[حنين سنين]

فكرت فى يوم وانت واقف قدام المرايا تبص لنفسك كويس وتتأكد أن وشك اللى انت شايفه ده هو وشك مش وش حد تانى ؟؟؟
طب متأكد أنك أنت .. أنت ؟ مش حد تانى ؟؟
يعنى ملبستش قناع قبل كده ؟
ولا انت لابس قناع اساسا ومش دارى بنفسك ؟
ولا أنت مستلذ شعور أنك لابس قناع وسايق فيها ؟


يا من ترتدون الاقنعة هيا اخلعوها
فلنسقط عنا الاقنعة الزائفة ولنواجه أنفسنا بحقائقنا حتى نشفى من أمراضنا ...
انت يا اللى لابس قناع التقوى اخلعه واظهر على حقيقتك ولما يبان مرضك حاول تعالجه ولما تتعالج هتكون التقوى وش حقيقى ليك .
وانت ياللى لابس قناع الحكمة أخلعه لانك عمرك ماكنت حكيم ..
تعالوا نقف قدام المرايا ونواجه انفسنا
أى قناع ده اللى على وشنا
كفاية بقى ... كفاية ... زهقنا
من وجوه مش وجوهنا
وكلام مش بتاعنا
تعالوا نسقط عنا الاقنعة
عشان نقدر نكتشف أمراضنا ونعالجها
تعالوا نستغنى عن أدوات المكياج الزائف اللى بنلون بيه وجوهنا وندخل فى كرنفال مزيف من الالوان.
تعالوا نواجه نفسنا بدون رتوش ولا تجميل
خلاص مابقاش فى وقت



لاتتهم أخ أو اخت لك وتحكم عليه من وراء قناعك
نخلع الاقنعة الاول ووقتها هنلاقى اننا متشابهين لحد كبير
سامع واحد بيقولى انا مش لابس قناع
طب ممكن بس تروح قدام المراية وتبص فيها كويس
ولو صورتك مش واضحة امسح المراية بورقة جرنان
وبعد كده نتكلم .



عندما تسقط الاقنعة ستصرخ ضمائرنا فينا
عندما تسقط الاقنعة سنعرف معنى الدموع
عندما تسقط الاقنعة سنتحرر من الاوهام
عندما تسقط الاقنعة سنخرج من دائرة النفاق
عندما تسقط الاقنعة سيكون هناك فرصة للعلاج مما علق بنا من أمراض
عندما تسقط الاقنعة سننجح فى أيام ما فشلنا فيه طوال عمرنا
عندما تسقط الاقنعة سنترك كثيرين ممن تقربنا لهم
عندما تسقط الاقنعة سنعرف قيمة من أهملناهم
عندما تسقط الاقنعة لن نخجل مما نقول أو نفعل لأننا سنكون طبيعين
عندما تسقط الأقنعة سنصرخ بصوت عال لأننا سنفاجأ من حقيقة من نكون
عندما تسقط الأقنعة ستتغيرمعانى الألوان ونرى الابيض الذى طالما رأيناه ابيض هو فى الحقيقة أسود والعكس

وعندما تسقط الاقنعة رجاء ان نقبل أنفسنا كما نحن
لأنها الحقيقة

المصدر: †† ارثوذكس †† - من قسم: المنتدى العام