[عماد حسنى]

ده موضوع تعزئه لصديق غالى عليا جدا جدا
وفقد ابنه بعد اسبوعين من ولادته تقريبا
ومعرفتش اعزيه ولا اقوله ايه
لان الموقف كان صعب جدا جدا
وكل اللى حاولت اقوله اللى كتبته ده

ياريت كل اللى يدخل الموضوع يطلب من ربنا يعزيه ويعزى كل حزين ..

فلتكن مشيئتك

سنين ياربى بترجاه منك .. أنك تدينى هديه من عندك
سنين وانا بصرخ واقولك .. فى كل حياتى .. لتكن مشيئتك

سنين وانا ببكى بـــــدموع .. مسلملك حياتى بكل خضوع
سنين وانا فى نفس الموضوع .. اقول دا صعب بس قادر يسوع

سنين فاتت وليالى انتظار .. انا وزوجـه جـواها نـــار
نطلب نتشفع بكل الاطــــهار .. مالى قلوبنا رجاء بأستمرار

فضلنا مستنين إيمــانا يــقــين .. أنك أله حنون للمحتاجين
وشافتنا عينيك وأمرت إيديك .. انـك تدينا عشــمنا فــيك

وجه مولود جميل وهادى .. زى المـــلاك للفرح ينادى
ضمته امه ليها بحـنان .. وانا وياهم أسعد أنسان

كنا جمبه كل الأوقات .. كان بيوحشنا لو نام ساعات
بس يدوب شويه أيــام .. وفى غمضه عين سكت الكلام

بندور على أبننا راح مننا .. راح من غير مايقدر يقولنا
مقدرش يقول أنه تعــــبان .. وسبنا ورجع ليسوع الحنان

أبن ملوش أى ذنــب .. طـفل رقيق ماتعبش حد
جه ضيف أيام عالارض .. جه ومـــشىّ وفراقهُ صـعب

مش هاعترض ولا أقولك ليه .. ولا هاقــولك بــتعذب عـليه
اللى أنت خـــلقتهُ مـلكك أنت .. ويوم ماتسترده مايغلاش عليك

مش هاعترض وراح أعمل أيه .. وكـــل اللى فيا أنت عالم بيه
صنعه يديك محتاجه ليك .. جـرب وعزى باللى يرضيك

مادام التجربة ياربى من عندك .. هانحنى بشكر أنا ملك أوامرك
وقت الموت ده هو وقتك .. تمسح دموعى انا وبنتك

هاتسمح بتجارب بألم ووجوع .. عزانا كله فى شخصك يايسوع
لو حزننا ماكفهوش دموع .. لمسه منك هاتشفى الضلوع

كفايه يا أمهُ مابقتش هاضمهُ .. ماراح لحبيبه هيايخده فى حضنه
فوق فى سماه مفيش الآه .. حقنا نفرح أبننا فى حماه

هارفع صلاتى مش هابكى ف حياتى .. دا أبنى بقى شفيعى عندك
ليل نهار هافضل انادى .. أشكرك يارب فلتكن مشيئتك

هافضل أصلى مهما هايحصل .. ماسك فيك مهما يكون
مانا جربت حنيه قلبك .. وعليك أبداً مش ممكن أهون

مد إيديك لأمه كمان .. أطفى لهيب أسمه الحرمان
بدل كل الآم جواها .. بفيض تعزية وكل سلام

دى أم ضناها كان موجوع .. ساب حضنها وطلعلك يايسوع
هاجيبها وأجيلك نمسك ايدك .. هانكون وياك خاضعين بخشوع

فلتكن مشيئتك
ياربى يسوع
+ + + + + + + +

المصدر: †† ارثوذكس †† - من قسم: القسم الادبي

[nermos1982]

كلمات جبارة بجد يا عماد جميلة اوى وصعبة اوى بس نرجع فى الاخر ونقول لتكن مشيئتك يسوع
ربنا يعوضك يا عماد ويصبر والد ووالدة الطفل ده على فراقه

[عماد حسنى]

المشاركة الأصلية كتبت بواسطة nermos1982 كلمات جبارة بجد يا عماد جميلة اوى وصعبة اوى بس نرجع فى الاخر ونقول لتكن مشيئتك يسوع ربنا يعوضك يا عماد ويصبر والد ووالدة الطفل ده على فراقه

شكرا جدا جدا يا نرمين على ردك وشعورك ربنا يخليكى
ويارب يصبر كل حزين
الف شكر لحضورك

[elphilasouf]

كفايه يا أمهُ مابقتش هاضمهُ .. ماراح لحبيبه هيايخده فى حضنه فوق فى سماه مفيش الآه .. حقنا نفرح أبننا فى حماه

بركان من المشاعر الرقيقه الساميه
تعيش وتكتب وانشألله ربن هيعوضهم

[miso]

جميلة كلماتك
وربنا يعزى صديقك وباذن ربنا يبعتله اكتر من طفل
ويبقى ليهم شفيع فالسما يصلى ليهم
ربنا يعزيك زيعزى والده

[مينا ابن البابا]

ربنا يعزى الام و الاب
ويعوض محبتك يا عمده
احساسك وكلماتك
جبارين

[ايزيس سمير]

ان عشنا فللرب نعيش وان متنا فللرب نموت
ده ملاك وسافر السما وربنا يعزي والدية وربنا حنان وعندة كتيير ويرزقهم بغيرة وهم كسبوا شفيع في السما

[ميمو ايمو]

سنين وانا ببكى بـــــدموع .. مسلملك حياتى بكل خضوع
سنين وانا فى نفس الموضوع .. اقول دا صعب بس قادر يسوع


بجد كلام رقيق ويدخل القلب بسرعه
حلو اوى ياعماد
ربنا يفرحك

[kamel]

كل اللى بقدر أقولة
ملاك حضر للدنيا00 ورجع الى موطن راحتة
ولتكن مشيئتك يارب
وأقول للأسرتة لكم هناااااااااااااااااك فى السماء
ملاك طاهر يتشفع لكم عند الإلة
مشكووووووووووووور ياعمدة للمشاعر الفياضة
الرب يباركك وبسلامة يحفظك

[eng_fofa]

انا مش عارفه اتكلم عن روعة الكلمات
ولا على احساسك بصاحبك
اللى نادر ما بيحصل
فى زمن محدش فيه بيحس بحد
ربنا يعزى امه وابوه ويصبرهم
وانشاء الله يعوضهم بنسل صالح
ميرسى ياعماد
ربنا يفرح قلبك ويسعد ايامك