[بيشوي تامر جيد]

غالي عليك

ياربي يسوع
يالي اتصلبت علشاني انا الخاطي المخدوع
اخدت الجزية عني
دفعتها بدالي
علشان تقولي
اتفضل في ملكوتي يا ابني الغالي
انا يارب غالي عليك !!
ضحيت بنفسك علشاني
ده انا مسواش حاجة
وانت تموت بدالي ؟
انت بتقولي انا غالي عليك
ازاي يارب انا غالي عليك وأنا ماعملكش اعتبار
بطعنك كل يوم بخطيتي
بشهواتي بدق في ايدك المسمار
ازاي يارب انا غالي عليك
وادمان الخطية مضيعني
بعملها كل يوم في السر
بخاف لـ الناس تعايرني
بعملها يارب في الضلمة
بخاف لـ النور يكشفني
ازاي يارب انا غالي عليك
وانا مش مهتم بيك في حياتي
في كل وقتي بفكر ازاي
ارضي افكاري وشهواتي
بقيت غرقان في بحر خطيتي
ومش لاقي المركب اللي انجي بيها حياتي
كنت بعوم في بحر الخطية
كنت كل شوية ببعد عن شط نجاتي
كنت أبص للشط وأقول لسة
انا اقدر ارجع للشط في ثواني
وكانت المراكب حواليا
كتيرة مستنياني
كنت اسيب المركب وأقول لأ
لسة بدري خليني اغوص وأكيد هرجع تاني
لحد ما الموج اخدني
يمين وشمال يوديني
لحد ما في الآخر غرقني
ولا مركب جنبي تنجيني
يبقي غالي عليك ؟؟
غالي عليك وانا مش قادر ارجع من بحر خطيتي
كنت بصلبك كل يوم
كنت بغرس الحربة في جنبك وأقول لأ
الجرح ده مش كفاية
أجيب المسامير وأدقها في ايدك وتصرخ
لكن الخطية مامتتش جوايا
ضفرت اكليل الشوك وحضرتة
وغرستة في رأسك لحد ما وصل لآخرة
وانت تنزف ياربي وتتوجع
يبقي تفهمني يارب
ازاي انا غالي عليك
وانت مش غالي عليا
بضربك وبجلدك وبطعنك
كل ده وتحبني ومستنيني وبتبكي عليا
انا مستني ردك
انا تعبت
انا يارب الخطية اتملكت عليا
ولقيت ردك يارب
ردك اللي كله مليان حنية
بتقولي انت ابني
وانا مستنيك ترجع ليا
انت علي صورتي ومثالي
يبقي ازاي متبقاش غالي عليا
انا اضربت واتجلدت عشانك
علشان اطلعك من بحر الخطية
انا اتصلبت عشانك
علشان ترجعلي وتعود ليا
انت ابني الغالي
انت كل ما ليا
مهما عملت ومهما ضعفت
برضو هستناك وهدور عليك وهرجك ليا
ومتخافش هتلاقي المركب اللي تنجيك
كنيستي بيتي السما الأرضية
عرفت دلوقتي يا ابني
انت ليه غالي عليا؟؟

المصدر: †† ارثوذكس †† - من قسم: القسم الادبي