ساعدونى انا عجبنى ردكوا اوى على المشاكل وارجوا تساعدونى بأختصار انا كنت بحب حد وكنا اصاحب فى الكنيسة ولما قالى قولتله انا مش معترضة عليك بس فى اعتراضات ممكن البيت يرفض عشانها هو كان دراستة معهد سنتين وانا طالبة جامعية وكمان مكنش شغال فى شركة المهم وقفت جنبة لغاية مادخل الجامعة المفتوحة وهو كمان كان عاوز يدخل مش انا اللى اقنعته هو من نفسة ودخل كمان شركة وقلنا الاب اعترافنا ووافق لكن لما قولنا فى البيت عندى البيت رفض كلهم مفيش حد وقف فى صفى كلهم شايفينة مش مناسب وانا حولت اقنعهم لكن للاسف مش كانوا بيسمعوا ليا واتقفل الموضوع وبقاله دلوقتى 6 شهور وانا مش قادرة انسى بس فى حاجة هو طلب من واحدة صديقتى انها تعرف انا ايه نسيت ولا لا وصدقتى دى قالتلة مش عارفة اقولك ايه ومنها فهم انى نسيت بس انا منستش وهى قالتلة كده من شهر ولسه قايلة لى الكلام ده دلوقتى طبعا انا اضيقت وطلبت منها تفهم منه هو فهم ايه قالها انا فهمت انها نسيت وبعدين خلاص الموضوع فى ايد ربنا وانا مش هتكلم فية تانى تفتكروا انا ممكن اعمل ايه انا مش قادرة انسى واسفه لو كنت طولت ارجوا الرد عليا ولو فى حاجة مش مفهمومه قولولى على العم انى انا عمرى 21 وهو 22

المصدر: †† ارثوذكس †† - من قسم: حوار من الاعماق

[ظريف]

المشاركة الأصلية كتبت بواسطة غير مسجل لما قولنا فى البيت عندى البيت رفض كلهم مفيش حد وقف فى صفى كلهم شايفينة مش مناسب وانا حولت اقنعهم لكن للاسف مش كانوا بيسمعوا ليا واتقفل الموضوع

للأسف إنتى بنت مش ولد يعنى لازم تسمعى كلام البيت وماينفعش تتصرفى بدون موافقتهم وربنا يدبرلك الصالح وأكيد البيت عاوزك أحسن واحده فى الدنيا ...... ولاتنجرفى وراء قلبك وتضغطى على أهلك...... أما موافقة الآب الكاهن مش مقياس لأنه بيخاف من أن تتزوجوا من خلف أسوار الكنيسه لأنه بيعيش مشاكل كثيره

[megomagamego]

أختي العزيزة
علي فكرة أنا كمان عضو جديد وإسمي ماجد وماعنديش خبرة روحية كبيرة زي بقية إخواتي في المنتدي لكن أنا إختبرت حاجة في موضوع جوازي وهي صوت ربنا ... إزاي أنا أسمع صوت ربنا في أي موضوع مش شرط يكون إرتباط ... قد يكون مشروع أو أي حاجة تانية
المهم صوت ربنا بيحل المشاكل ... صوت ربنا بيسهل الأمور الصعبة ... صوت ربنا بيريح النفوس ... صوت ربنا بيعطي الفرح للقلوب ... صوت ربنا بيوفر الإحتياجات مهما كانت كبيرة
لو أخذتي كل النقاط دي ووضعتيها في قصة إرتباط أي حد هتلاقي :
1 . صوت ربنا لو الموضوع خير المشاكل تتحل بل بالعكس مش هيظهر مشاكل ولو ظهرت بتكون طفيفة وحلها سهل وبتتحل علي طول ... ولو صوت ربنا إن بلاش الموضوع ده هتلاقي المشاكل ومش هتعديها .
2 . صوت ربنا بيظهر في مدي قبول الأهل لبعضيهم ... لأن خلي بالك لو تم الإرتباط بشاب أهلك رفضينة هتقابلك مشاكل كبيرة جداً وأهمها إنك مش هينفع تروحي زيارة إنتي وزوجك لأهلك ولو روحتي زوجك مش هيبقي مرتاح للمعاملة وجايز يمنعك من الذهاب لأهلك ... وما أكثر الإحتياج للأهاك قبل وبعد الزواج وبالأخص بعد الزواج وخال الأولاد هو أخوكي وخالتهم أختك وجدتهم مامتك وجدهم باباكي فهل الأولاد دول هيبقي ليهم أعمام فقط بدون خال وخاله وهل هيبقي ليهم جد وجده من طرف واحد ... أكرم أباك وأمك لكي تطول أيامك علي الأرض .
مش هطول عليكي بس صدقيني لازم تسمعي صوت ربنا في الموضوع ده هل الأهل موافقين ... هل النفوس مرتاحة ... هل في مشاكل ... هل هو الشخص ده هو اللي هرتبط بيه وأعيش معاه وأنام معاه وآكل معاه و ... و ... و ... .
وأخيراً إحذري من إنك تغلقي أذنيك عن سماع صوت ربنا ... أرجوكي
أوعدك إني هصلي من أجلك أنا وزوجتي الحبيبة
أنا آسف لأني طولت عليكي أوي وربنا معاكي ويختار ليكي النصيب الصالح

[anosh]

اختى فى المسيح اهلا بيكى وسطينا و يارب نكون سبب بركه ليكى

تعالى ناخد الموضوع جنب جنب

اولا: انتى قولتى انك معاكى بكالوريوس و هو معهد سنتين
معنى كلامك ده انه واخد دبلوم و الا واخد ثانويه عامه و بعد كده معهد سنتين

ثانيا : انتى فعلا مقتنعه بيه 100% انه ده الزوج الصالح و شريك حياتك المناسب ليكى اللى ممكن تكملى معاه مشوار حياتك و تستحملى معاه مشاكل الدنيا كلها

ثالثا : انا شايفه انه شخص له ارادة قويه دليل على كده انه دخل الجامعة المفتوحة و قدر يكمل و التحق بعمل فى شركه يعنى هو عمل كل حاجه يقدر عليها علشان خاطر عيونك

رابعا : و ده الاهم اهلك فى البيت انتى شايفه ايه سبب رفضهم ليه هل
+لانه حاصل على دبلوم و انتى بكالوريوس و بصراحه ياما ناس معاها دبلوم افضل بكتير من مهندسين و دكاتره لان الواحد بشخصيته
و هو كده كده كمل دراسته
+ و الا هو مثلا سمعته او سمعة اهله مش كويسه او هو الشخص نفسه فيه عيب هما شيفينه و انتى مش شيفاه
+ و الا امكانياته الماديه قليله و انسان بسيط و والدك عايز حد يعيشك احسن عيشه و يكون مرتاح ماديا اكتر من كده مع ان الانسان ممكن يشترى الدواء و العلاج بالمال لكن مايقدرش يشترى الصحة ممكن يشترى افخم اثاث لبيته لكن مايقدرش يشترى راحة البال و السعاده
+ و الا والدك من النوع اللى لما يلاقى بنته بتحب شخص و يتقدم لها يرفض لمجرد انها على علاقه بيه كانوع من العند

بصى حبيبتى حاولى تقعدى نفسك رتبى افكارك تانى
و رتبى كلامك
علشان تقعدى مع اهلك فى البيت و تفهمى منهم بمنتهى الصراحه و من غير زعل هما ليه رافضين
و شوفى الاسباب لو كانت اسباب الرفض تافهه بالنسبه لك خلاص حاول تقنعيهم بوجهة نظرك و دافعى عن حبك
لكن لو كانت الاسباب جوهريه و لا يمكن تقبلها يبقى فكرى فى الموضوع تانى

معلش اوقات الاهل بيرفضوا و خلاص لكن مع الاقناع و الوقت و توضيح وجهة نظرك و انك هاتكونى سعيده معاه و انه مافهوش حاجه تتعيب
يمكن يوافقوا فى الاخر

بس عايزه اقولك حاجه بصراحه لو ليكى نصيب معاه هاتاخديه غصب عن الكل لان ديه ارادة ربناااااااااااااااااااااا اا

صدقينى ياما ناس اتقدمت و اترفضت و رجعت ااتقدمت تانى و اترفضت و بعد سنين اتقدمت تانى و اتقبلت و تم الجواز لان ديه ارادة ربنا

بس انتى صلى ان ربنا يدخل و لو الجواز ده فيه خير ليكى ربنا يكملها على خير و يسهل و يدبر الامور كلها
لكن لو فيه شر ليكى و مش هاترتاحى صلى ان ربنا يبعده عنك و انك تنسى الموضوع

ربنا معاكى و يقدم اللى فيه الخير و بركة ام النور تكون معاكى

[mrm29r]

اتركى الموضوع فى يد الرب

شكرا ليكوا على الرد بخصوص انى اهلى رافضين عشان شايفين انه مش مناسب ماديا مع ان بيكون نفسة وكما عشان هو معهد مش مصدقين انه هيكمل معتقدين انه اول ما يتم الارتباط ممكن يسيب الجامعة وهم عاوزين ليا حد احسن من كده انا حاولت اقنعهم بس هم مش موافقين وانا مش عاوزه اخليهم يوافقوا غصب عنهم عشان زى ما انتوا قولتوا لازم يكونوا موافقين عشان يقدروا يتعملوا مع بعض بعد كده اناسبتها على ربنا بس عاوزاه يعرف انه انا ماتنزلتش عنه وانه يسبها على ربنا ولو لينا نصيب فى بعض هيكون يعنى عاوزه كل واحد يكون شايل للتانى زكرى جميله فى قلبة للتانى عشان على الاقل لما نقابل بعض نسلم على بعض تفتكروا اتصل بيه اقوله كده ولا لا

[anosh]

بصى انتى قولتى عنده 22 سنه يعنى لسه صغير و التحق بالجامعه المفتوحه
طيب ايه رايك انك تكلميه و تقولى له انك مستنياه لحد مايخلص الجامعه و يكون معاه شهادته
قولى له انك مستنياه لحد ما يخلص و لو كان لسه عايزك بعدها يجى يتقدم تانى و لو ليكم نصيب اكيد ربنا هايدبرها
يعنى على الاقل تكونى وضحتى له وجهة نظرك و هو كمان عرف انك باقيه عليه و مستنياه
لحد ما ياخد شهادته و ساعتها ممكن تكون حافز ليه و تشجعيه و على الاقل يتقدم بعد كده بقلب جامد و صدقينى الايام بتمر بسرعه
هو كده كده سنه صغير و انتى كمان لسه صغيره
وبكده يكون سبب رفض اهلك ليه اتمحى و خد شهادته
و خلال الفترة ديه صلى ان ربنا يحنن قلب اهلك عليه لو كانت ديه ارادة ربنا
و اطلبى من ربنا انه يقف جنبه و يكون فى افضل حال علشان اهلك يوافقوا عليه على طول
ربناااااااااااااااا يدبر لك الامور و يقدم اللى فيه الخير
و يحافظ عليكى و عليه و يدبر لكم حياتكم
بركة ام النور تكون معاكم

اولا انا بشكركوا على الردود بس فى حاجة بخصوص الاقتراح اللى قالته anoshصعب انى اتصل بية واقوله كده اولا لانى مش قادرة اعرف البيت رفضة عشان التعليم ولا فى حاجة تانى ثانيا هو قدامه حوالى 3 سنوات عشان يخلص انا معنديش مشكله انى استنى لكن ازاى ونتعامل ازاى ال3 سنوات دول ولما يتقدملى حد ارفض ازاى انا عاوزة اعمل كده بس خايفة اعلق نفسى تانى وفى الاخر يترفض بردك الموضوع ياريت حد يقولى اعمل ايه

[سومية]

بسراح يابنتي انا ام + وهكلمك مثل اهلك + يجب علية ان يتقدم مش بس انت الي تتكلمي . كلمية كما كنت بتكلمية في الكنيسة واطلب منة ان تتكل معهم تاني وهم لايستطيعون ان يرفوضوابدون اسباب + وهو يوفق علي مثلا تاجيل الزوج لبعد التخرج ... واي مطالب ممكن تتحل ولكن ادمي المشيأ اي صلي وانا حسي انهم سوف يوفقوا مداما في تاجيل ولكن ارجو لا تتقبلوا غير في الكنيسة وذلك حتي لاتخصري اهلك ولا نفسيك + وربنا يحلها +++++++++++

[goneer]

سلام اختى / انا قريبة من سنك وفاهمة حقيقى احساسك والحيرة ال انت فيها من ناحية هو بيفكر فيكى ازاى دلوقتى وساعات بتفكرى فى العشرة والايام الجميلة ال قتضوها سوا يعنى الذكريات وعارفة انك ساعات بتتمنى تنسى علشان تعرفى تكملى حياتك لانك مش قادرة تزعلى اهلك منك.
وفى ناس ممكن تقولك ان شخصيتك ضعيفة مش قادرة تاخدى موقف
اوهو يتهمك انك مش بتحبية
لكن هقولك قصة حصلت حقيقى :
فى واحدة كانت بتحب شخص اووووووووووووووى وكان فى نفس ظروف الانسان ال انت بتحبية وصدقينى حاربت الدنيا كلها اوووووووووى علشانة ولان اهلها بيحبوها وافقوا بعد ضغطها عليهم وتنازلت ع حاجات كتيرة جدااااااااااااااا وكانت دايما بتصلى لربنا وتقول لة انا عاوزة الانسان دة ولان ربنا مش بيبخل ع اولادة بشئ اعطاها طلبها واتجوزتة مع وجود فرق مالى شديد لانة كان لسة بيبدا حياتة لكن صدقينى بعد 7 شهور بدات المشاكل بينهم بسبب "احساسة انها احسن منة وبسبب اهلها مكنش بيرضى يوديها نهائى مع انهم كانوا بيساعدوها ماديا وزادت المشاكل مع وجود اول طفل ومتطلباتة الاساسية ومكنش طبعا بيلحق يحوش حاجة للطوارئ"
اكيد بتسالى عن الحب راح فين تتفتكرى فى جو مليان مشاكل ممكن الحب يصمد ومايتخنقش وخصوصا لما تبان عقد الانسان بعد الجواز وطباعة المختلفة وع فكرة اى حد كدة الناس قبل الجواز غير بعد لكن لما الامور فى الحياة بتكون هادية ومفيش مشاكل مالية بيبقى حلها ممكن .
لان صدقينى المشاكل المالية فى المجتمع الحالى بتخنق اى شئ حلو
والانسانة دى كانت مشكلتها انها عمرها ماصلت وقالت لتكن مشيئتك يارب لكن دايما كانت بتقول انا عاوزة دة يعنى مشيئتى انا ومعطتش لنفسها فرصة انها تسمع صوت ربنا
وعلشان مطولش عليكى
انا سعيدة جدااااااا بتفكيرك لانة صح 100% انك سمعتى كلام اهلك ومش عاوزة تعلقى نفسك بية وطالبة مشيئة ربنا
ممكن يكون الانسان ال متقدملك دة يكون احسن وممكن اوحش ربنا وحدة يعلم بالنفوس الداخلية ولان دايما تفكيرنا محدود والحب بيخفى اشياء كتيرة
علشان كدة بقولك نصيحة وصدقينى فى كنيستى انا شوفت وسمعت قصص كتير :/ لاتكلمية ولاتبعتى حد لان من كلامك فهمت انك فعلا سايبة الموضوع ع ربنا طب ياأختى مش انت عارفة ان لو ربنا كاتب انكوا ترتبطوا ببعض راح يجمعكوا تانى مهما بعدوا حتى لو سنين طويلة لان " ما جمعه الله لايفرقة انسان"
يعنى لوهو ال ربنا عارف انو هيسعدك صدقينى هيجمعكوا تانى مهما تبان الامور صعبة ومستحيلة
قوليلة هارمى كل اتكالى عليك وانت شايفة افضل لى يارب اعملهولى
ومتحاوليش تقربى منو علشان ميتعلقش هو كمان بامل بعيد سيبوا الامر لمن بيدة الامر
وع فكرة مش هينفع ابدا تكونوا اصحاب صدقينى علشان ماتبقيش بتضحكى ع نفسك وع ربنا لانك هتتعلقى بية اكتر
صليلى انا كمان محتاجة لصلاتك ومش لوحدك اكيد ال عندك مشاكل
حتى لو فى اختلاف المشاكل بتبقى مشاكل