقولّكش حاجة صح أبداً … ده غير أسماء تانية كتير … من ضمنها : الشرير ، القتَّال ، المجرِّب ، عدو الخير ، رئيس سلطان الهواء ، رئيس سلطان هذا العالم … مش بس كده .. ده من بجاحته .. تبقى ماشى وراه .. و على قد ما يقدر يذلَّك ويبهدلك …!!

طب ده بالنسبة للّى هاشوفه في حياتى إذا مشيت فى طريق إبليس : ذل و بهدلة و نكد…

طب و بعد الموت ؟…

"إن كان أحد لا يثبت فىََّ (في المسيح) يطرح خارجاً كالغصن، فيجف ويجمعونه ويطرحونه في النار، فيحترق". يوحنا15: 6

بعد الموت … بعيد عنك … هاكون فى مكان فيه حريقة ليل نهار … و مافيهوش مصلحة مطافي تِطفِّي … لأن مافيهوش مصلحة مياه أصلاُ ( يعنى مش هلاقى ميه أبل بيها ريقى )… ومافيهوش مصلحة كهرباء … يعنى حتى مش هاقدر أشوف اللى بيتشوى جنبى !!!…

* بالنسبة لطريق الله :

الكتاب بيقول : " ما أضيق الباب و أكرب الطريق الذى يؤدى إلى الحياة ، وقليلون هم الذين يجدونه !" متى 7: 14

يعنى الشخص اللى هايمشى فى الطريق ده ، لازم يكون سوبر مان علشان يقدر يقول للخطية :

" لو اتنططِّى قدَّامى … مش هاعملك برضه !!"

طب أروح فين أنا ولاَّ أعمل إيه ؟!؟ … ده أنا باقول للضعف : " قوم وأنا أقعد مكانك …" يعنى حتى يا رب لو أنا اخترت طريقك … مش هاعرف أمشى فيه…

ل

قيته بيقوللى : لا يا حبيبى ، الموضوع مش متوقِّف عليك أنت … ضعيف ولاَّ قوى ، لأن : " الخطية خاطئة جداً " رومية 7: 13 " طرحت كثيرين جرحى ، وكل قتلاها أقوياء ". أمثال 7: 26

مش بس كده … ده التقرير الإلهى صدر بإن :

" الجميع أخطأوا و أعوَزهم مجد الله " . رومية 3: 23

" ليس من يعمل صلاحاً ، ليس ولا واحد ." مزمور 53: 3

افتح كتابك المقدس واقرا يوحنا 15: 5

"أنا الكرمة وأنتم الأغصان. الذي يثبت فىّ وأنا فيه، هذا يأتي بثمر كثير، لأنكم بدوني لا تقدرون أن تفعلوا شيئاً."

***واخد بالك في كلمة " بدونى " بعد النون فيه إيه ؟ .. " الياء " دى بتعود على المسيح .. يعنى بدون المسيح ، أنت ولا هتصد ولا هترد !.. لكن لما هتبطّل تمشى بدماغك ، وتسلمنى حياتك .. هتقدر تقول مع عمّك بولس

: " أستطيع كل شئ فى المسيح الذى يقوِّيني. " فيلبى 4: 1

و" أقمع جسدى وأستعبده. " كورنثوس الأولى 9: 27

لأن وقت ما هتسلِّم حياتك للمسيح ، هو اللى هايخلِّيك تمشّى جسدك بالطريقة اللى تليق بواحد من أولاد الله لكى " لا يستحى بهم الله أن يُدعَى إلههم. " عبرانيين 11: 16 ، مش جسدك اللى هايجرجرك من رقبتك ويقل قيمتك في طريق الخطية …
و هاشبَّعك و أفرَّحك .. و هتقدر تقول :

دوسي يا نفسي بعز... على كل المغريات( (قضاة 5: 21

و " النفس الشبعانة تدوس العسل ، و للنفس الجائعة كل مُر حلو " أمثال 7:27

يمكن ظروفك ما تتغيّرش... لكن إنت اللى هتتغيّر … واللى كان بيسعدك وقتياً زمان .. أصبحت تنفر منه الآن … لأنه مكتوب : " فرح الفاجر إلى لحظة " أيوب 20: 5

وهتلاقي روحك إن إنت مابقتش إنت … بقيت واحد تانى … واحد جديد :

"إن كان أحد في المسيح فهو خليقة جديدة . الأشياء العتيقة قد مضت ، هوذا الكل قد صار جديداً ." كورنثوس الثانية 5: 17

" مع المسيح صلبت ، فأحيا لا أنا ، بل المسيح يحيا فيَّ " . غلاطية 2: 20

طب و القائد فى الطريق ده … اسمه إيه

الاسم الأول : " المحب "
لما بحث الناس عن كلمة يخبروا بيها عن طبيعة الله اختاروا كلمة " المحبة " : ( الله محبة (

" ليس لأحد حب أعظم من هذا : أن يضع أحد نفسه لأجل أحبائه ". يوحنا 15: 13 " هكذا أحب الله العالم حتى بذل ابنه الوحيد لكي لا يهلك كل من يؤمن به بل تكون له الحياة الأبدية ." يوحنا 3: 16

- معلش يا رب .. أنا عايز أقولّك إن إنت أكيد بتحب بس اللى بيحبّوك .. اللى عايشين لك .. اللى مش بيقولوا لك زيّى : كان نفسى أصلّى و أقرا في كتابك ، لكن أعمل إيه ؟ .. مافيش وقت !…

- رد علىَّ وقاللى :

" أُحبهم فضلاً ، لأن غضبى قد ارتَّد عنهم " هوشع 4:14

فاهم يعنى إيه " فضلاً " ؟ … يعنى بلا سبب فيهم … يعنى :

وإنت مافيش فيك حاجة عِدلة تتحب … بحبك

وأنت مدينى ظهرك ومشغول عنى … بحبك و مستنّيك بكيت …

لما سمعت صوته ، قلت له يا ربى
ليه بتنادى علىّ وأنا مش طايق ذنبى
قاللى : دمِّى يطهَّر من كل الشرور


أنا باحب " الخاطي " و أخرجه للنور

نشكرك يارب لانك احييتنا حتى هذة الحظة

يارب الموضوع يعجبكو....صلولي كتير

المصدر: †† ارثوذكس †† - من قسم: التأملات الروحية والخواطر الفكرية

[tota _2010]

منتظرة مشاركتكم

[نبيل نصيف جرجس]

بجد بجد يعنى
موضوع فوق فوق فوق الرائع
طريقتك واسلوبك رائع اوى
بتمنى من الهى يسوع يزيدك نعمة وبركة كمان وكمان
صلى لاجل ضعفى انا الخاطى الغير مستحق

[بنت المخلص]

فعلاااااااا موضوع جميل
ربنا بيارك حياتك

[tota _2010]

المشاركة الأصلية كتبت بواسطة نبيل نصيف جرجس بجد بجد يعنى موضوع فوق فوق فوق الرائع طريقتك واسلوبك رائع اوى بتمنى من الهى يسوع يزيدك نعمة وبركة كمان وكمان صلى لاجل ضعفى انا الخاطى الغير مستحق

ميرسي ليييك جداا يانبيل علي ردك ومرورك الرااائع...ميرسي علي محبتك بجد

الرب يبارك حياتك

[tota _2010]

المشاركة الأصلية كتبت بواسطة بنت المخلص فعلاااااااا موضوع جميل ربنا بيارك حياتك

ميرسي ليكي كتيير بنت المخلص لمرورك وردك الرائع ده....ميرسي لمحبتك

الرب يبارك حياتك

[rooney93]

لا موضووووووووووووووووووووع جميل جدا
ربنا يباركك

[tota _2010]

ميرسي لييك كتيير يا روني علي مرورك وردك الجميل ده....ميرسي لمحبتك

الرب يبارك حياتك

[بنت ماما العدراء]

موضوع راااااااااااااااااااااااا اااااائع يا توتا بجد ربنا يباركك

[tota _2010]

المشاركة الأصلية كتبت بواسطة بنت ماما العدراء موضوع راااااااااااااااااااااااا اااااائع يا توتا بجد ربنا يباركك

ميرسي ليكي بجد يا بنت ماما العدرا لمرورك وردك الجميل....ميرسي لمحبتك


الرب يبارك حياتك