[keroo82]

*******
نهار داخلي- صالة منزل مصري
مدام "دلال" تجلس في الكرسي المقابل لجارتها القديمة "درية"، بعد أن أدّت واجب الضيافة، تبدأ "درية" بفتح الموضوع بطريقة غير مباشرة.
درية: إلا هي فين "حنان" بنتك؟.. والله بقالي زمن ما شفتهاش..

دلال: آه مع صاحباتها نزلوا يشتروا حاجات..

درية: ويا ترى اتخطبت ولا اتجوزت.. اوعي تكوني ما عزمتنيش!

دلال: وأنا أقدر برضه ده يوم المُنى يا حبيبتي.. بس أهو بقى لسه النصيب ما دقش الباب.. قعدت ترفض في ده وده وده.. لحد خلاص.. البنت اتعقدت كمان وحاسة إنها هتعيش عمرها كله وحدانية.. ما أنا مش هعيش لها على طول..

تقاطعها درية: ما تقوليش كده، ربنا يخليكِ ليها وتفرحي بيها، وبعدين الحاجات دي قسمة ونصيب.. وبعدين على رأي المثل.. "قعدة الخزانة، ولا جوازة الندامة"..

دلال: قسمة ونصيب ماشي ما اعترضناش، طيب وكلام الناس.. ولما يقولوا عليها بايرة ولا عانس.. ويا ريته على قد كده كنت سكت..

درية "بنبرة قلقة": خير يا أختي كفى الله الشر؟

دلال: خايفة لحد يتكلم عليها بالبطال.. يعني إيه اللي مانعها تتجوز لحد دلوقتي وهي زي القمر وحلوة إلا إذا كانت ماشية لها مع حد..

درية بفزع: لا يا دلال ما تبشريش على البنية.. يتقطع لسانه اللي يقول كده.. إنتِ بتتوهمي!

دلال: على أيامنا كانوا بيقولوا كده.. أمال هيقولوا إيه اليومين دول؟.. ينوبك ثواب يا درية إنتِ زي أختي والله ولولا كده ما كنت فاتحتك أبدًا في الموضوع.. أنا موصية أكتر من حد يجيب لها عريس.. أي عريس.. أي عريس.. مش مهم المؤهل ولا الكلام الماسخ اللي جابنا ورا ده.. المهم البنت تتستر وأفرح بيها بقى وماحدش يشمت فيّ..

درية: والله إنتِ بنت حلال.. أنا كنت هافاتحك في الموضوع ده.. "فتحي" لسه جاي من الخليج وعايز يتجوز وبيدور على عروسة.. "فتحي" ابن أختي لو فاكراه.. معاه دبلوم صنايع بس بقى حاجة تانية.. بيقولوا له يا باشمهندس!

دلال: وعنده كام سنة؟

درية: مش كبير بتاع 35 سنة يعني قريب من سن "حنان".. هاتفق معاهم على الموضوع، ونحدد مَعَاد إن شاء الله.. ومبروك مقدماً يا حبيبتي

دلال: الله يبارك فيكِ.. ربنا ما يوقعك في ضيقة أبداً.. خدي صورتها أهي!


*******

ليل داخلي- منزل أم "فتحي"

بعد العشاء تحاول "أم فتحي" مفاتحته في موضوع العروسة "حنان" التي حدثتها عنها "درية" أختها..

أم "فتحي": أخيرًا يا "فتحي" هنفرح بيك.. بنت الحلال اللي تستاهلك موجودة بس إنت تأشر..

"فتحي" باهتمام: صحيح يا ماما؟ لقيتوها؟.. ويا ترى عندها كام سنة.. و..

تقاطعه أمه: حيلك حيلك.. خالتك درية كلمتني عنها النهارده.. زي القمر ومعاها بكالوريوس علوم، يعني متعلمة تعليم عالي.. وسنها قريب من سنك يعني تناسبك..

"فتحي" يعد على أصابعه بسذاجة ليحسب فارق السن": آه سنها قريب من سني يعني بالكتير عندها 20 - 22 سنة!

أم "فتحي": فرق 15 سنة يا ابني!.. لا ده فرق 5 سنين بس وكام شهر..

"فتحي" مندهشًا: نعم قصدك 29 سنة وحاجة؟.. يعني 30 سنة!.. يعني واحدة داس عليها المترو والقطر والنقل العام.. قولي كلام غير ده يا ماما!

أم "فتحي": وفيها إيه يا ابني.. ربنا عرفوه بالعقل.. الحاجات دي نصيب.. ومش معنى إنها قعدت كل ده من غير جواز إنها وحشة.. دي بنت طيبة ومنكسرة ومعاها شهادة عالية.. وسنها قريب من سنك يعني تتجوز عيّلة تطلع عينك.. حتى شوف صورتها..

يلتقط "فتحي" منها الصورة قائلاً: آه هي - الله الوكيل- حلوة.. بس ما تلزمنيش يا ماما.. دي عندها 30 سنة عارفة يعني ايه؟.. أنا بصراحة ما أقبلش أتجوز واحدة عشان بعد كده أعالجها!

أم "فتحي": تعالجها ليه بعد الشر البنت زي الفل؟..

"فتحي": السن له أحكام يا أم "فتحي".. دول 30 سنة يعني مؤبد + 5 سنين جُنح!.. طظ في شهادتها اللي أعلى من شهادتي.. بفلوسي اتجوز بنت السلطان.. دوري لي على بنت صغيورة لسه في جامعة، تدلعني، تعدل مزاجي.. مش أصوم أصوم وأفطر على حاجة جملي كده.. انسي الموضوع ده يا ماما!

*******

فيه ناس هتتنرفز وتطلع عفاريتها لما تسمع الكلام ده!
بيتكلم إزاي الأخ اللي فوق ده.. الحكاية قسمة!
جنح؟
مؤبد؟
جملي؟!!
هي غدوة ولا جوازة؟
مش يتجوز واحدة عاقلة قريبة من جيله وسنه؟؟..

وناس تانية بيقولوا على أنفسهم واقعيين.. عايشين الواقع
طبعًا من حقه يتجوز الصغيرة تدلعه.. مش واحدة عانس!
وليه يتجوز بنت التلاتين لما تكون بنات العشرين "أكتر من الهم على القلب"؟
وليه البنت قعدت لتلاتين سنة من غير عريس.. أكيد الحكاية فيها إنّ!

البنات أنفسهم لما سألناهم عن الإحساس اللي ممكن يداهمهم لو وصلوا للثلاثين من غير زواج كانت إجاباتهم متباينة..
"أكيد كل واحدة محتاجة لوجود "هو" في حياتها، وكذلك الأمر بالنسبة للراجل.. بس لو ماجاش يعني الدنيا تقف؟.. أكيد البنت لما تكون مستقلة مادياً وعندها شغل مش هتشغلها المشكلة لفترة.. بس أرجع وأقول انها هتفتقد هذا الوجود المهم.. المهم ما تأثرش عليها نظرة المجتمع وتقبل بأي عريس والسلام عشان تهرب"..
بنت تانية كان لها رأي مختلف..
"يا خبر.. بعد الشر بعد الشر.. أقعد من غير جواز.. أنا ممكن اتجوز واحد مش حابّاه ومش طايقاه.. عشان ما آخدش لقب عانس.. وبعدين إذا ما كانش هو حنيّن.. لما أجيب عيال هيعوضوني عن حنيته.. الوحدة وحشة.. قال عانس قال"!

سيدة تزوجت بعد الثلاثين قالت:
"كانوا الأول العرسان كتير.. الظابط والمهندس و... والدي كان بيرفض لأسباب كتير مش موضوعية.. فضل يرفض يرفض.. لحد خلاص ما قربت من عتبة التلاتين.. نوعية العرسان اختلفت.. اللي معاه إعدادية واللي واخد دبلوم.. ويمكن بعد كده اختفت كمان النوعية دي من العرسان.. لحد ما بقيت أتمنى أتجوز حد معاه دبلوم أو أقل مني تعليماً عشان قسوة الوحدة ونظرات الناس اللي ما بترحمش.. وأخيراً اتجوزت.. مُطلق.. وعنده ولد وبنت.. أرحم من إني أكون عانس.."

إحصائيات العنوسة في الوطن العربي بحسب ما ذكرت (مجلة العلوم الاجتماعية) خطيرة.. لكن لنرَ الإحصائيات الخاصة بمصر الصادرة عن (المركز القومي للبحوث الاجتماعية والجنائية)

"نسبة غير المتزوجين من الشباب من الجنسين بلغت بشكل عام حوالي 30%، وبالتحديد 29.7% للذكور، و28.4% للإناث"
*******
يا ترى إنت شايف الموضوع إزاي؟
ممكن تتجوز واحدة عدّت الثلاثين؟..

ويا ترى إنتِ كبنت
شايفة إن الاستقلال المادي والنجاح العملي
ممكن يشغلك عن الزواج

ويخليكِ ما تاخديش في بالك من كلام الناس..
عانس.. أو مش عانس؟؟

ولا الموضوع مهما كان احتياج طبيعي للاستقرار العاطفي..

وإن كل ما قربتِ من الثلاثين..
كل ما خوفك من العنوسة زاد؟

مستنى ردود الاعضاء والمشاركة والمناقشة

المصدر: †† ارثوذكس †† - من قسم: الموضوعات الشبابية

[ظريف]

يعني واحدة داس عليها المترو والقطر والنقل العام.. قولي كلام غير ده يا ماما!

آه هي - الله الوكيل- حلوة.. بس ما تلزمنيش يا ماما.. دي عندها 30 سنة عارفة يعني ايه؟.. أنا بصراحة ما أقبلش أتجوز واحدة عشان بعد كده أعالجها!

كلام فتحى مظبوط 100%
لابد من شروط الجواز الناجح أن يكون العريس أكبر من العروسه مابين خمس أو سبع سنين
وأن يكونوا متقاربين ماديا وإجتماعيا وثقافيا
مشكور جدا keroo82 على موضوعك الهام

[tota_2003]

انا من وجهة نظرى لازم يكون فرق السن قريب عشان يقدرو يفهمو بعض وبعدين هوة هية كبيرة طيب ما هوة كمان كبير وبعدين اة يعنى الفلوس الفلوس بتروح وتيجى دة راى
اختكو توتا من اسكندرية

[ماروجيرافك]

اولا شكرا جدا لاثاره مثل هذه المواضيع
ثانيا انا شايف ان لازم يكون في توافق في السن و في المستوي التعليمي عشان ما يحصلش اي نوع من الخلفات نظرا لختلاف وجهات النظر الذي ياتي نتيجه الفرق في التعليم
اما من جهه الزواج من انسانه عدت 30سنه فااكيد انا كمان هبقي كبير مش معقول هكون انا الصغير وكمان اكيد هسأل عن سبب التأخر اذا كان لظروف ماديا فهذا مش غلط او اندماجها في التعليم فهذا يتوقف علي شخصيه الزوج لان فيما بعد هتطالب بالعمل فهل الزوج سيوافق ام لا هذا يعتمد زي ما قولت علي شخصيته
اسف جدا للاطاله (وشكلكم كده ما فهمتوش حاجه من كلامي ههههههههه

[mira smsm]

فتحى ده منفزنى جداااااااااااااااااا
هو مين قاله ان الصغيره هتقبله وهى يعنى اللى عندها 30 تموت الاهم من فرق السن هو التفاهم مرسى على الموضوع الجامد اوى اوى

[KOKO SPA]

انا كبنت اتمنى باللى بتقول عليه ياكيرو يحصل وهوه انى اثبت نفسى فى شغلى وابقى انسانه لوحدى

سورى يعنى فيه بنات كتير بعد مااتجوزت تتمنى مكنتش اتجوزت اصلا
فلو وصلت لدرجه انى اخد اى حد وخلاص لمجرد فكره انى مبقاش عانس

لا العنوسه ارحم
والناس مش هاتسكت حتى لو تجوزت ولو اتجوزت يبقى مجبتش عيال ليه
ولو ربنا كرلامنى وجبت عيال اومال هيه ليه مخاوتش وهكذا وهكذا وهكذا

[KOKO SPA]

سورى نسيت اشكرك ع الموضوع كيرو
مرسى لتعب محبتك موضوع جامد

[جاسيكا]

موضوع حلو بس مش هقدر ارد لانى
معنديش حاجة اقولها غير اللى قالوها ودا من وجهة نظرى انا كمان
ميرسى كتير كيرووو
بس معرفناش رأيك انت كمان

[SAMOOOOO]

موضوع مهم جدا جدا
والمشكله انه الموضوع بيختلف بين كل شخص والتانى
بمعنى
ان فى بنات بتدور على فلوس ومش مهم السن
وفى بنات بتدور على الشخصيه نفسها ومش لازم الفلوس
فتلاقوا على حسب البنت نفسها
بس ملخص ردى ان فى اى حاله من الحالات لازم يكون فرق السن قريب عشان يعرفو يتعايشوا ويتفاهمو مع بعض

بصراحه الحوار بتاعهم كان جميل جدا وصحيح وده اللى بيتقال بين الناس

دى رايى باختصار
وادينا هنشوف الاراء
ربنا يباركك ياكيرو

[بسوم]

موضوع جامد يهز المشاعر والقلوب المتلبده وانا من رائيي ان العنوسه مثل الشبح وهذا الشبح يتضخم بسرعه في مثل هذه الايام فياريت نتنازل شويه علشان المركب تمشي وتعبر الي بر الامن خير لك ان تتزوج رجل بلا رصيد بدلا من ان تتزوج رصيد بلا رجل اخوكم باسم