[zaza2006]

غريبةالناس كل الناس

وراء كل وش بتلس من تانى وش

ويقولة وش خشب وش حديد والف وش وش

وش فية رتوش واحسايس مبيزهروش

وحاجات لو تعيش او تموت مبيفرقوش

معك ومعايا شى والحقيقة شى عجيب

ازى القلب الى يحب يتولد الكرة فية

وازى رغم الوداعة نخفى بركان غضب

ولما نفرح نطير فى السماء لفوق السحاب

وفى لحظة الحزن يكسرنا ونستخبا وراء الف باب وباب

والغريب والعجيب نرجع وننسا الى كان ولا كانة كان

نرسم بسمة وضحكتنا تعلا تكسر ببان

ونزين وشوشنا ونرجع نلبس وش الانسان

غريبة الناس كل الناس

وراء كل وش فى الف وش وللحقيقة متعرفش

مساء الفل على احلى اعضاء

ده ميعاد اللقاء التاسع لبرنامج الوجه الاخر

حلقتنا النهاردة مع عضوة نشيطة ومحبوبة

العضوة

emmmy

اهلا وسهلا بيكي يا ايمى منورة برنامجنا ومبسوطين انك ضيفة معانا النهاردة فالبداية نحب نتعرف على ايمى عن قرب


الوجه الاخر : اسمك بالكامل؟

ايمي: ايمى فضل معوض

الوجه الاخر : سنك يا ايمى؟

ايمي: 30 سنة

الوجه الاخر : مؤهلك؟

ايمي: دبلوم تجارة يادوب

الوجه الاخر : ايه هى هواياتك؟

ايمي:القراءة وشغل الابرة والاعمال الفنية البسيطة وكتابة الشعر على خفيف

الوجه الاخر : ايه هى صفات شخصية ايمى؟

ايمي: خوافة ومنطوية فى بعض الاحيان مندفعة فى الرد برضوا فى بعض الاحيان
دى بعض عيوبى للاسف

الوجه الاخر : وياترى ايه سر انطواءك؟

ايمي: عادى مفيش حاجة معينة صدقينى بس غالبا بكون لوحدى
يمكن علشان ماليش اصحاب اوى كان ليا صديقة واحدة وسابتنى
بحب التامل جدا والسرحان على طول عموما دة مش دايما دة بيكون فى بعض الاحيان صدقينى مفيش حاجة ملموسة اقولهالك

الوجه الاخر : ايمي ايه هي صفات شريك حياتك؟

ايمي: مش عاوزة ارتباط مش حاسة انى نفسى فية خالص انا مرتبطة من زمان اوى من بعد ما فقدت الحبيب الارضى واستبدلتة بالحبيب السماوى خلاص مش عاوزة تانى كفاية

الوجه الاخر : الله يا ايمى صدقينى مفيش احن منه علينا

ايمى ايه هو حلم حياتك؟

ايمي: انى اخف وابقى كويسة

الوجه الاخر :انتى شايفه ليكى اكتر من وجهه لو ليكى ايه هى صفات الوجه الاخر؟

ايمي: خالص بالعكس انا مشكلتى انى مش بعرف اكون زى ما انا عايزة اكون فى بعض الاحيان انا بوجة واحد

الوجه الاخر : ايمى ممكن توضحى كلامك اكتر تقصدى ايه؟

ايمي: ممكن طبعا
احيانا بيتطلب منى فى مواقف وظروف اكون منافقة او بوشين البعض بيسميها حكمة الحيات مش عارفة بجد
ناس ببقى عارفة انهم بيكذبوا ومطلوب منى اسلم واعمل نفسى مصدقة ومبسوطة بالكلام كمان مش بعرف اعمل كدة ابدا اللى فى قلبى على لسانى وبصورة واضحة جدا احيانا بيبقى نفسى ادارى زعلى من شخص مثلا واعمل نفسى مفيش حاجة مش بعرف ابدا خالص ودة بيزود المشكلة لان ملامحى بتعبر عن اللى جوايا بسهولة
فهمتى حاجة ههههههههههههه انا دوشتك اوى ههههههههه

الوجه الاخر : هههههه لا ياقمر خالص وميرسى على التوضيح....

مين اقرب صديق لايمى فالمنتدى؟

ايمى: استاذ ايمن --- وريم --- ورافت
وعماد ---- وماريو --- ونرمو

الوجه الاخر : ايه اكتر حاجة فحياتك بتخافى منها؟

ايمي: الفشل

الوجه الاخر : وليه بتخافى من الفشل؟ هل جربيته قبل كده؟

ايمي: اااااة جربتة لما محققتش حلم عمرى

الوجه الاخر: ايمى بتثق فالناس بسرعة ولا صعب تثقى
فأى حد؟

ايمي: لا بصعوبة جدا بصراحة انا بخاف جدا

الوجه الاخر: ايه اول انطباع الناس بتاخده عن ايمى؟

ايمى: منطوية وطيبة بس انا لما باخد على حد بكون تلقائية معاة جدا على فكرة بس دة مش بسهولة صحيح

الوجه الاخر : هل ايمى حلمت بشىء لمدة طويلة وهل الحلم ده اتحقق ولا لا؟

ايمى: اااااااااة حلمت بس لا للاسف متحققشى

الوجه الاخر : نقدر نعرف ايه الحلم اللى حلمتيه مدة طويلة ومش اتحقق واسباب فشله؟

ايمي: الحلم كان الرهبنة والفشل كان لاسباب كتير اوى اهمها انى ضعفت ومقدرتش اكمل

الوجه الاخر: ايمى راضية عن نفسك بنسبة كام فى الميه؟

ايمي: انا بكون راضية عن نفسى لما بتكون حالتى الروحية كويسة وعندى رصيد سماوى فى موبيل الاتصال بالسمائيين يا نهى وبكون مش راضية عن نفسى ابدا لما حد بيزعل منى او انا ازعل من حد

الوجه الاخر: ايه رايك فالحب وهل جربيته قبل كده؟

ايمى : ااااة جربتة وماخدتش منة غير العذاب والالم

الوجه الاخر : ايمى قولتى انك اخدتى من الحب العذاب تفتكرى ده سبب سوء اختيار ولا له اسباب تانى؟

ايمي:لا مكنش سوء اختيار ولا حاجة بالعكس كان احسن اختيار لانة كان اختيار ربنا حتى لو انا مش حاسة بدة لكن واثقة منة

الوجه الاخر: ايه الكلمة اللى نفسك تحذفيها من قاموس الحب؟

ايمي: الغدر

الوجه الاخر : وهل اتغدر بيكى قبل كده علشان كده نفسك تحذفى كلمة االغدر من قاموس الحب؟

ايمي: ااااة الغدر كان من شبح الموت والزمن والايام

الوجه الاخر: ايمى لو كنتى مديرة مدرسة كنتى هتعملى ايه؟

ايمى: كنت همنع اى قسوة فى التعامل مع الطلبة ورفع الاسعار فى الدروس الخصوصية

الوجه الاخر : مين اكتر شخص مفتقداه فى حياتك؟

ايمي: اب اعترافي متفكرنيش

الوجه الاخر : ايه الكلمة اللى تقوليها ل منتدانا؟

ايمى: منتدى جميل كلة محبة وارتباط واصدقاء حلوين فى محبة المسيح التعامل ببساطة وتلقائية ومحبة

الوجه الاخر : تحبى تقولى ايه لبرنامجنا؟

ايمي:اقول برنامج جميل ومرسى يا نهى على محبتك بتدينا فرصة نتعرف على بعض اكتر واكتر

الوجه الاخر : ميرسى اوى بجد يا ايمى الحلقة دى من اكتر الحلقات اللى اتمتعت فيها بالحوار معاكى انتى حقيقى شخصية جميلة ودى اول مرة اقرب منك كده وكنت سعيدة جدا بنتمنى ان ربنا يحقق ليكى كل احلامك ونشوفك ديما وسطينا ومبسوطة.

ولو اى عضو حابب يوجه سؤال ل ايمى يتفضل وهي هتجاوب عليكم

الحلقة دى قربنا شوية من شخصية ايمى انتظرونا الحلقة

القادمة مع عضو جديد نعرف عنه اكتر واكتر
اتمنى تكون الحلقة عجبتكم

لو اى عضو حابب يكون ضيف معانا فالبرنامج يبعتلنا رسالة

انتظروا برنامج الوجه الاخر في ثوبه الجديد

قريبااااااااااااااا جدا

مع تحيات

zaza2006
magdy totti

المصدر: †† ارثوذكس †† - من قسم: الموضوعات الشبابية

[twaty]

اللة بجد يا نهى تسلم ايدك على الحوار الحلو دا
وبجد ايمى ما احلى الشخصيات فى المنتدى والحوار كان ممتع اوووووووى
وربنا معاكم وفى تقدم على طول يارب

[nermos1982]

الوجه الاخر: ايمى لو كنتى مديرة مدرسة كنتى هتعملى ايه؟

ايمى: كنت همنع اى قسوة فى التعامل مع الطلبة ورفع الاسعار فى الدروس الخصوصية

تمنعى قسوة ايه يابت؟ تعالى بس اقعدى يوم مع العباقرة اللى بديهم ونشوف بقى هاتعامليهم ازاى.قال تمنعى القسوة قال
وبعدين حددى ياختى تمنعى رفع اسعار الدروس ولا موافقة ترفعيها؟ وياريت تخافى على نفسك وتقولى انك موافقة ترفعيها .


بجد كان لقاء رائع والبت ايمى دى زى العسل بجد . ميرسى يانهى انتى ومجدى . ربنا يعوض تعبكم ومستنيين بقية اللقاءات

[aymonded]

من أورع ما أرى هو قلب إيمي الحلو الذي لم تتكلم عنه قط
ومن له الكنز في داخله ينضح على وجهه سلام ومحبة تظهر في لغة كلماته
أي لغته تظهره، وإيمي لا تُسال إنما تُعرف من القرب منها ويظهر ما في داخلها بسهولة
لا تحتاج لفحص أو سؤال لأن على وجهها يظهر كل ما في قلبها ، ولو أني لم أراها فعلياً وجهاً لوجه
ولكني أراها بسر الله الحلو الذي في داخلها يعمل لأجل مجده الخاص بالنعمة

أحييكِ يا أجمل نهى انت والمحبوب مجدب لاختياركم شخصية خاصة لن يعرفها أحد
إلا بالقرب منها في سر محبة الله وجمال صليبه الذي تحمله في داخلها
طالباً من الله بيسوع مخلصنا في الروح القدس
أن يهبها ملئ مجد حضوره الخاص كل حين
لتتقدس فيه وتصير عذراء عفيفه له
حسب سؤل قلبها المُنير بيسوع
النعمة معك ومعها آمين

[MRAMER]

اللــــــــــــــــــــــ ـــــــــــــه يا نهي علي الحلقة التحفة دي
بجد يا ايمي انتي عضوة طيبه جدا وتلقائية بطريقه جميله
وحياتك بسيطه و احلي حاجة فيها انك قريبه من ربنا وعايشة معاه

صدقيني انا لو قعدت للصبح اتكلم في صفاتك مش هخلص
وسبيني كدا كام يوم افكرلك في كام سؤال كدا

ربنا يعوض تعب محبتك يا نهي انتي ومجدي

[bassem8800370]

بجد حلقة جميله كنت معلش ياايمى انا كنت فكرك غير كده خالص بجد حلقه عرفتى بايمى من قريب وشخصيتها الجميله جدااااااااااااااااا
بس لى سوال ؟
انتى بتدفعى عن البنات صح ولا لا؟؟؟

[miro_rook]

الله بجد حلقه اكتر من رائعه وايمي من الشخصيات اللي عنده روح الخدمه للناس
ربنا يباركها
وطبعا الحلقه كانت جميله جدا

[سندريلا2009]

حلقة جميلة خاالص وايمى منورة ياقمرة وسعيدة بالتعرف عليكى وفى انتظار المزيد من اللقاءات

[ادوارد ادوارد ادوارد 3]

ميرسى يامجدى ميرسى يانهى حلقة جميلة
(وفى لحظة الحزن يكسرنا )
ان كان قاضى الظلم قك انصف الارملة...افلا ينصف الله مختاريه.....
اقول لكم انه ينصفهم سريعا .
لنتعلم الثقة فى امانة الله .
ربنا يبارك حياتكم

[la tristeza y el dolor]

انت شخصيه جميله اوى يا ايمى و طيبه بشكل ...

انا عاوز اسال سؤال بس خايف يكون صعب ,

انتى موش عاوزه ترتبطى علشان خايفه من غدر شبح الموت ؟؟