[keroo82]

أيه اللى بيحصل . . . ؟ إحنا جرى لنا إيه . . . ؟
في إيه ؟؟؟؟؟؟؟
إحنا بقينا عاملين كده ليه ؟
الأول كنت أمشى فى الشارع أقدر أتعرف على ولاد المعمودية من غير ما أكون عارفهم
كانت دايما النعمه منورة على وشهم
النهاردة معدش ده موجود . . . . . . . . طيب ليه ؟
قلت يمكن نظرى ضعف أو حسى الروح إنعدم بحكم خطيتى و خبتى التقيلة
المهم أكتشفت بعد كده حاجة تانية خطيرة
زمان مش من زمان أوى يعنى من 15 سنة بالكتير كنت صغير
(ما أنا عجوز شوية يعنى ) يعنى كنت واعى و فاهم
كنت دايما أشوف فى الكنيسة أثناء القداس ناس بتبكي و ناس بتخبط على صدرها بقوة
و اللى رافع إيداه لفوق و هيمان و اللى كل شوية يسجد
كان معظم الناس بتعمل كده لدرجة أنى كنت ساعات بقلدهم علشان ما يبقاش شكلى وحش
و كنت كمان حافظ أشكال الناس و أماكن وقوف كل واحد فيهم و كنت كل مرة أدور عليهم بعينى و نادرا ما كان حد فيهم يغيب
أفتكرت الموضوع ده و أنا فى القداس بصيت حواليا لقيت الوضع غريب جدا
اللى بيبص فى السقف و اللى مستعجل و عمال يبص فى الساعة و اللى مطلع الموبيل من تحت لتحت
و اللى بيتودود مع اللى جانبه و اللى عمال يبص على السيدات و البنات ( ما تقلقوش فهناك من يبادله النظرات على الجانب الآخر )
و اللى شغلاه اللمبة المحروقة فى النجفة أو سرعة المروحة . . . . . إلخ
منظر غريب جدا دورت علشان ألاقى حد من الناس القدامى أو حتى حد يكون بيقلدهم لكن للأسف لم أجد
فحزنت و تأكدت أن الموضوع ليس ضعف بصر منى أو إنعدام إحساسى الروحى (اللى هو معدوم أصلاً )
فصرخت و قلت يارب هو فى إيه . . . ؟!
إحنا جرى لنا إيه . . . ؟!
الدنيا بقت مولد كده ليه ؟مليان أشكال و ألوان و أفلام و مواويل و مهرجانات و خدمات
و أحنا يارب غلابة تايهين كغنم بلا راعى
السكينة سارقانا فاكرين أن طالما كل الناس بتعمل كدة يبقى أحنا فى السليم ..... !!!!!!!!!
بس يارب إحنا محدش بيدور علينا محدش واقف جنبنا
لقيته بيقولى
- أنا كمان الكل سابونى أهلى و عشيرتى و حتى تلاميذى هربوا فى ساعة ضيقتي
- يعنى ياربى لما خروف يتوه تبقى غلطة الخروف ؟؟؟؟؟؟؟؟؟؟
- الخروف لازم يدور على صوت الراعى الحقيقى ويميزه ما يتكلش على رعاة يضيعوه لأنه هو اللى هيضيع فى النهاية أنا وضعت فيه روحى علشان يميز
- طيب يارب نميز إزاى ؟؟؟؟
- الجواب فى الأنجيل " من ثمارهم تعرفونهم "
- طيب و أنت فين يارب فى كل ده
- "هنذا واقف على الباب و اقرع ان سمع احد صوتي و فتح الباب ادخل اليه و اتعشى معه و هو معي "(رؤ 3 : 20)
أسمعنا يارب صوتك أدينا يارب دايما يكون باب قلوبنا مفتوح ليك وحدك يارب لتشاركنا يارب حياتنا و تحل فينا و تملأنا . . . . . آمين
أخيرا
أرجوكم يا أخوتى الأحباء و أتوسل إليكم و أبوس رجليكم
أنتبهوا لخلاص نفوسكم محدش هينفعكم ساعة الدينونة ساعتها محدش هيشيل اللوم عنك و لن تجد أى عذر أمام الديان المخوف العادل
السنين بتجرى و العمر بيتسرق مننا
دوروا على يسوع بنفسكم بشخصكم محدش يتوسط بينك و بينه أعرفه أنت بنفسك أمسك إنجيلك ده رسالة شخصية منه إليك هو مستنيك جواه
أمسك فى وسائط النعمه لأنه هو وضعها لنتحد به
صدقونى محدش هينفع حد ما تضيعوش الوقت صلوا لأجلى جميعا ليعطينى الرب توبة جديدة
و أنا أمام المسيح أصلى من أجلكم .

المصدر: †† ارثوذكس †† - من قسم: المنتدى العام

[كيرو رافت]

بجد يا كيروووووووووووووووووووووو ووووووووووووووووو
انت فعلا ابكيتنى صدقنى انا فعلا دموعى نزلت وانا بفتكر
الذمن الجميل لانى عشت المرحله دى كلها
وتأملت فى كلامك لقيت اللى كان فعلا بيخبط على صدرة لدرجه كنت بتالم وبخاف عليه
فعلا راح فين دا كله دا احنا بنخاف نرفع ايدينا واحنا بنصلى دلوقتى
بنتكسف احسن حد يشوفنا رافعين ايدينا يقول ايه العبط ده
حاجات كتير بقينا بنعملها روتين
وبنتمنى القداس يخلص بسرعه موش مستحملين نقف نكلم ربنا ساعه ولا ساعتين
بجد ربنا يرحمنا كلنا

[الناى الحزين]

بجد فعلا موضوع فى غايه الجمال
شكرا يا كيرو على الموضوع المهم

وفعلا فى حاجات كتير افتقدناها اليومين دول

بس اظاهر اننا فعلا انعدم فينا الاحساس الروحى

ربنا يهدينا ويقوينا

[وردة حزينة]

أنتبهوا لخلاص نفوسكم محدش هينفعكم ساعة الدينونة ساعتها محدش هيشيل اللوم عنك و لن تجد أى عذر أمام الديان المخوف العادل

الكل بقى ملهى فى مشاكله وتعبه وامنياته واحلامه بس وسط ده كله الواحد نسى ان فيه رب كبير احن مننا علينا وانه هايجى وهانقف قدامه وسعيتها ياترى هانقوله ايه هانقوله ظروف ولا تعب ولامشاغل هايقولنا انت بلا عذرا ايها الانسان ادينا يارب اننا نقف قدامك بلا لوم وخلينى اقولك امسك يدى وقدنى كما تشاء لساعه اختطافى الى السماء
الصراحه ياكيرو موضوعك ده خلانى افكر بصوره تانى
الف شكر ليك ويارب الموضوع ده يكون سبب بركه ونعمه لينا

[zaza2006]

موضوع مهم جدا يا كيرو الناس فعلا اتغيرت وبعدت عن ربنا مفيش ايمان زى زمان ربنا يهدينا (ارحمنى يارب انا الخاطىء)

[مرمر]

مرسي اوي اوي الموضوع فوق الرائع
ربنا موجود
ربنا يبارك

[maro$$]

بجد ياكيرو بشكرك على الموضوع لاننا لازم نفوء من اللى احنا فيه وللأسف اننا بنكون سبب عثرة لغيرنا وبنكون رمز للاطفال لما يشفونا بنعمل كدة واحنا خدامهم وقدوتهم وانا فعلا شفت بنفسى خادم كان بيطلب من طفل فى القداس انه يبطل كلام كان الرد الطبيعى من الطفل :_ انت بتتكلم وبتقلى انا اسكت .....اسكت انت الاول

[kottah_sh]

بجد ياكيرو انت تحفه ومواضيعك كلها هادفه جدا ومفيده وبتخلى الواحد يفكر مليون مره فى تصرفاته بامانه الوقت اللى مش ببقى قاعده فيه على النت بقعد افتكر مواضيعكوا وافكر فيها وانا بعمل ايه ومش بعمل ايه وبحاول اغير من نفسى
بجد ياكيرو الواحد لازم يفكر ويرجع لحضن ربنا ميرسى على موضوعك ده اللى ايقظ ضماير كتير وقلوب ميته ومفهاش احساس روحى

[RoZaLeTa]

موضوع فوووووووق الرائع بجد ...
تحفة فعلا وبيحصل
ربنا يرحمنا
وربنا يباركك ويعوض تعب محبتك