[M!SS N@NO]

رخم وغلس وغاوى نكد

ومش ممكن يطيق يشوف حد فرحان فرح حقيقي

يا ساتر يا رب

عنده كميه من الحقد والغيره من كل اللي حواليه

يكره ان اي واحد حتي ولو مجرد يبتسم لسبب فرح حقيقي
وبيشكر ربنا
اللي يبتسم يبقي يومه اسود

الغريبه انه عنده قدره عاليه علي انه ينكد ع الناس

* بس لو عرف ان في واحد ناجح وفرحان في عمله و بيشكر ربنا علي نجاحه
علي طول يروح مدبر له بلاعه مفتوحه في طريق
أخينا الناجح يدحرج فيها يتكسر عضمه
ومش بس كده يروح كمان مدبسها وملزقها بحرفنه في واحد تاني وممكن يكون من حبايب اخونا الناجح
ويوقع بينهم ويعمل مشاكل لا حصر لها

* طيب خلي واحده من الامهات اللي في الشله تفرح بأن ابنها اتعلم المشي بسرعه وقالت بسم الصليب عليك اشكرك يارب علي ابني الجميل ده
فجأه تلاقي الولد سخن وبيعيط ويجروا بيه ع الدكاتره وهاتك ياعلاج ويا دوا والولد وهو بيعيط يشيلوه علشان يسكت
قوم ينسي المشي اللي اتعلمه ويلزق اكتر في ماما

* لو كنت زعلان مع واحد قريبك وجات فرصه انكوا تتصالحوا (اتقابلتوا صدفه في فرح ولا جنازه وجات قعدتكوا جنب بعض )
وانتهزتوا الفرصه واتصالحتوا
و فرحت و شكرت

ربنا انك اتصالحت مع الشخص ده وبكده هتقدر تتناول وانت مرتاح
تاني يوم تلاقي المدير بتاعك يتلكك لك علي هفوه ويخصم لك يومين
تقعد بينك وبين نفسك تلعن وتسب للمدير وللشغل وتعيش في نكد
تغصب على نفسك وتعصر عليها ليمونه وتغلب خجلك

* تروح تعترف وتقرر انك تبطل خطيه واحده من الالف اللي متعود عليهم
او تقرر انك تبدأ تصلي ولو ابانا الذي في السموات مره واحده في اليوم

يعني مش قرار توبه كامله ولا حاجات كبيره وخطيره
وترضي بالقليل ده و تفرح و تشكر

ربنا

تخرج من عند ابونا تلاقي المنتظرين دورهم يزعقوا لك علشان اتأخرت دقيقتين زياده وهم وراهم مصالح
يخلوك تتنرفز وتشتم في سرك وتقول بلاها اعتراف تاني

* كمان لو يوم ربنا هداك وغلبت نفسك و صحيت بدري للقداس
وابونا يصلي قداس معزي ويخليك تحس انك في السما و فرحت بيه وشكرت ربنا علي الصحيان وعلي القداس والتناول
اول ما توصل البيت تلاقي تليفون من واحد حبكت معاه النهارده ينكد عليك
ويفكرك بهموم انت علي الاقل النهارده ناوي تفرح بربنا وتنساها
وممكن كمان تتهور وتكدب علشان تهرب منه
وترووووووح فرحه التناول

طبعا امثله الغتاته كتيره جدا جدا جدا جدا
الغريبه ان الرخم الغلس اللي غاوي نكد اياه احيانا نتصاحب معاه ونكون اعوان ليه وننكد احنا بالنيابه عنه علي نفسنا وعلي حبايبنا في لحظات فرحهم الروحي
يعني مراتك تصحيك انت وعيالك وتكوي كل هدومكم و تلبسهم كلهم
وانت قاعد باشا
وبعدين سعادتك تتخانق معاها انها اخرتكم في الخروج

لما تكون في اشد احتياج روحي انك تفتح صفحه المنتدي او موقع كنيسه والنور يقطع او النت يفصل

او او او

ماهو الرخم الغلس اللي غاوي نكد اياه بيكره يشوفنا فرحانين بربنا
او اننا نشكر ربنا ونغيظه

علشان كده واقف لنا مستني الواحد فينا بس قلبه يفرح او عينيه تترفع لفوق


لكن ولو

مهما عمل ومهما حاول
مهما نكد علي بانه يفكرني بهمومي او بانه يبعت لي جواباته الرخمه


ها افرح بربنا
ها اشكر ربنا


لسببين

اولا لان ربنا يستحق الشكر والفرح بعطاياه

ثانيا لاني انا كمان معاند دماغى ناشفه وما احبش انهزم من الرخم الغلس اللي غاوي نكد

المصدر: †† ارثوذكس †† - من قسم: التأملات الروحية والخواطر الفكرية

[Team Work®]

حلو قوى موضوعك يا جنان شكرا ليكي

[M!SS N@NO]

ده الموضوع هو اللى جنان مش انا يا هيما
أنا اسمى حنان
جبتلى نقطه
ههههههههههههههههههههه
ميرسى على مرورك الجميل يا هيما
ربنا يباركك ويعوضك

[Team Work®]

هههههههههههه

انا اسف غلطة مطبعية بس اصلحها ولا

[M!SS N@NO]

لا تصلحها ايه بقا
ده كده الاوشاعه تثبت عليا
كل اللى يدخل الموضوع يقول البت
بتكلم نفسها
اكيد اتجننت

بس خد بالك بعد كده

[نبيل نصيف جرجس]

منورة يا حنان بمواضيعك الجميلة من عنوان الموضوع استغربت
بس لما قريتة فهمتة بجد جميل اوى ربنا يملانا بروح المسيح علشان يبعد عننا الغلس والرخم والغاوى نكد دا
ربنا يحافظ عليكى ويخليكى لينا فى المنتدى ويحافظ على كل اخواتى يا رب ونبقى اسرة واحدة كدة دايما

[M!SS N@NO]

ميرسى يا نبيل على مرورك وردك الرائع
ربنا يبارك حياتك

[اس اسامة عوض]

جنان يا جنان
حقيقى جميل جدا
يارب تكونى بركة

[أميرة عبده]

حلو اوى الموضوع يا جنان بجد جميل عجبنى اوى وبعدين بصى لما هيما القائد بتعنا يقولك يا جنان لازم كلنا نطيع القائد يا ماما مش ناقصين ناخد مخالفات حتى لو اسمك الصح عرفاه اكتر من القائد بردو ملناش دعوة
كل سنة وانتى طيبه يا احلى جنان

[M!SS N@NO]

ههههههههههههههههههههههههه ه
يالهوووووووووى
ايه يا اسامه
ايه يا اميرة
حرااااااااااااااااااام عليكو
جنان ايه بس هتجننونى بجد
ههههههههههههههههههههه
ميرسى ليكو على ردوكم الجميله
ربنا يبارككم