[رويس]

الموضوع ده انا كنت حطيته في احد المواقع من أربع سنين، ونظراً لظروف خاصة عندي فضلت أدور عليه علشان أقراه وقولت احطه هنا لعل وعسي حد يلحق ياخد باله قبل ما يندم بعد كده ويتمني الساعة ترجع شوية لورا، الموضوع باللغة العامية ونصيحة شخصية حاول تقرا الموضوع كويس وانا مش عاوز ردود من الناس - فقط عاوز قراية بصدق.

رسالة من أب عنيف وأم عصبية

احنا عارفين انك زعلان مننا ومش مبسوط في حياتك معانا وحاسين انت قد ايه متضايق من تصرفاتنا اللي مش فاهمها وبترفض تسمع كلامنا
ممكن تسمح لنا نعتذرلك عن اللي مزعلك مننا ونرجوك تسمع حكايتنا يمكن تعذرنا وتفهمنا من حوالي خمستاشر سنه ربنا بعتك لينا وفرحنا وهللنا لما عرفنا ان امك حامل فيك، الدنيا ماكانتش سايعانا وعلي الرغم من ان امك كانت قربت تموت وهي بتولدك الا ان قلبها زغرد اول ما شافتك وتحاملت علي نفسها وعملنا لك حفله سبوع ما حصلتش بين قرايبنا وفرحنا كلنا فيها.
ولما جا الليل انت ابتديت تصرخ علشان عندك مغص طول الليل سهرانين جنبك نطبطب عليك ونحاول نسكتك وروحنا بيك المستشفي وكانت ليله صعبه لغايه الصبح وفرحنا انك خفيت، طبعا لما الصبح صبح ومن غير ما انام خالص اضطريت اروح الشغل وانا تعبان ويومها المدير طلب مني شغل كتير مقدرتش اعمله كله صح واخدت جزا وكان بدايه مشاكل معايا في الشغل.
عدي كام شهر وانت بابتدت تطلع لك اسنان وكانت ايام متعبه جدا ليك كل شويه عند الدكتور وكل شويه تعب واحنا نسهر معاك طول الليل ونروح الشغل تاني يوم مرهقين وتعبانين ماما ترجع بسرعه من شغلها ملهوفه ومشتاقه تحضنك لكن كمان وراها شغل البيت
طبيخ وكنس وتنظيف علشان انت تلاقي مكان نظيف تلعب فيه براحتك.
طبعا المصاريف زادت عليا بسبب غلاء الاسعار لقيت شغل تاني اضافي علشان ازود الدخل واقدر الاحق ع الطلبات وعلي الرغم ان الدخل بقي يادوب مكفي الا اني كمان اتحرمت من اللعب معاك ومن اني اخدك في حضني وافرح بيك، لكن ماما كانت بتقولي اخبارك كل ليله وانا راجع مهدود ويوم ما قالت لي انك ابتديت تمشي لوحدك انا هيصت ع الاخر ولما مره سمعتك بتناديني ب ا با بكيت من الفرح.
مرت كام سنه وربنا بعت لنا اختك وفرحنا بيها زي ما فرحنا بيك لكن كمان زاد الحمل علي ماما وبقيت بتصحي بدري اكتر قبلنا كلنا علشان تجهز لنا الفطار وسندوتشات المدرسه ولما ترجع وراها تنظيف وطبيخ ومسح وكنس وغسيل وكوي كمان انت واختك ربنا يخليكم ويفرحنا بيكم،بس سامحني يعني ما كنتوش متعاونين خالص ترموا اللعب في كل حته وهي تلم من وراكم كل شويه وده يتعبها اكتر وتقول لكم رتبوا لعبكم وما تسمعوش الكلام فغصب عنها هتزعق لكم امال يعني هتسيبكم تقلبوا البيت كراكيب وتسكت ؟! واحيانا لما تصروا علي الفوضي تضطر تضرب.
في مره شافتك وانت بتزق اختك وكنت هتوقعها ماما اتفزعت وضربتك وهي متضايقه انها بتضربك، ومش ممكن انسي يوم ما كنت خمس سنين وكنت عايز تعمل عصفور وتطير من الشباك يومها امك كانت هتموت من الرعب عليك وجريت تنقذك واديتك علقه بعدها علشان تتعلم تخلي بالك، احنا اسفين ماكنش نفسنا اننا نضربك خالص ولا حتي نزعق لك لكن غصب عننا انت بشقاوتك خليت ده اسلوبنا معاك.
افكرك بحكايه
يوم ما رحت المدرسه اول مره احنا كنا طايرين من الفرح بيك وفي المدرسه ما كناش عاوزين نسيبك وانت ابتديت تبكي عاوز تمشي معانا الا انه غصب عننا كان لازم نسيبك علشان تتعلم لو كنا استجبنا لعياطك وروحناك كان زمانك فرجه بين الشباب ومصدر نكتهم لانك هتكون الجاهل الغبي، طبعا دخلنا في المذاكره والدروس علشان تبقي واحد من احسن الناس في البلد وانت فاكر اننا غاويين ننكد عليك ونزعق لك علي الرغم انك بعدين هتفهم ان ده لمصلحتك وتشكرنا عليه، كمان خناقاتك انت واختك كترت علي كل حاجه وبقيت ماما تتنرفز عليكم كتير وكأنها هي اللي غاويه نرفزه مش انتوا اللي بتتعبوها.
طبعا كل ده والمصاريف بتكتر وانا لازم اشتغل اكتر واكتر علشان الدخل يكفي وتبقوا مبسوطين والنتيجه اني بعدت عن البيت اكتر وسيبت الحمل لمامتك وانا تعبت من كتر الشغل ومشاكله وبقيت اعصابي مشدوده علي طول ومش مستحمل كلمه وماما من كتر عدم سماعكم الكلام بقت بتزعق كتير، انا عارف انك مش مسئول قوي عن الوضع ده وهتقولي امال خلفتونا ليه ؟ ها اقولك خلفناك علشان نضم عضو جديد لجسد المسيح.
لكن الحياه يابني صعبه شويتين

طيب والحل ؟
ابننا الحبيب ونور عيوننا
يا تري ممكن تعذرنا شويه وتسامحنا ؟
وملعش هانطلب منك طلب
لما تلاقينا بنزعق كتير ابقي حاول تشوف يمكن تكون انت زودتها شويه وضغطت علينا زياده واكيد لو لاقينا منك شويه قبول لظروفنا وتعاون معانا اكيد هنفرح بيك ونفرحك معانا.
ممكن كمان لما تلاقي الامور صعبه شويه تصلي من اجلنا كلنا تصلي ان ربنا يبارك في الشغل والدخل علشان انا اهدي والاقي وقت اصاحبك فيه، تصلي ان ربنا يدي ماما صحه كويسه وتقدر علي طلبات البيت وتستحمل تعبنا، تصلي ان ربنا يدينا سلام في البيت علشان نقبل كلنا ضعفات بعض ونرجع نحب بعض اكتر من الاول، تصلي كمان ان ربنا يهديك وينور بصيرتك وتبقي راجل في تصرفاتك وما نضطرش نزعق لك.

بابا وماما اللي بيحبوك

المصدر: †† ارثوذكس †† - من قسم: المنتدى العام