[Dr.PeRO]

X الحقيقة ان يوم الحد او السبت بالليل فيه عيدين مش عيد واحد ... فيه 2 عيد قيامة ... واحد بتاعنا وواحد بتاعهم !!!

• تقاليد العيد بتاعنا (وهو بيمثل الأغلبية العظمى):

X بيجهز لبس العيد (اللى كان نزل يشتريه فى اسبوع الآلام) وعينه عالعدية (اذا كان بياخد يعني)، ومستنى اللحمة والفراخ بفارغ الصبر وبيتفق مع باقى افراد عيلته على المعاد اللى هيتقابلوا فيه .. ويقضوا الليلة فى الاكل والسمر والضحك والفرفشة والكلام الكتير بقى اللى بيلم النميمة على الادانة على السخرية على ..الخ ... ويجي اليوم اللى بعده يجهزوا خروجه حلوة أو يروحوا ملاهى ولا سينما ...

Xأما الشباب خاصة فكل واحد بيعزم البنت بتاعته فى ماكدونلدز ولا كنتاكى وبعديها يتسنكحوا فى الشوارع شوية ولا يشفولهم جنينه يقعدوا يحبوا فى بعض فيها شوية .. طبعاً انا مش هتكلم على اللبس بيبقى عامل ازاى، هو عموماً كل عيد بيبقى ألعن من اللى قبله .. لحد ما ( انا واثق) ان هيجي اليوم اللى هيبقى لابس هدومه هيبقى انسان متخلف وموضه قديمة!

Xنيجي للكبار او العجائز: طبعاً بيدوا العيدية لولادهم واحفادهم وبعد ما يكلوا ويشبعوا ممكن يروحوا نوادى على الكورنيش ولا يزوروا اماكن جديدة وأهى مناسبة جميلة للتمشية و الخروج.

Xطبعاً الاطفال بيقلدوا وبيتربوا ان ده العيد اللى بنعيد فيه مرتين فى السنة .. مرة في شهر واحد ومرة فى شهر اربعة، نفس اللى بيحصل هنا هو اللى بيحصل هنا.

• تقاليد العيد بتاعهم (القلة القليلة .. وأشك انها موجوده اصلا)

Xدول بقى الناس الاشرار الوحشنين .. الناس الفقر اللى للاسف الشديد بيعتبروا العيد هو مرحلة انتقالية فى حياتهم الروحية .. يعنى بالنسبالهم عيد القيامة هو عيد انتصار الحب الالهى وعيد تحفيزهم على سمو حالتهم الروحية، يشوفوا فيه ان المسيح قام وانتصر على الوت فيصمموا اكتر على انهم يدوسوا الموت اللى هو الخطية ويعيشوا فى قداسة اكتر، او يعيشوا "كما يحق لإنجيل المسيح" .. ناس بتفكر في انها تدى من اكلها ولبسها للناس الغلابة اللى مش عارفين يفرحوا من كتر الفقر والمشاكل، ناس بتروح تفرح أيتام او تزور ناس مرضى محبوسين فى ساعتين زمن مش طول اليوم يعنى ... بيعتبروا ان العيد مش احتفال دنيوى، ناس غريبة مش راضية تعتبر ان العيد عبارة عن لحمة وفراخ ورز بالخلطة وفلوس وكوافير وبنطلون ضيق وخروجه جامدة وشلة اصحاب ورسايل حب وضحك وفرفشة و الذي منه ... معلش الناس ديه بتفكر بطريقة متخلفة شوية .. ناس غبية .. ازاى يعنى مايروحوش سيتي ستارز فى العيد وازاى مايركبوش مركب فى النيل وازاى ميجمعوش الشلة ويشوفوا حته يتصرمحوا فيها ويرجعوا يجهزوا الفسيخ عشان تانى يوم فى عيد تانى اسمه "عيد شم الفسيخ" .. ده بالمناسبة عيد كل وظيفته واهميته ان الناس تشترى رنجة وملوحة وفسيخ ويقعدوا فى الجناين والكورنيش او فى حوش كنيسة العدرا المعادى ياكلوه مع البصل و بعديها يشتروا ورد ويتمشوا وهما بيشموا فيه زى المدمنين ويروحوا يناموا بقية اليوم !! (إلههم بطونهم).

Xعموما بعد ما شوفنا العيدين ... أحب افكركم ان العيد اللى المفروض بنحتفل بيه اسمه "عيد قيامة السيد المسيح"، يعنى ده بيختلف شوية عن عيد تحرير سينا او عيد الأم أو عيد ميلادك !! هو احتفال سمائي ولما بنحتفل بيه يبقى احنا بنشارك الله فرحته بأنه استردنا واصبح هناك مصالحة بين السمائيين والارضيين .. العيد ده هو تذكار ليوم من أكتر من 2000 سنة قام فيه المسيح ولولا اليوم ده مكنش ولا واحد هيدخل الملكوت .. ولا واحد .. يعنى العيد هو أكبر حافز لينا عشان نعافر انه يكون لينا مكان فى الملكوت اللى احنا عمالين نبعد عن طريقه كل يوم شوية .. لدرجة اننا لما بنيجي نحتفل بيه بننسي ان ده عيد مسيحي وعيد ديني مش عيد ارضى ... تفتكروا ربنا بينظر لينا ازاى فى يوم زى اليوم ده ؟!!

المصدر: †† ارثوذكس †† - من قسم: التأملات الروحية والخواطر الفكرية

[اشرف وليم]

شكرا لتعب محبتك
الرب يبارك حياتك
موضوع اكثر من رائع

[Dr.PeRO]

شكرااا لمرورك يا اشرف، ربنا يبارك حياتك

[دودي بوب]

بجد موضوع جميل
تسلم ايدك
كل سنة وانت طيب

[Dr.PeRO]

متشكر ليكي خالص على ردك الجميل، ربنا يارك حياتك

[emmmy]

ههههههههههههههههههه يا نهارك ابيض يا بيتر
دا انت بوظت اخلاق الناس كلها يا بيتر ههههههههه
كدة يبقى محدش عجبك خالص مالص لان الاغلبية من الناس بتعمل الاشياء اللى انت ذكرتها بالظبط واقلية جدا اللى بيحتفلوا بالعيد بالطريقة السامية والجميلة واللى فوق مستوى الجسد دى
بيتر انت مقبوض عليك معايا امر بالقبض عليك لانك دخلت فى قضية امن دولة هههههه اتفضل معايا وبهدوء من فضلك

عزيزى بيتر / بجد احييك على موضوعك الجميل والافتة الحلوة دى وطبعا انا معاك فى كلامك صرف النظر عن بعض التعبيرات لكن المعنى كلة انا معاك فية اكييييييد
بيتر صدقنى انا احترت قدام سطورك وكلماتك ووقفت ادور على نفسى حقيقى بينها انا مين فيهم ؟؟
لقيت انة لا دة ولا دة
فى ناس زى كتير اوى اوى بتعيد بشكل بسيط وعادى خالص بعد انتهاء اسبوع الالام ومشاركة المسيح اللحظات الجميلة دى
بيجوا من الكنيسة والقداس يوم السبت ويفطروا ويعقدوا شوية بس من غير ادانة هههه ويناموا وتانى يوم يرحوا الخدمة ويجوا من الخدمة مبسوطين وفرحانين وخلاص ويا خرجنا بردوا يوم الاتنين للقداس يا مخرجناش
عموما علشان مبقاش متزمتة هو العيد بيبقى يومين فى السنة فالناس بتعتبرها فرضة كويسة وخصوصا مع الاجازة وتتجمع فى اماكن ترفيهية تفك عن نفسها ودة بيبقى مقياس للعيد والفرحة غير كدة هيقولك يبقى فين العيد بقى ؟؟
وبتبقى ناس معينة يا اما اتنين مخطوبين او متجوزين جديد
يا الشباب والشبات وبيجتمعوا ويخرجوا
عموما هو الخروخ والفسح والامور الترفيهية فى حد ذاتها مش مشكلة بس الطريقة فعلا هى اللى بتختلف من حد لاخر ودة اللى بيشد انتباهك انت وغيرك كتير
اما المعانى الروحية العالية اوى دى فدى بنحس بيها فعلا يوم السبت فى القداس يا بيتر وخصوصا مع تمثيلية القيامة فعلا بنحس بحاجات عجيبة وجميلة وقيامة مجيدة وفريدة وبنرجع بيوتنا واللى يقدر يكمل بالفسح والترفية خلاص مفيش مانع مش حرام يعنى
فكها يا بيتر هههه


بيتر ممكن سؤال
انت بتقضى العيد ازاى من يوم السبت باليل لحد الاتنين شم النسيم ؟؟
جاوب بقى اديك وقعق فى بير اعمالك هههههههه

[david201050]

هههههههههههههه اكيد العيد عيدنا يابيتر ومفيش حد زينا المسيح الهنا كل مرة بنعيد فيها بعيد القيامة يسوع الهنا بيقولنا ان انتو دايما معايا ومفيش اي حد زيكو ودايما حارسكو ياولادي وبجد موضوع جميل اووي ربنا يباركك يايبتر

[Dr.PeRO]

ههههههههههههههههههه يا نهارك ابيض يا بيتر دا انت بوظت اخلاق الناس كلها يا بيتر ههههههههه

هى بايظة لوحديها، هتجبيها فيا ليه بس

كدة يبقى محدش عجبك خالص مالص لان الاغلبية من الناس بتعمل الاشياء اللى انت ذكرتها بالظبط واقلية جدا اللى بيحتفلوا بالعيد بالطريقة السامية والجميلة واللى فوق مستوى الجسد دى

مش مهم يبقى فيه حد عاجبنى، المهم يبقى فيه حد عاجب ربنا !!
ليه بتقولى انها فوق مستوى الجسد ؟؟ هى مش كل اللى قولته ليه آيات فى الانجيل ؟؟ وربنا لما بيدينا وصايا ننفذها بيبقى هو عارف انها قابلة للتنفيذ وتحت قدراتنا البشرية.
إحنا اللى بنقلد وبقى لينا تقاليد قاتلة للروح، زى أهل العالم بالظبط .. مكتوب لا تحبوا العالم ولا الاشياء التى فى العالم ..

عزيزى بيتر / بجد احييك على موضوعك الجميل والافتة الحلوة دى وطبعا انا معاك فى كلامك صرف النظر عن بعض التعبيرات لكن المعنى كلة انا معاك فية اكييييييد

ميرسي خالص لكلامك الجميل، ليه كاتبه بصرف النظر عن بعض التعبيرات، انا لا قولت كلام خارج ولا بالغت فى نقطة ولا شتمت على حد .. انا بجيب من الواقع والواقع فقط .. مثلا كلمة يتسنكحوا أو يتصرمحوا اللى قولتهم، دول معناهم "السير بدون اتجاه محدد" تمشية بغرض التمشية، بس هى مصحوبة بغرض مش كويس، عشان كده لازم احطلها اللفظ المناسب، اما لما اتكلمت عالناس الكبار، ساعتها استخدمت لفظ "يتمشوا" .. المشكلة ان الواقع اصبح مرفوض وصعب وتقيل اننا نتكلم عنه، كلنا بنهرب منه وبنسد ودانا عشان نسكت اى صوت لضميرنا.

بيتر صدقنى انا احترت قدام سطورك وكلماتك ووقفت ادور على نفسى حقيقى بينها انا مين فيهم ؟؟ لقيت انة لا دة ولا دة

يعنى انتى معانا ولا مع الناس التانيين ؟!

فى ناس زى كتير اوى اوى بتعيد بشكل بسيط وعادى خالص بعد انتهاء اسبوع الالام ومشاركة المسيح اللحظات الجميلة دى بيجوا من الكنيسة والقداس يوم السبت ويفطروا ويعقدوا شوية بس من غير ادانة هههه ويناموا وتانى يوم يرحوا الخدمة ويجوا من الخدمة مبسوطين وفرحانين وخلاص ويا خرجنا بردوا يوم الاتنين للقداس يا مخرجناش

على فكرة المسيحية مش "قداس" وخدمة ومرواح الكنيسة ... المسيحية هى "معايشة حياة المسيح من جديد" .. يعنى التصرف بتصرفاته، التطبع بطباعه، التحلى بفضايله .. وبناء على كده في فرق رهيب بين كون الانسان مسيحى فى البطاقة وكونه مسيحي امام ربنا !!
فأنا لو عايش حياة "المسيحية" لما هيجي العيد هحتفل بطريقة تانية خالص غير الاحتفال الدنيوى .. مش هقدر أديلك أمثلة عشان هو مفيش خطوط او خطوات الواحد لازم يمشى عليها .. بس أقدر أديلك خيط البداية .. وهو القلب .. القلب المليان مش بيجرى يلحس التراب ورا شهوات وافراح العالم .. بس مش معنى كده انه يبدل ده بنكد وكآبه .. لأ .. ده بيبدل ده بفرح وسلام أعظم ,, مكتوب "ليس كما يعطى العالم أعطيكم" ...

عموما علشان مبقاش متزمتة هو العيد بيبقى يومين فى السنة فالناس بتعتبرها فرضة كويسة وخصوصا مع الاجازة وتتجمع فى اماكن ترفيهية تفك عن نفسها ودة بيبقى مقياس للعيد والفرحة غير كدة هيقولك يبقى فين العيد بقى ؟؟ وبتبقى ناس معينة يا اما اتنين مخطوبين او متجوزين جديد يا الشباب والشبات وبيجتمعوا ويخرجوا عموما هو الخروخ والفسح والامور الترفيهية فى حد ذاتها مش مشكلة بس الطريقة فعلا هى اللى بتختلف من حد لاخر ودة اللى بيشد انتباهك انت وغيرك كتير

انا مش معارض ان الناس تخرج .. بس زى ما هتدى جسدك متعة أرضية .. لازم تبقى فى الأول مديله متعته وغذائه الروحى .. يعنى انا هديلك مثال على لو اتنين مخطوبين:
السبت بالليل يروحوا يحضروا القداس، وممكن لو العيلتين اتجمعوا بالليل مع بعض يبقى يفطروا مع بعض .. الاحد الصبح ممكن يزوروا الأول أى مزار دينى، أقصد مثلا كنيسة من كنايس مصر القديمة .. دير قريب .. كنيسة بيحبوها .. ويصلوا فيه ويوحدوا طلبتهم وهى ان ربنا يبارك حياتهم ويقدروا يحب بعض فى المسيح .. ومينجرفوش مع التيار زى اللى حاصل مع كل الناس .. ولما باقول صلاة يبقى الصلاة الحقيقية، مش دقيقة ارشم فيها الصليب واقول ابانا الذي ... بعديها لو ليهم حد ممكن يزوروه مريض واو ملجأ ايتام بالذات لو اطفال صغيرين .. وديه حاجة هتحبها البنت عشان هى أكيد هتحب الأطفال اكتر من الراجل ,, عشان غريزة الأمومة .. أقوى الغرائز على الإطلاق!
بعديها ممكن بقى يروحوا مكان يقدروا يقعدوا يتكلموا فيه عالكورنيش او فى نادى .. بس يراعوا ان الكلام المرة ديه يبقى فى إطار مسيحي .. يعنى يبقى ليه دعوة بربنا .. مثلا يتأملوا فى ان ازاى الله جمعهم وازاى حياتهم الروحية ماشية .. وممكن كل واحد يشجع التانى على محبة ربنا والتمسك بيه وبوصياه اكتر .. ممكن يقعدوا يعملوا تدقيق قى علاقتهم من ساعة ما بدأت ويشوفوا ايه الايجابيات وايه السلبيات .. يعنى يراعوا ان كل ذهنهم يبقى فى شخص المسيح اللى فداهم هما الاتنين وإداهم دعوة دخول الملكوت من جديد .. وممكن ياكلوا بره أو لو هيتفسحوا فى امااكن تليق بأبناء الله .. وقبل كده يبقوا مراعيين ان لبس العيد ومظهرهم يبقى برضه لائق بأولاد الله .. وده بيبقوا هما الاتنين أوتوماتيك (بديهي) مراعيينوا اذا كانت حياتهم الروحية حلوة وليهم عشرة واختبار حقيقي مع الله .. مش ناس "آلات" ماشية تتحرك من القداس للخدمة او لأى نشاط جوه الكنيسة وهما من جوه فاضيين فبيدوروا ازاى يجملوا خارجهم!!!

بيتر ممكن سؤال انت بتقضى العيد ازاى من يوم السبت باليل لحد الاتنين شم النسيم ؟؟ جاوب بقى اديك وقعق فى بير اعمالك هههههههه

مهو انا كتبتلك مثال للمخطوبين بدل ما اقول مثال على نفسي عشان انا مش المثال الطبيعي اللى ممكن حد يمشى زيه .. اقصد ان محدش هيستفاد من اللى هقوله على نفسي .. بالعكس ممكن استفز ناس و ممكن يقولوا عليا كلام مش حلو (ده اذا مكنوش بيقولوا من الأول هههههه) لكن انا أديت مثال جميل فوق.. ولو تحبي اكتبلك نموذج لكل فئة عمرية ممكن .. بس الحاجات ديه مش نماذج الواحد يقرأها ويحفظها وينفذها .. ديه كلها أمور طبيعية بتحصل تلقائياً لما الواحد بيعرف ربنا وبيقبله صديق ومخلص شخصي .. بيبقى فيه اصلاح فى كل الأمور بشكل إعجازى جميل ..
بس انا عشان مبقاش رفضتلك سؤالك، هقول حاجة واحدة على اللى بعمله يوم العيد .. وهو انى مبقربش من الكنيسة ولا بحضر القداس ... مستحيل اروح القداس فى ايام الأعياد ابداً .. الاستثناء الوحيد كان فى عيد الميلاد اللى فات، روحت عشان الكل راح عنداً فى الجماعات الارهابية ... بس

[Dr.PeRO]

المشاركة الأصلية كتبت بواسطة david201050 هههههههههههههه اكيد العيد عيدنا يابيتر ومفيش حد زينا المسيح الهنا كل مرة بنعيد فيها بعيد القيامة يسوع الهنا بيقولنا ان انتو دايما معايا ومفيش اي حد زيكو ودايما حارسكو ياولادي وبجد موضوع جميل اووي ربنا يباركك يايبتر

متشكر ليك خالص يا ديفيد على مرورك الجميل ,, ربنا يعطينا الحكمة والقوة كى نعلم كيف يليق ان نحتفل بعيد قيامته ,,
ربنا يبارك حياتك

[emmmy]

على فكرة المسيحية مش "قداس" وخدمة ومرواح الكنيسة ... المسيحية هى "معايشة حياة المسيح من جديد" .. يعنى التصرف بتصرفاته، التطبع بطباعه، التحلى بفضايله .. وبناء على كده في فرق رهيب بين كون الانسان مسيحى فى البطاقة وكونه مسيحي امام ربنا !!

انت كدة دخلت فى متاهة تانية خالص يا بيتر
احنا بتكلم فى نقطة محددة يومين العيد بس ازاى نقضية صحح

فأنا لو عايش حياة "المسيحية" لما هيجي العيد هحتفل بطريقة تانية خالص غير الاحتفال الدنيوى .. مش هقدر أديلك أمثلة عشان هو مفيش خطوط او خطوات الواحد لازم يمشى عليها .. بس أقدر أديلك خيط البداية .. وهو القلب .. القلب المليان مش بيجرى يلحس التراب ورا شهوات وافراح العالم .. بس مش معنى كده انه يبدل ده بنكد وكآبه .. لأ .. ده بيبدل ده بفرح وسلام أعظم ,, مكتوب "ليس كما يعطى العالم أعطيكم" ...

تمام اللة ينور يبقى الطريقة بيتختلف من حد للتانى على حسب الظروف والوضع اللى هو فية وحسب شخصيتة وعلاقتة بالناس بس فى النهاية يحتفظ بشئ واحد اساسى متحد بينا كلنا كجماعة مؤمنين وهو الفرح والسلام الالهى داخل قلوبنا يعنى لو حد زعلان من حد يصالحة مثلا ويفرح بقلب نقى حقيقى

مهو انا كتبتلك مثال للمخطوبين بدل ما اقول مثال على نفسي عشان انا مش المثال الطبيعي اللى ممكن حد يمشى زيه .. اقصد ان محدش هيستفاد من اللى هقوله على نفسي .. بالعكس ممكن استفز ناس و ممكن يقولوا عليا كلام مش حلو (ده اذا مكنوش بيقولوا من الأول هههههه) لكن انا أديت مثال جميل فوق.. ولو تحبي اكتبلك نموذج لكل فئة عمرية ممكن .. بس الحاجات ديه مش نماذج الواحد يقرأها ويحفظها وينفذها .. ديه كلها أمور طبيعية بتحصل تلقائياً لما الواحد بيعرف ربنا وبيقبله صديق ومخلص شخصي .. بيبقى فيه اصلاح فى كل الأمور بشكل إعجازى جميل ..
بس انا عشان مبقاش رفضتلك سؤالك، هقول حاجة واحدة على اللى بعمله يوم العيد .. وهو انى مبقربش من الكنيسة ولا بحضر القداس ... مستحيل اروح القداس فى ايام الأعياد ابداً .. الاستثناء الوحيد كان فى عيد الميلاد اللى فات، روحت عشان الكل راح عنداً فى الجماعات الارهابية ... بس

ههههههههههههههههه
انا بحيييك على صدقك وامانتك فى الرد
مش قلتلك هتقع فى بير اعمالك هههههههه
بجد زاد احترامى ليك وتقديرى ليك يا بيتر ربنا يفرحك