[سيف الاسلام]

السلام عليكم

انا مسلم .. وانت مسيحي .. بس احنا الاتنين اخوات

انا اختارت ده يكون عنوان لموضوعي

طول عمرنا في مصر عايشين مسلمين ومسيحيين مع بعض
من قرون فاتت .. ولا كان في اي تفجيرات ولا قتل او خناقات او حتي مشاحنات

في مسلمين .. وفي مسيحيين .. بس بتجمعهم البلد
جايز في اختلاف في الدين او العقيدة .. بس في اتفاق في حاجات كتيرة اوي
بداية من الوطن .. والجيرة " يعني المسلمين والمسيحيين جيران " .. والتعامل في كل المجالات .. ونهاية بالصداقة

مين فينا ملهوش صحاب مسلمين او مسيحيين
كل المسلمين عندهم صحاب مسيحيين واكتر من اخواتهم
ونفس الموضوع عند المسيحيين

يعني صعب اوي تلاقي النظرة الدمية والمتعصبة بين الطرفين

اعيادنا واحده .. وشغلنا واحد .. وحتي جيشنا واحد

طول عمرنا كده .. واكيد ده مش هيتغير
بس لو فضلنا كده .. ومتبعناش الطرق اللي هتودينا في داهية

اوكي ده حادث مروع استهدف اخواتنا المسيحيين " وفي مسلمين قتلوا في الحادث " .. بس مش هما القصد

القصد ضرب الوحده ..
عايزين فتنة طائفية تحصل في مصر ..

حد هيسأل طب ايه الهدف لما يعملوا فتنة ؟

الهدف واضح .. وهو تدمير اكبر دولة عربية ..وتقريبا اقوي دولة في الشرق الاوسط

ويبقي العرب ملهومش كلمة تاني ..

وبدل ما نفضي ونركز لقضايا الاراضي المحتلة .. والعراق .. ولبنان .. وجنوب السودان .. واليمن .. والصومال .. ومياه النيل ...

لا نقعد نحل في الخلافات والفتنه الطائفية اللي مش هتتحل اصلا

.....

انا مش بجيب جديد ولا بقول اللي مش معروف
لا الكل عارف كده كويس ..

بس الهدف من كلامي .. هو التعقل .. والتروي والتفكير في اللي حصل
والخروج منه بحمكة ..

اكيد الناس مخنوقة ومش مستحملة .. وده حقهم .. بس ميصحش بردو يدمروا البلد

وخصوصا من الشباب المتحمس ... اللي مستعد يعمل اي حاجه .. ويبرد ناره ... حتي لو هيخرب مصر .. ويدخل السجن او المعتقل " زي ما قال حد موجود هنا " وتفضلت الادارة وقامت بحذف الرد ..


بس تفتكر ده صح ؟
تفتكر لما تعمل كدة .. هتبقي عملت الصح ؟

تفتكر اصلا ان الصح نقابل ده بتدمير وقتل .. ولا بهدوء وتعقل ووحدة وطنية اكتر .. تخلي اللي بيتعمد يفتت البلد .. يعرف اننا ايد واحده ؟

اكيد عرفت الاجابة

بدل ما نقول هنضرب ونقتل .. وندخل المعتقل ..
نقول هنقف ايد واحده ضد العالم المعفنة دي

وفعلا هما نجحوا في الوصول لقصدهم وغايتهم ...
انهم ولو علي الاقل خلوا شاب واحد يقول كلام زي ده .. يبقي نجحوا


انا متأكد ان الكلام وقت عصبية ..
والكل بتحركه مشاعره في الوقت ده

بس بلاش نتصرف غلط ... ونرجع نندم

العقل هو اللي يتحكم فينا
ووحدة البلد هيا اللي تحركنا
ورغبتنا في قهر الارهاب ده هو دافعنا

................

انا مش عارف عملت التوبيك ده ليه
ومش قاصد منه اي حاجه
غير اننا نهدي .. سواء مسلمين او مسيحيين .. ونفكر شوية بس

وياريت يكون كلامي مضايقش اي حد

.....

والادارة تقدر تتصرف في الموضوع لو شايفاه مخالف ..
بس انا متأكد هتوافق عليه

مع كامل احترامي للجميع

وشكر خاص للادارة

المصدر: †† ارثوذكس †† - من قسم: حوار من الاعماق