فيه إخوه أحباء بيحبوا المنتدى وغيورين عليه أول ما هايشوفوا العنوان
هايصرخوا
إلحقووووووووووووووووووووو ووووووووووووووووووووووووو ووووووووووووووووووووووووو ونا
وطبعاً ليهم حق وعذرهم معقول لأنهم إفتكروا إن الموضوع عن الفيلم إللي إسمه بين السماء
والأرض بتاع هند رستم وده مش معقول إن يكون عليه موضوع في قسم
الطقس الأرثوذكسي لكن إللي معقول إن الموضوع عن
الملايكه في الطقس
الكنسي الأرثوذكسي وده طبعاً هنا مكانه وهنا يبقى الموضوع إللي أعتقد إنه يهمنا كلنا نعرف عنه أي حاجه لأنه من المعروف والمنتشر إن الملايكه أرواح خادمه مرسله لخدمة البشر ومن هنا جت التسميه بين السما والأرض ( بين السما موضع العرش العظيم لله الممجد والأرض موطن البشر والملايكه بتشتغل ما بين السما والأرض ) بس دي مش كل الحقيقه لأن الحقيقه إن الملايكه عالم كامل من النظام السماوي والرتب والطغمات والكلام عن الملايكه مش سهل فما بالكم لو حبينا نتكلم عليهم في الطقس الكنسي طبعاً بقيت الحكايه أصعب
ولأني على قد حالي وعايز آخد بركة الملايكه وخصوصاً في الطقس الكنسي الأرثوذكسي وبركة صلواتكم عني لأني محتاج صلاه زي لقبي بالظبط فكرت إني أعمل الموضوع بالمقلوب وطبعاً فيكم إللي ها يسألني يعني إيه موضوع بالمقلوب.. ؟ !!
أنا ها قولكم يعني إيه .. خليكم معايا .. طبعاً إحنا كلنا متعودين إن صاحب الموضوع عنده معلومه بيحب يشارك بيها ويوصلها لإخواته في الموقع أو المنتدى يكتبها وينزلها إللي بيردوا على الموضوع أو يقروا الموضوع ويستفيدوا منه من غير مايردوا لكن أنا هنا هاعمل العكس أنا حطيت العنوان والفكره بتاعة الموضوع وحضراتكم إللي هايضيف كل واحد معلومه وبكده أبقى أنا إستفدت وحضراتكم أخذتم بركه وعلشان أسهلها عليكم كتبت بعض النقط تساعد في الموضوع
• خلق الملائكه
• إنقسامهم
• السقوط والطرد
• الملائكه وبداية تعاملهم مع البشر
• الملائكه في العهد القديم ( وطبعاً إحنا عارفين إن العهد القديم بيشمل الأسفار القانونيه إللي كانت محذوفه )
• الملائكه في العهد الجديد
• الملائكه في عصر البدع والهرطقات وعصور الإستشهاد
• الملائكه ومعجزاتهم في حياتنا المعاصره
• الملائكه في الطقس الكنسي ( القداس – التسبحه – صلوات الإجبيه وغير ذلك )
وطبعاً ماننساش وضع الملايكه بعد يوم الدينونه العظيم ( الملائكه الساقطين - الملائكه النورانيين )
وفي الآخر ليكم عندي مفاجأه هتفرحنا كلنا
ياترى مين هايخد بركة أول معلومه