[magdy totti]

نفسى أحقق أمنياتى وأحلامى وذاتى ...إنما مش لاقى نفسى
محتاج كام يوم بعيد عن الناس...عايز أعيد حساباتى فى حاجات كتير .. عايز أدور على حياتى
أنا حاسس أنى مش لاقى نفسى
جملة قد تكون مفرداتها غريبة لكن بتعكس مشكلة نعانى منها نحن الشباب
ومهما اختلفت أسبابها فهو إحساس مرتبط بالتغيير عند الأنسان
لأنه ناتج عن ملل وضيق وفراغ و يمكن عجز
احساسك أن مفيش جديد فى حياتك
إنك مش راضى سواء عن نفسك او افعالك أو افعال الناس حواليك
ان مفيش حد هو محور اهتمام يومكو لأن كتير مننا مازال يجهل نفسه...وعمره ما حاول يسلط عليها ضوء عقله
بمعنى مين فى يوم قعد مع نفسه وسألها عايزة ايه ؟ بتحبى ايه ؟
بقينا مش عارفين إحنا عايزين ايه من الدنيا ... ماشيين وخلاص
عارف لما تبقى عايش اليوم بيومه مش بتفكر بكرة فيه ايه او هعيشه إزاى أو مش حاسس اصلاً يومك بيبدأ إمتى وينتهى أمتى المهم انه بيعدى بمعنى اصح فاقد الإحساس بالزمن وتفوق فجأة على انك كبرت وبقيت مسئول ومعملتش أى حاجة فى حياتك أو كل اللى فات ده ملوش معنى
عارف لما تخاف من تجاربك اليومية ... وبدل ما تستعدلها وتقتحمها و تستبدل خوفك بنور معرفة حقيقة جملة مش لاقى نفسى تهرب وتقول مش قادر ومش عارف .
ساعتها يبقى انت محتاج ثورة تصحيح فى حياتك يمكن معظمنا بيفكر فيها وأحيانا بيبدأها لكن قليل أوى لما بنمشى فيها ونكملها لأننا حاطين نفسنا فى إطار الضعف
معاكوا إن التغيير صعب أو شبه مستحيل بس ده لو انت عايز تغير طبع فيك أما التغيير الناتج عن تغير البيئة من حواليك فده شىء طبيعى وأظن الدنيا بتتغير من حوالينا كتير وأظن برضه نفسنا نلاقيلنا مكان فيها أو على الأقل نسيب بصمة فى أى حد
عايز تتأقلم مع الوضع الحالى وتقول انا كده كويس أنت حر بس الأكيد إن هيجى عليك يوم هتفكر تدور فيه على نفسك وساعتها مش هتعرف تلاقيها خالص

كم منا ضاعت موهبته وأحلامه نتيجة لأنه مكتشفش الموهبة دى جواه
واخيرا أصبحنا بلا امل وبلا احلام وبلا طموحات لاننا من البداية لم نحسن التعامل مع
انفسنا

المصدر: †† ارثوذكس †† - من قسم: الموضوعات الشبابية