[مادونا نبيل]

احنا فى الاول كده اللى يقرا الموضوع يقراه بروح رياضيه

و احنا هنتكلم عن انواع الولاد على النت اوكى

يالا نشوووووووووووف

الي يدوبك لسه متعلم يدخل نت
وتلاقيه اول ما يدخل هاي ممكن
نتعرف انا فلان ومن الحته الفلانيه وتحسي ان فيه حنفيه معلومات اتفتحت
واي حاجة تقوليهاله يقولك يعني ايه مش فاهم وبعد كل كلمة يقولك اصل
انا لسه جديد في النت

والنوعية دي تنقسم لقسمين :
1-يا اما متحمس وحط فى دماغه موضوع النت وعايز يتعلم
2- يا اما سمع من صحابه عن النت والبنات وجاي يجرب حظه

<><><><><>

الي بيقعد على النت بس مش كتير

النوع ده كل كلامه انا مشغولياتي كتير ومبحبش النت والكلام ده وبعد ما
يتكلم شوية يقولك ممكن نكمل كلام في التليفون انا اصلي مبدخلش النت
كتير ومليش خلق للكتابة والحاجات دي

والنوعيه دي تنقسم الى قسمين:
1- يا اما يبقى لحوح ويفضل يطلب نفس الطلب وصباح الملل
2- يا اما يبقى عنده عزة نفس وميلحش بس هيتعصب وهيقولك اعمليلي بلوك

><><><><>

الي قاعد على النت ليل نهار
ده بقى شرحه يطول وينقسم لعدة انواع

1- المقموص

ده بقى قاعد وحاطط ايده على زرار الزعل اي حاجة تقوليها تبقي بتقصديه
او بتقللي من شانه و لو فى موضوع معين عملتيه يقولك
انتى ليه عملتى الموضوع ده و اشمعنا دلوقتى وخدو من ده كتير

2- ابو دم خفيف

ده شلل مركز ومتعرفيش مين الي خدعه وقاله ان دمه خفيف وكل كلامه قفشات
وضحك والمفروض انك تكوني مجامله وتضحكي بس منصحكيش تيجي على اعصابك

3- المودي

دي بقة شخصية بتتنوع كل يوم على حسب المود وهتحسي انك بتكلمي واحد
عنده انفصام ف الشخصية النهاردة رزين وعاقل وبكرة لاسع وبعد يومين رخم
وبعدها كيوت وفريندلي طبعا الحكايه مش ناقصة جنان كفايه الي الواحد
فيه

4- اللزقه

والنوع ده عايز حزم ف التعامل معاه لأن كل كلامه انتي فين ؟ بتتاخري
في الرد ليه؟ انتي بتكلمي حد ؟؟ ياعم وانت مالك بتتحشر
ليه ......ولو قلتيله ثواني هيقولك ليه رايحة فين؟ متتاخريش ... ايه
ده انتي لسه مجيتيش ؟؟؟

5- الناصح

صباح الصداع مع كل جمله هتقوليها هتاخدي نصيحة وفيه عرض خاص قولي
جملتين وخدي اربع نصايح العرض مستمر حتى نفاد الكمية ........ولو على
منتدى زينا كده هتلاقيه بيقولك ليه حطيتي التوبيك ده وليه شيلتي
الصورة دي وحطيتي التانية انا انصحك انك تخليه يحصل اخواته الي فاتوا
يعني بلوك وديليت

6- الحبيب

انا فيا جاذبية وكل البنات بتعجب بيا ....... ايام ما كنت ف الكليه
كنت عامل ازمه والبنات بتتخانق عليا...... المصيبة بقى ان اي جمله
هتقوليها هيفهم ان انتي معجبه اصله مش بمزاجك هتحبيه يعني هتحبيه عشان هو بيتهياله كده

7- حريقة بنات

ده بقى لو في منتدى او ميل جروب تلاقيه مركز على كل البنات ومبيعملش
اي حاجة تانية غير كده الكوميدي بقى لما يتلخبط ويعتقد ان الأسم ده
انثوي ويندمج وبعدين يطلع واحد صاحبه

8- الكداب

ده بقا من اول الأسم والسن واي معلومة خدتيها كدب في كدب ومتعرفيش ليه ده بقى

++++++++++++++++++++++++++++++++++

بس يا جماعه اكيد فى الحلو برضو
وادينا هنتكلم عن الانواع الحلوة اوكى

و دول بيتقسمو الى:_

1_ العاقل

و ده فعلا بيكون عاقل و مثقف و النوع ده ممكن يكون
قليل لكن موجودين و الحمدلله و دول بيدخلو النت علشان
يفيدو و يستفادو

2_ الهادى

دول تلاقيهم وجودهم قليل فى النت و ردودهم قليله
بس بتبقى ليهم وجهات نظر كتييييير صح و بيثبتو وجودهم

3_ المتدين و اللى بيحب ربنا

دول بقا بيبقو داخلين النت على حاجات معينه
زى الكتا المقدس وتفسيره و الحاجات دى و دول
مالهمش فى الكلام عن نفسهم كتير ولا التعارف
+++++++++++++++++++++++++++++++++++


و فى بعد ده كله النوع الوسط اللى هو ولا بيضحك كتير اوى
ولا يتعرف كتير اوى و لا يكون متدين اوى بس بيكونو برضو
هادين شويه و عاقلين شويتين و بيتهيالى ان المعظم والاغلبيه
بيبقو كده



يارب الموضوع يعجبكم و اوعو تدعو عليا بعد ماتقرو

المصدر: †† ارثوذكس †† - من قسم: الموضوعات الشبابية

[lolaemo]

و فى بعد ده كله النوع الوسط اللى هو ولا بيضحك كتير اوى
ولا يتعرف كتير اوى و لا يكون متدين اوى بس بيكونو برضو
هادين شويه و عاقلين شويتين و بيتهيالى ان المعظم والاغلبيه
بيبقو كده
دة اخر الكلام يا دونا
موضوع جميل بجد ميرسى كتيرررررررر

[جانيت سمير]

حلو يادونا وحلو اوى المودى دة
معظمهم عندهم كدة

[finyara]

على فكرة يا دونا مش الولاد بس اللى كده كل الانواع اللى قلتيها تنطبق برضوا على البنات وهو فى كل نوع زى مافى الحلو فى الوحش

[يسوع ربى]

موضعك بجد حلو اوى يا مادونا

[miro_rook]

مش عارف ارد ازاي دلوقتي يامادونا ولا بلاش ارد
انتي معكي حق بس برده في بنات كتير زي الاولادكدا بظبط بس كلمه خيره النت حلو وحش علي العاقل و الكداب حتي

[مادونا نبيل]

ميرسى كتير على مروركم اللى نور الموضوع
و فعلا فى كده بردو فى البنات

[la tristeza y el dolor]

دووووووووونا موضوع جامد حللتينا و فصفصتينا و بهدلتينا , منتظرين انواع البنات الى على النت بسرعه !

[مادونا نبيل]

ههههههههههههههههههههه
يا بندق ما ده بردو فى بنات كده
ميرسى على ردك ومرورك

[hany1982]

شكراً قوى يا دونا على الموضوع الجامد ده بجد انتى قولتى كل حاجه عن الشباب اللى بيدخلوا النت بس اكيد فيه انواع للبنات برضه كده .ربنا يباركك