[emmmy]

لا تحزنوا كالباقين الذين لا رجاء لهم
-------------------

احبائى واخواتى فى الرب يسوع
طبعا كلنا قلوبنا مشتعلة بنيران الغضب والالم والحزن
بس انا عاوزة اسالكم كل واحد باسمة وكل واحد يجاوب بينة وبين نفسة لية ؟
لية احساس المرار دة فى حلقنا لية احساس الالم دة فى قلوبنا لية احساس الهزيمة دى فى نبرات صوتنا
ياترى علشان زعلانين على اخواتنا اللى انتقلوا للسماء ؟
ما احنا عارفين وواثقين انهم فى السماء وعارفين برضوا انهم فرحانين ومبسوطين عارفين انهم ارتاحوا من تعب العالم وهمومة واحزانة وراحوا عن المسيح واحنا هنحصلهم
يبقى لية ؟
طيب يا ترى علشان احنا حاسين بوجع فى كرامتنا وكبريائنا ومش عاوزين نبقى عبيد ننداس بالارجل والمسالة كلها مسالة احساس بالحق والعدل ودفاع عن النفس
علشان اعدائنا ميزدوش ضرب واهانة وقتل فينا ؟
طب ما احنا عارفين انة قال زمان
الرب يقاتل عنكم وانتم صامتون
يبقى لية ؟
طيب علشان احنا حاسين البلد بلدنا وهما اللى احتلوا ارضنا وحقنا وعاوزنهم يفهموا دة ؟
كلنا عارفين ان دة مش وطنا ولا ارضنا واننا مجرد غرباء على الارض فى رحلة غربة طويلة او قصيرة ونهايتها السماء عارفين ان حياتنا بخار يظهر قليلا ثم يضمحل
يبقى لية ؟
جايز علشان مش قادرين نتحمل العذاب والالم وفراق الاحباب ونشوف ام بتفقد ضناها وطفل بيفقد امة
انا معاكم وطبعا دى مشاعر قاسية فوق طاقتنا لانها صعبة جدا جدا جدا اكيد
بس لية لما بتكلم عن الشهداء اللى ضحوا بحياتهم علشان يحافظوا عن ايمانا ويكسبوا الابدية بنتكلم عنهم بفرح وحماس ونفسنا نبقى زيهم ومعاهم ونطوبهم ونطلب شفاعتهم المفروض انة ايمان اكتر منة كلام ووعظ على منابر
الناس دى احتملت ازاى ؟
بالنعمة وبالروح وبالفهم لامور لا ترى
احنا مشكلتنا اننا بقينا بنعتمد على الازرع البشرية وبنطلب النجاة منها ونسينا الرجاء ووعد اللة لينا
لقد نقشتكم على كفى من يمسكم يمس حدقة عينى

يا احبائى انا زيكم محتاجة عزاء السماء
وصدقونى لو فكرنا كويس بصفاء وهدوء من غير ضباب الغضب والام هنلاقى ان كل تجربة بتمر علينا بتكون نهايتها النصرة والغلبة على اعداء الرب يسوع ودليل اكيد ان الحرب مش لينا
ابسط حاجة لما العالم كلة يعرف صاحب الجريمة البشعة دى هيعوفوا مين وراها ولية ايا كان جنسيتة وديانتة
وتبقى فرصة للقلوب التائة اللى نفسها تعرف الحقيقة وتشوف الامور صح
يعنى ربنا عارف كويس هو بيعمل اية
وتجربة زى دى بتكون سبب خلاص ناس كتير واحنا مش بنرفع قلوبنا بصدق وصراخ ورجاء ودموع للرب يسوع الا فى الا فى الشدائد وكلنا عارفين كدة كويس
التجربة بيسمح بيها ربنا مش لانة ناسينا
لكن الدهب مش ممكن ينقى الا اذا وضع فى النار وكل ما كانت النار جبارة وقاسية كل ما نقى الدهب وثمنة زاد

احبائى تشجعوا ولا ترتعدوا
ليكن فضل القوة للة لا منا مكتئبين فى كل شئ لكن غير متضايقين متحيرين لكن غير يأئسين مضطهدين لكن غير متروكين مطروحين لكن غير هالكين حاملين فى الجسد كل حين اماتة الرب يسوع لكى تظهر حياة يسوع ايضا فى جسدنا لاننا نحن الاحياء نسلم دائما للموت من اجل يسوع لكى تظهر حياة يسوع ايضا فى جسدنا المائت
( 2 كو 7 - 12 )

المصدر: †† ارثوذكس †† - من قسم: كلام فى الممنوع

[zaza2006]

حقيقى يا ايمى احيكى على الموضوع الجميل ده
معاكى حق احنا بلدنا فالسما مش فالارض
ربنا يرحمنا ويصبر الكل ولسه ياما هنشوف
دى حسب ما الكتاب المقدس قال لكن احنا ثقتنا فربنا كبيرة
هو قادر يقوينا ويعزينا

[اشرف وليم]

[emmmy]

المشاركة الأصلية كتبت بواسطة zaza2006 حقيقى يا ايمى احيكى على الموضوع الجميل ده معاكى حق احنا بلدنا فالسما مش فالارض ربنا يرحمنا ويصبر الكل ولسه ياما هنشوف دى حسب ما الكتاب المقدس قال لكن احنا ثقتنا فربنا كبيرة هو قادر يقوينا ويعزينا

ياما هنشوف اللة ينور عليكى يا نهى
صح كدة
ربنا كان صادق معانا لابعد الحدود وقال قبل كل دة ما يحصل انة هيحصل واحنا عارفين انة هيحصل
مصارعتنا ليست مع دم ولحم لكن مع اجناد الشر السمائية
مرسى نهى لمشاركتك ربنا يرحمنا كلنا

[emmmy]

المشاركة الأصلية كتبت بواسطة اشرف وليم

صح يا اشرف اكيد
ووعد ربنا صادق واكيد
ربنا يرحمنا

[elphilasouf]

موضوع جميل يا أيمي
... صدقيني فعلا شكله غضب المسيحيين ده موضوع كرامه وخوف لا أكثر

الغضب مش وحش ولا ممنوع ...
الغضب طاقه طبيعيه بتحصل نتيجه رفض شيئ معين أو خوف من شئ معين
يعني سلوك طبيعي جدا
لكن في غضب مقدس وغضب غير مقدس
بيختلف في الهدف والإسلوب
في من يغضب غضب مقدس
بهدف مقدس يبني
ويسلك سلوك مقدس ليحقق هدفه

وفي غضب غير مقدس بهدف غير مقدس وسلوك يظهره غير مقدس بردو

علينا أن نجلس مع أنفسنا نراجع أهدفنا وسلوكيتنا .
وليملئنا الله من روح الإفراز والمحبه .

موضوعك مقنع خفيف حلو أوي يا أيمي ... ربنا يفرح قلوبنا جميعا

[emmmy]

مرسى يا جورج على اضافتك الرائعة دى
اشكرك حقيقى
وعلى تقديرك للامور صح وفهمك الروحى الجميل دة
عجبنى ردك وصدقك جدا حقيقى
وصدقينى انا حسيت ان فى ناس كتير واخدها مسالة كرامة ورد اعتبار ودة بيزود حزننا وبيضع الهدف وبيمنع رؤية النور عننا
وزى ما قلت الغضب فى حد ذاتة مش غلط
لكن طريقة التعبير عن الغضب هى
اللى بتفرق صح او غلط
اشكرك مرة تانية

[كراكيب]

• انا هتكلم عن نفسي
• في الاول بشكرك ع الموضوع
• احنا متضايقين من كل الحاجات دي محدش طبعا متضايق ان بقي في شهدا بس دول مش شهدا بمزاجهم دول شهدا بطريقة غير مباشرة يعني احنا لو ايام دقلديانوس الموضوع كان هيبقي اهون لاننا كنا هنتسارع للوصول للسما
• لكن الاسر اللي اتيتمت والافراد اللي فقدوا ذويهم هما دول اللي احنا زعلانين عليهم
• ومفيش مانع ابدا اننا نرفض نبقي عبيد لاننا اولاد الملك ومفيش مانع ناخد حقنا ع الارض طالما بقيت عنينا ع السما
• الكتاب بيقول اغضبوا ولا تخطئوا وده اللي احنا عاوزينه اننا نغضب وده حقنا ونص لكن منخطئش عشان منشوهش صورة مسيحنا ولا طبيعتنا
• لكن هنفضل رافضين اننا نبقي ضحية المسيح اكيد مش فرحان باللي حصل وده كمان زي ماقال احد الاباء الكهنة اللي روي ان في انسان خادم شاف الشهدا ف السما ف رؤية وشاف المسيح وهو لابس اكليل الشوك بدل اكليل المجد
• يبقي احنا منزعلش لا نزعل ونثور كمان لاننا لازم نحافظ علي حياتنا وحياة غيرنا والا بقي سيدنا يطلب عدم وجود امن عشان نموت
• مش المفروض اننا نعرض حياتنا للموت الا اذا اضطررنا لكدة
• ربنا يسامحهم ويهديهم لو هيتقبلوا الهداية او ياخدهم لو مش هيتقبلوا
• شكرا مرة تانية

[emmmy]

اولا بشكرك على ردك الجميل يا ميلاد
وطبعا احنا مش عبيد احنا اولاد الملك
بس انت نسيت ان الملك نفسة اتهان واتصلب ومات
نسيت انة داق كل الالام بكل انواعها واتحمل فوق طاقة البشر
احنا علشان ولاد الملك بيتعمل فينا كدة يا ميلاد انا وانت نفسنا ننال الكرامة دى ومصارعتنا ليست مع دم ولحم
طب انت عارف انا لما شفت الجنازة بتاعتهم على اغابى شفت حاجة غريبة جدا لفتت نظرى ومكنتش متوقعاها ابدا بصراحة
شفت الاباء الكهنة بيبوسوا الصناديق بتاعت الشهداء ومنهم ابونا تادرس يعقوب عملاق تفاسير الكتاب المقدس ساعتها حسيت اد بصدق الموقف وانهم مش ضحايا زى ما كنت فاكرة لا هما فعلا شهداء
اتمنيت اكون معاهم وزيهم
انا موافقاك طبعا ان الموقف صعب ورهيب والاهالى والاطفال حالتهم صعبة ومحدش ابدا يقدر يخفف عنهم جرحهم غير ربنا بنفسة
بس صدقنى الامهم دى اكليل برضوا كلة متشال فوق يا ميلاد صدقنى
وفى حاجة كمان
انت بتقول دول مش شهداء بمزاجهم وايام دقلديانوس كنا بنتسارع للوصل للسماء
مش كلهم طبعا معظمهم كانوا بيستشهدوا بالطريقة دى برضوا بالبطش والجبروت والقسوة بيهجموا عليهم الرومان بكل وحشية ويقتلوهم مش كلهم كانوا بيجروا ورا الشهادة
انت باصص لمارجرجس ومارمينا وابوسيفين وغيرهم
لا يا عزيزى دول كانوا الاقلية وعلشان كدة اسمائهم مكتوبة على صفحات التاريخ مبتتنسيش ابدا ومش هتتنسى ابدا
دول اللى عرفونا وكتبوا بدمهم يعنى اية استشهاد
يعنى حتى الشهداء درجات ورتب
اشكرك مرة تانية على
حضورك الجميل
ربنا يرحمنا

[اناستاسيا]

ما شعرت بةهو شعور الخيانة وليس الغضب وتذكرت خيانة يهوذا لرب المجد وكم الى الان لا ننساها
الغضب سوف يأتى علية وقت ويهدء ثم يتلاشى ولكن شعورى بخيانة اى أحد فهو المرارة بذاتها