خواطر
يامركب الحب ياحاضنة الجمال كله
قلبى رماه الهوى مين اللى هيدله
الصبر ميل على قلبى وقال سلامات
ياعاشق الحب قوم وامشى على ضله
نفسى اقول كلمتى توصف دوا العشاق
أبدر تقاوى الهنا والحب للمشتاق
بس اللى يهمنى الصبر له نهاية
ايه معنة اللى صبر لو ضاعت الأخلاق
من عشقى للصبر حملته على أكتافى
ومشيت فى صهد الجبل عا الشوك ونا حافى
وطلعت بحر الغرق بدراعى عديتة
وسبحت بيه الفضا والبرد متعافى
ماأنا اللى طبعى كدا عاشق دوا العطار
وزرعت جنب السكن فوق الجدار صبار
لفيته بين الورق وعملت منه حجاب
وركبت بيه الزمن ونهاية المشوار
لقيت سواقى الألم تنزف على جراحى
ولمحت فرع الهنا يدبل وانا صاحى
لميت فى ساعة نكد الصبر ورميته
وزرعت عود الأمل والحب للصاحى
لبست توب الزمن ومشيت على مهلى
أجمع زهور الوفا وألبس هدوم أهلى
أكتب فى صبح ومساء موالى للمحتاج
لما أشوف الرضا شاور ونادهلى
ويقوللى وقت الرضى أكتب حكاوى الناس
خلى زهور الهنا تطرح مع الأناناس
أفتح جراح الزمن أوصف دواء المحتاج
مسكت سن القلم اكتب على الكراس
وأقول لأهل الولد حاسبوا من اللى جى
خلوه يمد القدم بعد أن يشوف الضى
وعلموه للزمن يحمل شواشى الخير
يعشق ليالى القمر ويا الضمير الحى
الشاعر / عزت صبحى غالى