[3AMANOEEL]

سلام رب المجد ليكم جميعا
اولا احب اعرفكم بنفسى طالب فى السنه النهائيه بكليه العلوم كنيستى تابعه لحبريه نيافه الانبا بيشوى..............
قولتلكم كده ليه فى الاول لانى بقالى اربع سنين فى الجامعه ومش هتحرج من حد منكم مبعرفش انى اكلم بنت زميلتى اختى فى المعموديه ازاى .............
ليه لان الانبا بيشوى ربنا يطولنا فى عمره بجد مانع عميه الاختلاط ...انا مكنتش عايز يبقى فيه اختلاط عشان اروح اقف مع واحد او واحده زميلتى اتكلم معاه او معاها فى الفاضى واسيب محاضراتى انا ببساطه جدا كانت كل احلامى ادخل عن طريق الجامعه اسره فى الكنيسه اتعرف من خلالها على اب اعتراف لانى لحد الان معنديش اب اعتراف وانا هخلص الكليه خلاص ...............
كان نفسى ادخل كورال اقف فيه جنب اختى فى المعموديه لكن الاباء فى الكنيسه حسسونا ان انى هبى واقف جنب عدو مش اخت ...........
حولنا نكلم البنات عندنا حسسونا ان احنا ولا نسوى
يبصولنا باحتقار او يبصولى انا باحتقار مش عارف يمكن انا الوحيد اللى شايف كده
ويروحوايكلموا الناس الغربا عن البلد ويمشوا معاهم
فى الجامعه عادى يعنى .......................
كان من ضمن احلامى برده احضر سبحه الانبا يوانس مره فى الزيتون ......
نفسى مش اسلم عليه ....اشوف بس قداسه البابا عن قرب
وانا فى الثانويه مثلا اقول لوالدى اسافر مصر احضر المحاضه لاسبوعيه يقولى لالالالالا المذاكره
فى الكليه كان نفسى اطلع من خلال اسره جامعيه تابعه للكنيسه بس محصلش لييييييييه............
القسم بتاعى فى الكليه مفهوش ولا طلبه من اولى لرابعه ولالالا دكتور مسيحى واحد يبقى ذى سند لى ده حتى الدكتور المسيحى الوحيداللى كان فى القسم وكانا استاذ متفرغ عنده 70 سنه ماااااات وانا فى سنه اولى يالالالالالالالالا الله ينيح نفسه هتيجى عليه هو يعنى
زمايلى يقولولى ليه مدخلتش طيب اسره من الاسر الكنسيه التابعه لكليتك
دول زمايلى اللى من عندنا من البلد
بس زمايلى دول جالهم دعاوى من الشرفين على لاسر فى الكليات او رؤؤساء الاسر من الطلبه فى الجامعه انا بقى محدش عبرنى خالص لسبب واحد ليه لانى لوحدى ولحد الان انا فى سنه رابعه اهوولسه برده محدش مسيحى دخل القسم ده
انا مكنتش عايز ادخل اسره عشان يبقى معايا نمره وايميل فلانه وعلانه كنت كل اللى انا عايزه كشاب داخل على مرحله جديده بتتغير فيها مشاعرى عندى بالفطره ميل للجنس الاخر كان نفسى افضى الغريزه دى انى اتفق مع زميلتى اقولها ايه رايك فى الترنيمه دى مثلا.............ايه رايك لو نطلع نقولها مع بعض فالاجتماع الفلانى ............لو واقفين مجموعه مع بعض شباب وشبات نتفق مثلا هنعمل التسبحه النهارده مع بعض...........بقول كده ليه لانى لما بقول لزمايلى كده فى البلد .........اللى يضحك على شويه و اللىيقولى يا قديس لدرجه ان هما مسمينى ابانا فى البلد
يقولولى اذيك يا ابانا مع انى كنت بحب التسبحه الاول دلوقتى خلاص بقت روتين عادى .........................اكون لسه حاضر التسبحه وافتح الكمبيوتر بليل على السكه اللى يروح فيها ميرجعش وارجع اعمل التسبحه تانى عادى.....................اسمع كلمتين اتاثر اوى ......وارجع للى انا فيه تانى
يمكن لو كنت دخلت اسره كنت ممكن اشغل فراغى احضر ترنيمه مثلا اتفق مع زميل او زميله على نعملها فى اجتماع الاسره مثلالا ..............................معلش طولت عليكم اوى بس عايز ردود معلش سامحونى عشان فعلا انا خلاص
فى واحد زميلى على فكره غير لكاثوليك بسبب المواضيع دى اللى عدم لاختلاط وةعم الاهتمام من الاباء الكهنه وسيدنا الانبا بيشوى اللى بيبص لناس تانيه غيرنا مع اننا اساس ايبارشيته ..................ارجو الرد لو قبلتم كلامى لانى فعلالالالا فى مشاكل نفسيه كتيره مش مشكله واحده وخلو بالكم انى انا خلاص هخلص جامعه كنت بحلم فى سنينها انى اعمل حاجات انا شايفها بسيطه فى نظرى مطلبتش مال مثلا وانى انا ابقى اروش واحد فى الجامعه عشان البنات تجرى ورايا دول شويه احلام فى حدود الادب والمعقول ..............................................
على فكره لسه فى تانى لو كان ليكم صدر يتسع لكلامى الجهورى والصريح واللى مش عارف فى حدود الادب ولالالالا لق بس كفايه اوى كده انا كده شيلتكم كتير اسيب الباقى لاخواتى ......................
سلام ونعمه

المصدر: †† ارثوذكس †† - من قسم: حوار من الاعماق

[emmmy]

انا مش فاهمة حاجة يعنى اية سيدنا مانع الاختلاط نهائى مينفعشى
طيب ممكن سؤال الانبا بيشوى دة رئيس دير القديسة دميانة البرارى وسكرتير المجمع المقدس
بص انت بما انك شاب فى نهاية المرحلة الجماعية تقدر تعرف انت عايز اية وتقدر تحدد شخصيتك انت بنفسك لما كنا صغيرين كانوا اهالينا بيسقونا التعاليم واحنا بنقبلها زى ما هى صح بقى غلط مش مهم لاننا مش عندنا القدرة على التمييز لكن لما كبرنا اتغير كل شئ وبقينا لينا شخصيتنا المستقرة بتاعتنا احنا
فى وسط كلامك بتقول لما بسافر مصر انت منين اصلا على فكرة الهدف من السؤال هو سؤال تانى هل المجتمع هو اللى بيحكم طبيعة العلاقة بين الولاد والبنات ولا انتوا اللى مش عارفين تتعاملوا نع بعض صح بمحبة واخوة وبراءة واحترام ومشاركة بروح المسيحية فى اى مجال سواء خدمة كنيسية او غيرها
بص اعمل انت الصح وابدا واشرح وجهة نظرك لاب اعترافك ولو ليك علاقة مباشرة مع سيدنا اتكلم معاة اية المشكلة ويا تقنعة يا يقنعك وفى تلك الحالتين انت هرتاح نفسيا ---- على الرغم من انى شايفة انك بتبالغ شوية فى وصف المشكلة لكن هقولك انت كمان محتاج تقعقد مع نفسك وتحدد هدفك وطريقتك ووجهة نظرك وانت عارف الابعاد والمشاكل اللى هتواجها بكل اقتناع وشجاعة ويمكن تكون انت سبب التخلص من الوضع الخطا دة يمكن الصواب يبدا بيك
حاول وجرب وابقى طمنا على الاخبار واحنا كلنا تحت امرك
ربنا معاك ويبارك حياتك

[marian magde]

:em0400:اولا سلام المسيحعليك عشان يساعدنا فى حل المشكلة الى بس بقوة ربنا وحبك لية هتروح ماتقلقش بجد صدقنى انا دلوقتى متخرجة من تجارة القاهرة ويعتبر نفس المشكلة دى قبلبتنى بس دة عادى عودت نفسى انى اهيئ نفسى مع الظروف ثم انت خوفك من بعودك عن رنا دة حاجة كويسة وكفيلة تخليك اقوى من كدة بكتير فحاول تفوق من لخوف وثق فربنا قوىى وكمان ثق فىى حبك لمسيحك وانك مش هتعمل حاجة تزعلوا منك وصلى وصوف وماتفكرش كتير وربنا هيساعدك وربنا معااك ومعاننا

[abir]

عدم الاختلاط نهائى دة غلط كبير لأنه بيوصل لحاجات مش كويسة خالص بسبب الكبت لكن الاختلاط من خلال الكنيسة والأهل وفى جو مسيحى نقى بيخلينا أسوياء نفسياً لانه بيعلمنا ازاى نتعامل مع بعض كاخوة وأخوات .. ربنا معاك يرشدك ويحميك

[3AMANOEEL]

اخواتى فى المسيح.............emmmy
marian magde
abir

سلام ونعمه رب المجد يسوع معاكم .............اشكركم جدا لانكم عبرتونى ورديتم عليا ............. ومتاسف جدا لتاخرى فى الرد عليكم
اختى ايمى ............
ايوه فعلا هو الانبا بيشوى رئيس دير القديسه دميانه وسكرتير المجمع المقدس
وفعلا سيدنا مانع الاختلاط نهائى
معلش اظن ان حضرتك مفهمتيش انا كنت اقصد ايه
بقول لحضرتك انا فى نهايه المرحله الجامعيه يعنى ذى ما بيقولوا سنهه وهخلص وندخل فى معترك الحياه .........................
بيقولولناكمان احلى سنين عمرك هى سنين الجامعه ................
كنت كل اللى عايزه فيها او كنت بحلم بيها شويه حاجات بسيطه زى ما شرحت قبل كده ماظنش كان صعب انى ادخل فى كورال و ادخل فى اسره كنسيه تابعه للجامعه وشرحت ايه الاسباب الى منعتنى ................
معلش اطول عليكى واحكيلك موقف صغير ...............
بقالى 4 سنين دلوقتى نوصل التصفيا ت الخاصه بالكرازه فى مركز العجمى بندخل دايما الحان .....فالفريق بتاعنا كان كل سنه بيقل عن السنه اللى قبليها علشان كان زمايلى اللى بيسافر يشتغل واللى معتش ليه نفس يحفظ الحان بسبب اللى حاصل فى الكنيسه وخصوصا من الاباء الكهنه .......
المهم ....كان ممكن نكمل الفريق من البنات ........مش يب او حرام نيجى نقول لابونا يقولنا ممنوع نقول لطاسونى يكون هاين عليها تضربنا ...مش دى المشكله الشكله لما كنا بنروح هناك فى العجمى اتفرج على الفرق الاقى البنات ماشيين مع الولاد اخوات مع بعض بيقولوا فىتناسق جميل جدا اقول اشمعنا ا انا
الاقى ناس جايين فى كورال ولاد وبنات اخوات مشيين مع بعض برده اقول اشمعنا انا
المهم بسسبب كل ده انا واحد من الناس قررت انى معتش داخل المهرجان لانى لا بحس بروح المشاركه ولا بروح الحماس ولا بروح الحب ما بين الاخوات اللى بيتكلم عنهم الانبا موسى دايما ...................دى نقطه
النقطه التانيه اختى .
فى كلامك(ولو ليك علاقة مباشرة مع سيدنا اتكلم معاة اية المشكلة ويا تقنعة يا يقنعك وفى تلك الحالتين انت هرتاح نفسيا ) منين الاقى العلاقه المباشره ومين مع سيدنا الانبا بيشوى هو فاضيلى ولا فاضى لامثالى اسمحيلى اختى ده بعي جدا
يمكن انتى مش حساها عشان الاب الاسقف اللى فى بلدك انتى قريبه منه شويه .............بلاش دى كن بييجى يزوركم كتيرفى الكنيسه عشان كده مش حاسه بالفرق ده
على العموم اختى شكرا على ردك وتشكر جدا لاخواتى
marian magde
abir

اختى abir......................
هو فعلا الموضوع سببلى مش مشكله دى مشاكل كتير

..............
بكرر تانى يا جماعه شكرى ليكم ولو انى كان نفسى ان كل اخواتى بنات وولاد فى القسم ده فى ارثوذوكس يردوا عليا ذى ما بيردوا على بقيت الناس ولكن واضح ان الموضوع مفرقش معاهم فى حاجه .............تمــــــــــــــــ� �ــــــــام زى الاباء الكهنه اللى فى البلد ما بيعملوا...................... معلش اصل احنا منسيين شويه
..................سلام ونعمه

[emill]

يبنى اعتمد على نفسك
ملكش دعوة بحد انت كبير مش صغير

[جوسيكا]

سلام ونعمة
كلنا بنحس بالفرغ العاطفى
ارجو منك ان تتكلم اكثر بما تحلم بة
لانى شعرت بان كلامك يريحك
حاول تفتكر الحجات الكويسة فى حياتك اللى فاتت وافتكر امتى ربنا كان معاك فى الامتحان
افتكر يوم مكنت تعبان
وقول لنفسك لية انت جيت الدنيا ولية الانسان بيعيش
انا عندى الرد بس احب تفكر شوية ورد على
اختك فى المسيح

[3AMANOEEL]

اخويا فى المسيح emil
ااولا متاسف لتاخرى فى الرد لظروف امتحاناتى
ثانيا شكرا لانك عبرتنى ورديت عليا
الى انا بقوله حبيبى متالوش دعوه بالاعتماد على النفس من عدمه او الكبير والصغير انا دلوقتى بتكلم عن وضع سببلى مشاكل بالنسبه لى انا لو حبيبى ترجع لاول الموضوع بتاعى وتقرا تلاقينى كاتب الحقوووووووووووووووونى قبل سكه اللى يروح ميرجعش لانى فعلا مشيت فيها ومش عارف اطلع حبيت اعرض عليكم مشكلتى هنا فى المنتدى اعتبرتوه موضوع مش مهم ومفيش حد رد عليا برد يقنعنى لحد الان على العموم انا حبيت اعرض الموضوع وخلاص واشوق يمكن الاقى عندكم الحل لانى فعلا تعبان
..................يمكن مشكلتى مبتمسلش فارق كبير بالنسبه لكتير من الناس اللى بتدخل المنتدى ده بس بتمثل معايا انا فرق كبير
على العموم شكرا على ردك


اختى وحبيبتى فى المسيح جوسيكا
اشكرك بجد على كلامك لانى فعلا برتاح فى الكلام لانى زى ما قولت فى اول كلامى ملقتش ده فى الجامعه واهى فتره الجامعه عدت وحاسس انى لوحدى برده ...........
اضحكك على شويه وياريت اخوانى واخواتى اللى ردوا على فى الموضوع ده يقروا برده الجزء ده
تعرفى انا كانت كل احلامى ايه الاقى زميل وزميلات ليا فى الجامعه فى حدود الادب و الاحترام نبقى اخوات مع بعض اتفق معاهم مثلا يالا يا شباب هنعمل النهارده لما نروح من الجامعه التسبحه فى الكنيسه
جربت ده مع اللى يعتبروا مع زمايلى اللى فى البلد عندنا ضحكوا عليا
كان نفسى فعلا اعمل تسبحه مع زمايلى وواقف معانا بنات برده بيقولوا ............اخوات لينا مش اعداء ده واحد من الاحلام اللى استكترتها عليا اختى emmyلما ردت عليا وراحت بالموضوع لسكه تانيه خالص
على العموم اشكرك على ردك

[ميمو عماد]

انا على العموم حاسه بمشكلتك حاول اشترك تبع مناطق غير بلدك لانها منغلقه على نفسها دور على حد من اصحاب فى بلد اخر اشترك ونمى مواهبك فى مكان غير بلدك
انا عارفه انك كده لوحدك بس حاول انك تكون اجتماعى اكتر من كده وربنا معاك
وممكن تدرس فى مدارس احد اطفال وتنمى فيهم روح التعاون والمشاركه اللى انت اتحرمت منها